Navigation

Inhaltsbereich

Dumonda Cahenzli-Philipp concernent la collocaziun ordaifer la famiglia – care leavers

Sessiun: 15.06.2023

Care leavers èn persunas giuvnas creschidas che han passentà ina part da lur vita en l'agid staziunar per uffants e giuvenils – p.ex. en gruppas d'abitar u en chasas d'uffants assistidas ubain en famiglias da tgira – e che sa chattan ussa a la sava d'ina vita independenta. Cura ch'els daventan maiorens, finescha la finanziaziun da la mesira en la gronda part dals cas; d'in mument a l'auter ston els daventar creschids e funcziunar en moda independenta. Intgins èn amez la scolaziun u schizunt anc en la fasa da tschertga e n'èn anc ditg betg al punct, ch'els pon manar lur vita en moda autonoma. Ils blers n'han naginas relaziuns stabilas e da sustegn en lur famiglia d'origin. L'accumpagnament fin ad ina vita da creschì independenta resta impurtant – quai tant pli, perquai che l'adolescenza è sa prolungada cumprovadamain. Uschia vegni discurrì oz dal 25. onn da vita sco nov 18. onn.

Blers care leavers èn surdumandads cun las sfidas administrativas (dumondas, contracts, rentas, obligaziuns d'annunzia e.u.v.) e bler da quai ch'els han emprendì durant la collocaziun ordaifer la famiglia, va puspè a perder. En las disposiziuns legalas davart l'agid per uffants e giuvenils è la finanziaziun reglada fin 18 onns, e fin maximalmain 20 onns, sch'els restan en l'institu­ziun. Suenter la fasa d'extrada manca perquai ina finanziaziun da purschidas d'accumpagnament che correspundan als basegns. Savens porschan persunas da confidenza e da referiment oz sin basa voluntara quest accumpagnament necessari. Ulteriuras prestaziuns vegnan bain finanziadas sur l'agid social, ma il pass da l'agid per giuvenils en l'agid social na dastga betg esser la finamira d'ina buna politica d'uffants e da giuvenils.

La Conferenza dals chantuns per la protecziun d'uffants e da creschids (COPUC) e la Conferenza da las directuras e dals directurs chantunals dals affars socials (CDAS) renconuschan la problematica dals care leavers. Gia l'october 2020 han ellas publitgà numerusas recumandaziuns per pussibilitar a quests umans giuvens ina meglra partenza en ina vita independenta.

Nus supplitgain la Regenza da dar scleriment davart las suandantas dumondas:

  1. Co vegnan las recumandaziuns da la COPUC e da la CDAS realisadas en il Grischun?
  2. Co registrescha il chantun datas statisticas davart ils care leavers?
  3. Han care leavers a partir da 18 onns ina persuna da confidenza, che als sustegna en cas da dumondas davart la vita da mintgadi?
  4. Tge tenuta ha la Regenza envers in'extensiun dal catalog da prestaziuns en instituziuns da sustegn e d'accumpagnament fin a la terminaziun d'ina emprima scolaziun, maximalmain fin a la cumplenida da 25 onns.

Claustra, ils 15 da zercladur 2023

Cahenzli-Philipp (Vaz Sut), Holzinger-Loretz, Ulber, Atanes, Bachmann, Bardill, Baselgia, Bavier, Beeli, Biert, Binkert, Bischof, Bisculm Jörg, Bleuler-Jenny, Brandenburger, Cola Casaulta, Degiacomi, Derungs, Dietrich, Epp, Furger, Gansner, Gartmann-Albin, Gredig, Hoch, Hofmann, Kaiser, Kreiliger, Mani, Mazzetta, Messmer-Blumer, Müller, Perl, Peter, Preisig, Rettich, Rusch Nigg, Rutishauser, Said Bucher, Tanner, Walser, Wilhelm

Resposta da la regenza

Relaziuns stabilas, raits sustegnentas ed ina partenza senza debits en l'indepen­den­za èn premissas fitg impurtantas per arrivar bain en la vita da creschì. Care leavers èn persunas giuvnas che han passentà ina part da lur vita en ina famiglia da tgira u en ina instituziun d'uffants e da giuvenils e che sa chattan a la sava da la vita da creschì. Cumpareglià cun giuvenils da la medema vegliadetgna, ch'èn creschids si en lur famiglias d'origin, pon care leavers avair dischavantatgs en differents secturs da la vita.

Tar las dumondas 1 e 3: En la planisaziun da mesiras dal program «Politica d'uffants e da giuvenils en il chantun Grischun» dal favrer 2021 èsi vegnì fixà, che las recu­mandaziuns da la Conferenza dals chantuns per la protecziun d'uffants e da cre­schids (COPUC) e da la Conferenza da las directuras e dals directurs chantunals dals affars socials (CDAS) vegnan examinadas ed – uschenavant sco pussaivel – instradadas. L'onn 2022 èn vegnidas analisadas las differenzas tranter la situaziun actuala en il chantun Grischun e las recumandaziuns da la COPUC e da la CDAS. Quai è stà la basa per las ulteriuras lavurs. Sin fundament da quests resultats èn vegnids lantschads ils trais projects parzials: «Novs mecanissems da finanziaziun e promoziun da la qualitad per famiglias da tgira», «Participaziun» sco er «Leaving care». Per realisar las recumandaziuns per la fasa «Leaving care» è vegnida sur­dada il cumenzament da l'onn 2023 ina incumbensa d'analisar il basegn. L'analisa cun ideas da realisaziun concretas per meglierar la situaziun dals care leavers, vegn ad esser avant maun l'onn 2024. Sin basa da questa analisa dal basegn vegn stabili­da la realisaziun concreta.

Tar la dumonda 2: Il Comité da la ONU per ils dretgs da l'uffant ha recumandà da sviluppar ina retschertga sistematica da tut las collocaziuns ordaifer la famiglia. En Svizra n'exista fin ussa nagina statistica naziunala davart il dumber, davart las datas demograficas e davart ils decurs da la vita d'uffants, ch'èn collocads ordaifer la fa­miglia en ina instituziun u en ina famiglia da tgira. La banca da datas «Casadata» è actualmain la statistica la pli detagliada davart las collocaziuns ordaifer la famiglia en Svizra. Casadata serva dentant primarmain a statisticas dal dretg penal per giuvenils e na mussa betg in maletg integral da las famiglias da tgira, da las scolas-dimora e d'ulteriuras instituziuns da l'agid per uffants e giuvenils. Perquai examinescha la Confederaziun actualmain la realisabladad d'ina collecziun sistematica naziunala da datas davart uffants collocads ordaifer la famiglia. Il chantun Grischun fa part da la gruppa accumpagnanta dal studi da realisabladad. Ils resultats dal studi da realisa­bladad vegnan spetgads la stad 2024.

Tar la dumonda 4: La CDAS e la COPUC han publitgà il schaner 2021 recumanda­ziuns davart la collocaziun ordaifer la famiglia. Questas recumandaziuns duain en emprima lingia rinforzar la realisaziun dals dretgs da l'uffant en situaziuns da collo­caziun, stabilir standards da qualitad e sustegnair ina pratica professiunala reflec­tada, nua ch'il bainstar da l'uffant stat en il center. Igl è in giavisch da la Regenza, che uffants e giuvenils che vegnan assistids ordaifer la famiglia, hajan in bun accum­pagnament ed in bun sustegn. En il rom dal plan da mesiras dal program «Politica d'uffants e da giuvenils en il chantun Grischun» ha la Regenza perquai concludì d'examinar e – sche pussaivel – d'instradar la realisaziun da las recumandaziuns. Las lavurs en ils trais projects parzials n'èn anc betg terminadas. Uschespert ch'ils resultats èn avant maun, vegn la Regenza a decider davart ils ulteriurs pass.

28 d'avust 2023