Navigation

Inhaltsbereich

Dumonda Bardill concernent la promoziun da la cultura

Sessiun: 15.02.2023

Dapi ch'il nov Concept per promover la cultura (CPC) è entrà en vigur il 2021, stattan a disposiziun meds finanzials sup­ple­mentars per la lavur culturala grischuna. Ils signals èn positivs che la cultura pruja en il Grischun sco materia prima regenerabla, saja quai en exposiziuns, sin tribunas, en las vias, en cleragls, en salas communalas, en museums, en garaschas, en stallas vidas, en offspaces, en tschalers da musica, en gallarias ed er en auters lieus.

Suenter che l'emprima mesadad dal CPC actual è passada, sa tschentan dentant dumondas per bleras persunas che lavuran sin il champ cultural. L'adattaziun necessaria da las finamiras strategicas n'è strusch da localisar fin ussa tar l'Uffizi da cultura. La critica sa lascha resumar en ils suandants puncts:

  • Pretensiuns nuncleras tar las dumondas chaschunan lavur administrativa excessiva e retards tar la concessiun dals meds finanzials.
  • Las pretensiuns areguard las atgnas prestaziuns n'èn savens betg cleras ed i vegnan concedidas pitschnas contribuziuns (plitgunsch 10 pertschient dal preventiv empè dals 25 pertschient pussaivels).
  • Clerezza mancanta areguard la finamira dals differents instruments da promoziun, p.ex. promoziun sur cunvegnas da prestaziun u promoziun sur projects singuls.
  • Lungs temps per elavurar las dumondas.

Las sutsegnadras ed ils sutsegnaders vulessan perquai savair da la Regenza:

  1. Cura survegn l'Uffizi da cultura las resursas necessarias per pudair tegnair quint dal fatg che las pretensiuns a la promoziun da la cultura èn sa midadas, dapi che la Lescha per promover la cultura ed il CPC èn entrads en vigur?
  2. Tge mesiras prenda l'Uffizi da cultura per cuntanscher ina midada
    a) da l'orientaziun a la controlla vi tar l'orientaziun a la promoziun,
    b) da la garanzia da deficit vi a la contribuziun da promoziun?
  3. Tge proceder (evaluaziun dal CPC 2021-2024, gruppa da project, participaziun, milestones, lavur da publicitad) è planisà per elavurar il CPC 2025-2028?

Cuira, ils 15 da favrer 2023

Bardill, Saratz Cazin, Kocher, Atanes, Bachmann, Baselgia, Biert, Bischof, Bisculm Jörg, Bleuler-Jenny, Cahenzli-Philipp (Vaz Sut), Danuser (Cuira), Dietrich, Furger, Gartmann-Albin, Hoch, Hofmann, Mazzetta, Müller, Nicolay, Pajic, Perl, Preisig, Rusch Nigg, Rutishauser, Spagnolatti, von Ballmoos, Zaugg-Ettlin

Resposta da la regenza

Cun la revisiun da la Lescha davart la promoziun da la cultura (LPC) ha il Cussegl grond concludì d'elavurar in concept cumplessiv per promover la cultura (CPC). Il CPC per la perioda 2021–2024 è vegnì redigì en il rom d'in vast process participativ en cooperaziun cun la Cumissiun da cultura sco er cun numerusas organisaziuns culturalas e liadas a la cultura. La LPC inclusiv ordinaziun, la Lescha da finanzas, il Reglament per pajar contribuziuns or da la finanziaziun speziala «Lottaria naziunala» sco er il CPC èn liants per la promoziun chantunala da la cultura. L'orientaziun stra­te­gica sa drizza tenor ils accents da promoziun, tenor las finamiras e tenor las mesiras ch'èn definids en il CPC. Il CPC infurmescha detagliadamain davart ils instruments da promoziun e davart las cundiziuns generalas. Ina da las incumbensas centralas da l'Uffizi da cultura (UdC) è quella d'examinar, sche las dumondas da promoziun correspundan a las prescripziuns. Displaschaivlamain è il CPC entrà en vigur durant la pandemia da COVID, che ha chaschunà blera lavur e gronds custs supplementars nunspetgads per la promoziun da la cultura (prescripziuns da la Confederaziun, ela­vuraziun da 362 dumondas d'indemnisaziun da perditas, projects da transfurmaziun e.u.v. en la dimensiun da ca. 11 miu. francs). Las acturas ed ils acturs dal sectur da la cultura, ch'èn stads pertutgads fermamain da la pandemia, han beneventà ed onu­rà ils sforzs dal UdC. Ultra da quai è il UdC stà confruntà cun absenzas da persunal pervia da maternitad e da malsogna. Durant questa perioda han singulas dumondas duvrà dapli temp per vegnir elavuradas. Cun engaschar svelt collavuraturas e colla­vuraturs temporars e cun augmentar ils pensums da lavur ha il UdC pudì liquidar la chargia da lavur. Tuttina è il UdC sa stentà d'accelerar la realisaziun dal CPC tenor plan. Uschia ha il UdC fatg cunvegnas da prestaziun cun 41 instituziuns culturalas, concedì 54 contribuziuns a projects ed elavurà in concept per la promoziun dal film. Plinavant ha el contactà las persunas responsablas per il svilup regiunal sco er l'Uffi­zi per economia e turissem cun l'intent d'evaluar il potenzial da sinergia. En il rom dal Program da la Regenza 2021–2024 vegn actualmain elavurada ina plattafurma da cultura. Quella vegn er a cuntegnair in chalender d'occurrenzas. Uschia vegn cuntan­schida in'ulteriura finamira dal CPC.

Tar la dumonda 1: In augment da las plazzas per 50 % è vegnì realisà tras adatta­ziuns internas. En cas da basegn po il UdC plinavant quintar er en il futur cun il su­stegn da collavuraturas e collavuraturs temporars. In'extensiun da las resursas da persunal vegn examinada.

Tar la dumonda 2 a.: Ina incumbensa centrala dal UdC è quella da controllar che las prescripziuns e las reglas legalas vegnian observadas. Uschia vegni procurà per transparenza e per egualitad da las schanzas en la promoziun da la cultura. Quai na stat betg en cuntradicziun cun l'orientaziun a la promoziun.

Tar la dumonda 2 b.: Tenor l'art. 9 al. 3 LPC na sustegna il chantun «betg projects u instituziuns culturalas che lavuran en emprima lingia cun finamiras da rendita». Garanzias da deficit per contribuziuns a projects garanteschan quai. En cas da ga­ran­zias da deficit or dals meds da la lottaria naziunala pon fin dus terzs da l'import con­cedì vegnir pajads anticipadamain, quai per pussibilitar la liquiditad. En cas da cun­vegnas da prestaziun e da contribuziuns a projects or da las finanzas publicas ge­neralas vegnan pajaments parzials prestads, sche las prestaziuns èn vegnidas fur­nidas ed èn cumprovadas (art. 51 al. 2 da l'Ordinaziun da finanzas). Cun il conclus da la Regenza dals 13 da december 2022 (prot. nr. 983/2022) è il UdC vegnì incaricà en il rom da l'examinaziun da las incumbensas e da las prestaziuns, da realisar la digitalisaziun dal process da contribuziun en il sectur da las contribuziuns culturalas. A medem temp stoi vegnir examinà, sche las contribuziuns pon vegnir pauschalisa­das pli fitg.

Tar la dumonda 3: Cun la planisaziun dal CPC 2025–2028 èsi vegnì cumenzà l'atun 2022. Durant il 2. quartal 2023 vegnan las acturas ed ils acturs da la cultura inter­ro­gads davart il CPC actual. Sin fundament dals resultats vegn il CPC 2025–2028 ela­vurà en cooperaziun cun la Cumissiun chantunala da cultura sco er cun las institu­ziuns culturalas. Er ina lavur da publicitad vegn planisada. Il CPC vegn previsibla­main suttamess al Cussegl grond en la sessiun d'october 2024 per l'approvaziun.

26 d'avrigl 2023