Navigation

Inhaltsbereich

Incumbensa Rusch Nigg concernent la lavada da daners sin il martgà d'immobiglias

Sessiun: 15.02.2023

Gia avant pli che 10 onns è il Cussegl grond s'occupà dal tema da la lavada da daners sin il martgà grischun d'immobiglias (Dumonda Müller [Tavau Plaz] concernent la lavada da daners en il commerzi grischun d'immobiglias dal 01-09-2011). Il motiv per quella dumonda è stà il rapport annual 2010 da l'Uffizi federal da polizia fedpol, il qual aveva identifitgà ina gronda predisposiziun dal sectur d'immobiglias svizzer per la lavada da daners. Sco ch'il cas da la cumpra d'ina abitaziun a San Murezzan mussa, n'è quest tema betg main actual ozendi. Uschia han ins pudì leger dacurt en las medias, ch'in anteriur viceminister venezolan ch'è suspectà da greva corrupziun, ha pudì acquistar – il fanadur 2019 – in'abitaziun per 6 milliuns francs a San Murezzan. El ha acquistà l'abitaziun tras ingiant tar l'Uffizi da scussiun e da concurs Malögia. Ch'i va relativamain lev da lavar daners sur las autoritads chantunalas n'è ni en l'interess da las burgaisas e dals burgais, ni en l'interess da las vischnancas, ni en l'interess dal chantun.

Tenor il dretg vertent (art. 26 al. 2 LItCPP) han las commembras ed ils commembers da las autoritads chantunalas sco er las collavuraturas ed ils collavuraturs chantunals il dretg da denunziar acts chastiabels che ston vegnir persequitads d'uffizi e dals quals ellas ed els èn vegnids a savair exequind lur activitad uffiziala mo, sch'ellas ed els èn vegnids deliberads ordavant dal secret d'uffizi tras lur autoritad da surveglianza. In'obligaziun d'annunzia vala mo, sche las regulaziuns specificas per il sectur prevesan quai e mo per delicts che vegnan commess en il sectur tematic respectiv.

Las regulaziuns mussan: Sch'igl exista in suspect da lavada da daners, na po ina commembra u in commember da l'autoritad – en il cas menziunà qua survart il funcziunari da concurs – betg senz'auter annunziar quest act chastiabel. Quai è ina situaziun che na cuntenta ni las commembras ed ils commembers da l'autoritad pertutgads, ni il chantun Grischun. I sto esser en l'interess dal chantun d'esser nunattractiv per lavada da daners. In dretg simplifitgà per las commembras ed ils commembers d'ina autoritad d'annunziar acts chastiabels en cas d'in suspect, pudess esser in instrument util en quest connex.

Las sutsegnadras ed ils sutsegnaders incumbenseschan la Regenza:

  1. d'inditgar las libertads d'agir dal chantun en il cumbat cunter la lavada da daners;
  2. d'eruir las largias en las leschas concernent la lavada da daners e da preschentar propostas pussaivlas per reveder las leschas;
  3. d'eruir las largias en las leschas concernent ils dretgs e las obligaziuns da las commembras e dals commembers d'autoritads per annunziar acts chastiabels che surpassan delicts tematicamain specifics e da preschentar propostas pussaivlas per reveder las leschas.

Cuira, ils 15 da favrer 2023

Rusch Nigg, Oesch, Preisig, Atanes, Bachmann, Bardill, Baselgia, Bavier, Biert, Bischof, Bisculm Jörg, Bleuler-Jenny, Cahenzli-Philipp (Vaz Sut), Danuser (Cuira), Degiacomi, Dietrich, Furger, Gansner, Gartmann-Albin, Gredig, Hoch, Hofmann, Kappeler, Kreiliger, Mazzetta, Müller, Nicolay, Pajic, Perl, Rageth, Rettich, Righetti, Rutishauser, Spagnolatti, von Ballmoos, Zaugg-Ettlin

Resposta da la regenza

Cumpetenta per la legislaziun pertutgant il cumbat cunter la lavada da daners è en emprima lingia la Confederaziun. Sin plaun federal èn en curs differentas proceduras che han l'intent d'obtegnair instruments pli effizients per impedir la lavada da daners. Cun l'interpellaziun Dandrès (Cussegl naziunal 22.3693: Lavada da daners cun agid da scussiuns apparentas) dals 16 da zercladur 2022 duai l'obligaziun illimitada da l'uffizi da scussiun d'acceptar pajaments tenor l'art. 12 da la Lescha federala davart la scussiun ed il concurs (LSC; CS 281.1) vegnir cumplettada cun il scumond d'acceptar pajaments en daner contant da pli che 100 000 francs. Tenor ils rapports da las medias actuals lavura il Departament federal da finanzas (DFF) plinavant vi d'in project per extender la Lescha davart la lavada da daners suspectus (LLDS; CS 955.0) er sin notaras e notars resp. sin advocatas ed advocats che vegnan en il futur a valair sco commerziants finanzials intermediars e che vegnan pia a vegnir suttamess – tenor la LLDS – a las medemas obligaziuns da controlla sco las collavuraturas ed ils collavuraturs d'instituts da finanzas e sco commerziantas e commerziants. Cun questas mesiras vegnan serradas largias en la LLDS, ed ulteriurs players impurtants sin il martgà d'immobiglias vegnan suttamess a la lescha. Las stentas sin plaun federal ston da princip vegnir beneventadas e sustegnidas.

Tar il punct 1: En general exista pauca fin nagina libertad d'agir per cumbatter la lavada da daners suspectus sin plaun chantunal tras ina regulaziun legala chantunala. Ils instruments existents dal dretg federal per controllar ils pajaments – sco per exempel la LLDS, la Lescha federala davart l'acquist da bains immobigliars tras persunas da l'exteriur (LAIE; CS 211.412.41) u la disposiziun per cumbatter cunter la lavada da daners en l'art. 305bis CP – vegnan applitgads consequentamain dals posts chantunals cumpetents. Ina libertad d'agir exista per sensibilisar las collavuraturas ed ils collavuraturs dals uffizis chantunals da tut ils stgalims per la problematica da la lavada da daners.Ulteriurs champs d'acziun ch'èn raschunaivels ord vista da las autoritads da retschertga e ch'èn situads en il chantun, fissan intervenziuns en cas da suspect sco tals che pertutgan secturs ch'èn generalmain protegids bain – betg senza motiv – tras la protecziun da datas e concretamain tras il secret da taglia, da banca e d'uffizi.

Tar il punct 2: Largias en las leschas dal dretg chantunal areguard la problematica da la lavada da daners n'èn betg visiblas. Eventualmain èsi raschunaivel da far tschertas adattaziuns da las regulaziuns existentas (cf. punct 3). Sch'ins vul stgaffir regulaziuns chantunalas spezialas, ston ins – en vista a l'instrumentari dal dretg federal – examinar ordavant detagliadamain, sche talas èn admissiblas, utilas e proporziunalas.

Tar il punct 3: A chaschun da l'introducziun da l'art. 26 al. 2 da la Lescha introductiva tar il Cudesch da procedura penala svizzer (LItCPP; DG 350.100) èsi vegnì desistì conscientamain – sin plaun chantunal – da prevair in'obligaziun generala da far ina denunzia per emploiadas ed emploiads. Per l'ina sa tschentan en quest connex dumondas delicatas davart il secret d'uffizi e/u il secret professiunal e per l'autra fiss l'administraziun exponida tras quai ad in act da ballantscha difficil tranter denunzias penalas excessivas e la reproscha permanenta da favurisaziun penala (cf. la missiva tar la realisaziun dal Cudesch da procedura civila svizzer e dal Cudesch da procedura penala svizzer sin il stgalim da la lescha dals 23 da mars 2010, carnet nr. 13/2009-2010, p. 795 ss., p. 860). En il rom da la tractativa da la missiva ha il Cussegl grond surpiglià senza resalvas l'opiniun da la Regenza da desister d'ina obligaziun da far ina denunzia e da francar empè da quai in dretg general da far ina denunzia. Quest dretg general da far ina denunzia vegn cumplettà en il dretg chantunal mintgatant cun obligaziuns da far ina denunzia ch'èn specificas per il sectur. Obligaziuns da far ina denunzia èn mo cunvegnentas, sch'ils posts da servetsch e lur collavuraturas e collavuraturs èn spezialisads per quests secturs tematics. Cas cuntrari manca la savida spezialisada necessaria per identifitgar u per giuditgar acts chastiabels. Concernent la lavada da daners n'èn ils posts pertutgads en il chantun betg spezialisads, uschia ch'i sto vegnir desistì d'introducir in'obligaziun da far ina denunzia. Il dretg da far ina denunzia exista gia. I vala da controllar, sche l'exemziun dal secret d'uffizi ch'è previsa actualmain, è anc confurma al temp en questa furma. Quai tant pli, perquai ch'i sto vegnir partì dal fatg, ch'ina dumonda d'exemziun dal secret d'uffizi en cas d'in delict persequità d'uffizi vegn en mintga cas acceptada.

Sa basond sin questas explicaziuns propona la Regenza al Cussegl grond d'acceptar questa incumbensa.

3 da matg 2023