Navigation

Inhaltsbereich

Dumonda Binkert concernent l'execuziun da la Lescha federala davart las vias ciclablas

Sessiun: 15.02.2023

La nova Lescha federala davart las vias ciclablas procura per vias da velos da meglra qualitad e pli segiras, tras quai ch'ils chantuns vegnan obligads da planisar e da realisar raits da vias da velos.

Cun il «gea» al Conclus federal davart las vias ciclablas ha il pievel decidì l'atun 2018 che la Confederaziun sustegnia ils chantuns tar las vias da velos. Ils 18 da mars 2022 ha il parlament deliberà la lescha appartegnenta. Ed en sia sesida dals 2 da december 2022 ha il Cussegl federal concludì che la nova lescha entria en vigur il 1. da schaner 2023.

Las meglieraziuns previsas en la lescha duain stgaffir ina buna e segira rait da vias da velos e separar il traffic. Ils autos, ils velos sco er las pedunas ed ils peduns duain esser main savens enta pes in a l'auter, uschia che accidents vegnan evitads. A medem temp promova la lescha il moviment e pia er la sanadad da la populaziun.

La Lescha federala davart las vias ciclablas oblighescha ils chantuns da planisar e da realisar raits da vias da velos. En il senn da princips da planisaziun surordinads cuntegna ella plinavant finamiras da qualitad (coerent, direct, segir, omogen, attractiv). En Engiadina ed en autras valladas dal chantun mancan fin oz raits da vias da velos che correspundan a las finamiras da qualitad. Talas raits n'èn dentant betg mo relevantas per la populaziun, mabain han – en noss chantun turistic cun la tendenza creschenta dad e-bikes – er ina gronda impurtanza turistica ed economica per l'entir chantun.

Sut l'aspect da questas explicaziuns ed en cumplettaziun da l'incumbensa Cahenzli-Philipp da l'october 2021 drizzan las sutsegnadras ed ils sutsegnaders las suandantas dumondas a la Regenza:

  1. En tge stadi è la realisaziun da l'incumbensa Cahenzli-Philipp e co sa preschenta l'orizont da planisaziun per ina rait da vias da velos nuninterrutta en il chantun Grischun ed en spezial en l'Engiadin'Ota?
  2. Co po la Confederaziun vegnir integrada en moda utila sin fundament da la nova Lescha federala davart las vias ciclablas, per accumpagnar ed accelerar la realisaziun sin il territori dal chantun Grischun ed en spezial sin il territori da l'Engiadin'Ota, ch'è cuntegni en l'Inventari federal da las cuntradas e dals monuments natirals d'impurtanza naziunala (IFC)?
  3. È la Regenza pronta da prender per mauns svelt il tema d'ina rait da vias da velos nuninterrutta, betg mo en il traffic quotidian, mabain er en il traffic turistic, e d'elavurar ina glista da prioritads cun las vias da velos ch'èn da planisar e da realisar?
  4. È la Regenza da l'avis ch'i saja raschunaivel d'integrar la Confederaziun uschè svelt sco pussaivel en la planisaziun ed en l'elavuraziun da raits da vias da velos nuninterruttas en territoris che dovran blera lavur da coordinaziun (territoris IFC, mancanza da spazi e.u.v.)? Sche quai fiss il cas: Vegn la Regenza a drizzar svelt ina dumonda correspundenta a la Con­fe­de­raziun?

Cuira, ils 15 da favrer 2023

Binkert, Metzger, Pfäffli, Bachmann, Bardill, Baselgia, Berweger, Bischof, Bisculm Jörg, Bleuler-Jenny, Brunold, Bundi, Cahenzli-Philipp (Vaz Sut), Candrian, Censi, Collenberg, Crameri, Degiacomi, Derungs, Dietrich, Dürler, Epp, Feuerstein, Furger, Gansner, Gredig, Heini, Hoch, Jochum, Kohler, Lamprecht, Loepfe, Luzio, Maissen, Mani, Michael (Donat), Nicolay, Oesch, Pajic, Preisig, Rageth, Rettich, Righetti, Rusch Nigg, Rutishauser, Salis, Saratz Cazin, Sax, Schneider, Schutz, Spagnolatti, Ulber, von Ballmoos, von Tscharner, Wieland, Zanetti (Sent), Zaugg-Ettlin

Resposta da la regenza

La projectaziun, la construcziun ed il mantegniment da stabiliments dal traffic betg motorisà èn en il chantun Grischun incumbensas da las vischnancas (art. 6 al. 3 da la Lescha davart las vias dal chantun Grischun [LVias; DG 807.100]). Perquai ston las vischnancas realisar ed optimar las raits da vias da velos dal traffic quotidian e da temp liber. Cun contribuziuns chantunalas promova il chantun la construcziun da la rait chantunala da vias da velo (art. 58 LVias).

Tar la dumonda 1: Cun il conclus dals 26 d'october 2021 (prot. nr. 930/2021) ha la Regenza menziunà en la resposta a l'incumbensa Cahenzli-Philipp, ch'il chantun è pront da surpigliar la responsabladad per la planisaziun da la rait chantunala da vias da velo dal traffic quotidian e – per incumbensa da las vischnancas – er la projecta­ziun e la construcziun da questa rait. Plinavant duai la realisaziun da la rait da vias da velo dal traffic quotidian vegnir promovida cun agid d'in impuls finanzial pli ferm. Per las vischnancas èn las cundiziuns generalas pia sa meglieradas cleramain. Sco post spezialisà chantunal per il traffic betg motorisà ha l'Uffizi da construcziun bassa fatg ina priorisaziun tenor il potenzial dal traffic da velo quotidian e tenor ils puncts debels enconuschents. Silsuenter ha el contactà differentas vischnancas e manà cun ellas discurs preliminars en vista ad in'eventuala planisaziun dals projects. Perquai che las vischnancas èn cumpetentas per il traffic betg motorisà, n'ha il chantun nagin orizont da planisaziun liant. Ils puncts debels tenor il Plan sectorial Velo, che pertu­tgan las vias chantunalas, èn vegnids integrads en la planisaziun da plirs onns per il mantegniment da las vias e vegnan liquidads correspundentamain.
En il rom dal Program d'aglomeraziun Cuira da la 4. generaziun èsi previs da realisar diversas mesiras. Quellas augmentan considerablamain la valur da l'infrastructura da velo e gidan ad eliminar ils puncts debels sin la rait chantunala da vias da velos. Ultra da discurs e da sesidas cun diversas vischnancas vegn actualmain elavurà in con­cept per il traffic da velos e da peduns cun la vischnanca da Tavau, quai sut la direc­ziun dal chantun. En l'Engiadin'Ota èn discurs correspundents cun las vischnancas e cun la regiun en preparaziun.

Tar la dumonda 2: Sin basa da l'art. 14 da la Lescha federala davart las vias cicla­blas (CS 705) po la Confederaziun sustegnair ils chantuns e las vischnancas cun por­scher cussegliaziun professiunala e cun metter a disposiziun documentaziuns. En territoris che figureschan en l'Inventari federal da las cuntradas e dals monuments natirals d'impurtanza naziunala (IFC) decida il post spezialisà chantunal sin basa da l'art. 7 al. 1 da la Lescha federala davart la protecziun da la natira e da la patria (LPNP; CS 451), sche la Cumissiun federala per la protecziun da la natira e da la patria (CFNP) duai vegnir involvida en la realisaziun d'in project sco gremi accum­pa­gnant.

Tar la dumonda 3: Il Plan sectorial Velo cuntegna tant ina rait da vias da velo dal traf­fic quotidian sco er ina rait dal traffic da temp liber. La rait dal traffic da temp liber è realisada quasi dal tuttafatg; optimaziuns han lieu cuntinuadamain (p.ex. ruta da bike sur il pass dal Güglia). Analogamain a la rait dal traffic quotidian èn las vischnancas er responsablas per projectar, per construir e per mantegnair ils stabiliments dal traf­fic da temp liber. Il chantun sustegna las vischnancas cun contribuziuns chantunalas en il rom da la legislaziun stradala. Cun la revisiun parziala da l'Ordinaziun davart las vias dal chantun Grischun (OVias; DG 807.110), che entra en vigur il 1. da zercladur 2023, ha la Regenza stgaffì las basas per pudair porscher in sustegn finanzial pli ferm er per ils stabiliments da vias da velo dal traffic da temp liber. En il sectur dals abitadis servan las vias da velo dal traffic quotidian a medem temp er al traffic da temp liber.

Tar la dumonda 4: En il rom da l'elavuraziun dals plans da la rait ston ils projects da vias da velo vegnir coordinads cun la protecziun da la natira, da la cuntrada e da las auas, quai per garantir ch'ils projects sajan approvabels. La CFNP vegn involvida en ils projects dal traffic betg motorisà, sche quels pudessan influenzar considerabla­main objects protegids tenor il IFC. Per fatschentas da rutina na vegn la CFNP per­cunter betg involvida. 

26 d'avrigl 2023