Navigation

Inhaltsbereich

Dumonda Luzio concernent la surdada da lavurs per projects da construcziun auta dal chantun

Sessiun: 15.02.2023

L'ultim temp publitgescha l'Uffizi da construcziun auta ils mandats da planisaziun per projects da construcziun auta dal chantun Grischun pli e pli sco singulas etappas per lavurs da la planisaziun generala empè da pliras etappas parzialas tenor secturs specifics. Quai è vegnì fatg uschia ultimamain per la construcziun dals novs edifizis Center administrativ sinergia e Center da la polizia stradala Sid sco er actualmain per ils projects per la construcziun d'in edifizi cumpensatoric per il Center d'instrucziun da la protecziun civila Meiersboden e dal nov Center da scola auta spezialisada GR.

Grondas incumbensas singulas vegnan surdadas pli e pli a planisaders generals resp. ad interpresas generalas. Tras ina divisiun correspundenta da las etappas da submissiun, avessan questas incumbensas però er pudì vegnir repartidas en pliras parts a pliras interpresas pitschnas e mesaunas.

Las interpresas pitschnas e mesaunas dal Grischun perdan uschia incumbensas interessantas dal chantun d'origin. Talas incumbensas van savens a purschiders da servetschs d'ordaifer il chantun, perquai che las interpresas chantunalas n'adempleschan betg ils criteris da submissiun pervia da la grondezza da las etappas da construcziun e pervia dals differents secturs specifics.

Cun la moda da proceder actuala na survegn la mastergnanza indigena pitschna nagina pussaivladad da participar a talas submissiuns. Tras quai na perdan las interpresas betg mo las incumbensas dal chantun, mabain er la schanza da sa mesirar ina cun l'autra, da sa meglierar e da s'optimar.

Sut l'aspect da questas explicaziuns drizzan las sutsegnadras ed ils sutsegnaders las suandantas dumondas a la Regenza:

  1. Per tge motivs na vegnan las lavurs betg publitgadas tenor singuls secturs specifics, mabain sco mandat general?
  2. Co vegn fixada la divisiun da las etappas da construcziun e tenor tge criteris determinescha il chantun la grondezza da las etappas da construcziun?
  3. Quants pertschient da las incumbensas da l'Uffizi da construcziun auta (incl. volumen da las incumbensas) èn vegnidas surdadas ils ultims onns a planisaders ed ad interpresas dal chantun Grischun?
  4. Exista ina pussaivladad – en il rom da la legislaziun – da resguardar pli savens interpresas pitschnas e mesaunas tar submissiuns chantunalas per edifizis novs e per renovaziuns?

Cuira, ils 15 da favrer 2023

Luzio, Danuser (Cuira), Tomaschett, Altmann, Bachmann, Bardill, Biert, Bisculm Jörg, Censi, Claus, Degiacomi, Della Cà, Dietrich, Furger, Gansner, Gredig, Hartmann, Hohl, Holzinger-Loretz, Jochum, Kasper, Kienz, Kreiliger, Loi, Messmer-Blumer, Michael (Castasegna), Natter, Oesch, Rettich, Righetti, Roffler, Rüegg, Saratz Cazin, Schutz, Spagnolatti, Thür-Suter, von Tscharner, Weber, Wieland

Resposta da la regenza

L'acquisiziun da prestaziuns da planisaziun daventa pli e pli ina sfida, quai schizunt er per patruns da construcziun professiunals. Per dumagnar l'incumbensa da construcziun respectiva datti las pussaivladads d'organisar concurrenzas da planisaziun, da surdar incumbensas da studi u da far publicaziuns da prestaziuns. En cas da pretensiuns spezialas vegnan las concurrenzas da planisaziun concepidas – empè d'en furma d'ina concurrenza d'architectura classica – sco concurrenza da planisaziun generala, che prevesa da surdar tut las prestaziuns da planisaziun al team da project victur.

Tar la dumonda 1: L'acquisiziun dals mandats da planisaziun vegn fixada da l'Uffizi chantunal da construcziun auta (UCA), quai mintgamai en dependenza da l'incumbensa da construcziun concreta e resguardond las prescripziuns dal dretg d'acquisiziun. Per ch'i possia vegnir tegnì quint da la cumplexitad dals projects da construcziun actuals, ch'è per part gronda, èsi central ch'ina collavuraziun interdisciplinara da las planisadras e dals planisaders haja lieu uschè baud sco pussaivel. Ina concurrenza da planisaziun generala porscha en quest connex la garanzia, che las spezialistas ed ils spezialists da tut ils secturs da la planisaziun specifica èn gia participads al svilup dal project. Grazia a questa cooperaziun tempriva po vegnir sviluppà in project integral che porscha ina basa optimala per la realisaziun posteriura. Tant per il Center da scola auta spezialisada dal Grischun (CSASGR; grondezza dal project da 178 miu. francs), per il Center da la polizia stradala a Cuira (construcziun d'in edifizi da piunier da netto nulla) sco er per la concurrenza actuala per in Center d'instrucziun da la protecziun civila en il Meiersboden (autas finamiras en il sectur da la persistenza e da la circulabladad) è la collavuraziun interdisciplinara da las planisadras e dals planisaders d'emprim ennà decisiva per cuntanscher las finamiras. Il pli adattà per quai è in team da planisaziun generala.

Tar la dumonda 2: Tar mintga project da construcziun e da planisaziun evaluescha e definescha il UCA la meglra procedura pussaivla per surdar las prestaziuns da planisaziun. La grondezza, la cumplexitad e las finamiras specificas da l'incumbensa da construcziun respectiva, giogan en quest connex ina rolla decisiva. Sin fundament d'ina stimaziun dals custs e dals indicaturs vegnan las etappas da construcziun definidas, e quai areguard las singulas dimensiuns da l'incumbensa. Ultra da quai vegni resguardà, che la cuntinuitad e la responsabladad ch'èn necessarias per ademplir l'incumbensa, vegnian cuntanschidas cun paucs puncts da contact. Tar las trais proceduras da planisaziun generala dal UCA menziunadas pudevan resp. pon las planisadras ed ils planisaders spezialisads indigens sa colliar cun biros d'architectura (locals) e – sco team da planisaziun – candidar resp. inoltrar ina proposta cuminaivla per in project. Quai è vegnì fatg tant tar il Center da scola auta spezialisada dal Grischun sco er tar il Center da la polizia stradala a Cuira, nua che singuls planisaders spezialisads locals fan part dals teams da planisaziun generala incumbensads. Plinavant stoi vegnir fatg attent al fatg, che las prestaziuns da planisaziun da projects gronds ston per regla vegnir publitgadas uffizialmain, e quai er sch'ellas vegnan surdadas tenor las singulas spartas.

Tar la dumonda 3: In'evaluaziun da las incumbensas da planisaziun dal UCA mussa, che 82 pertschient da tut las incumbensas èn vegnidas surdadas durant ils onns 2018 fin 2021 a planisadras e planisaders dal Grischun. D'in volumen d'incumbensas da circa 23 miu. francs èn uschia 17 miu. francs ids a biros da planisaziun indigens. Quai correspunda ad ina quota da 74 pertschient. La statistica da las surdadas da l'onn 2022 n'è actualmain betg anc avant maun.

Tar la dumonda 4: Las acquisiziuns dal chantun sa drizzan tenor las prescripziuns dal dretg d'acquisiziun sco er tenor las valurs minimalas decisivas. Il UCA ed ils ulteriurs posts da servetsch chantunals èn conscients da l'impurtanza da las incumbensas publicas per l'economia publica, ed els tiran a niz cun gronda responsabladad il spazi d'agir ch'è resultà da l'ultima revisiun da las prescripziuns da surdada. Las dimensiuns da las etappas da construcziun vegnan fixadas en il senn d'ina pratica d'acquisiziun uschè favuraivla sco pussaivel per las interpresas pitschnas e mesaunas ed en il cas normal vegnan admessas cuminanzas d'offerents. L'applicaziun intensivada da criteris da qualitad e da persistenza tar acquisiziuns publicas gida er a rinforzar ulteriuramain l'economia regiunala.

26 d'avrigl 2023