Navigation

Inhaltsbereich

Dumonda Collenberg concernent la mobilitad da damaun

Sessiun: 15.02.2023

Per bleras persunas è la mobilitad in element impurtant dal mintgadi. Esser mobil vul dir far las cumissiuns, procurar per l'agen provediment, pratitgar activitads professiunalas u dal temp liber e prender part da la vita sociala. Bleras furmas da mobilitad han dentant consequenzas nuschaivlas per il clima. L'impurtanza d'in bun traffic public e da bunas vias è incontestada en il chantun Grischun. Ultra dal velo – ch'è in med da transport ecologic – dovra blera glieud il tren, l'auto u l'aviun. Per metter a disposiziun a la populaziun ina infrastructura da mobilitad adequata ha il chantun Grischun fatg grondas investiziuns ils ultims decennis, ed el vegn a far talas er en l'avegnir. En quest connex è il focus drizzà sin las vias, sin il traffic public e sin las raits da vias da velos. Questas activitads d'investiziun èn impurtantas e duain vegnir sustegnidas.

Sin l'entir mund vegnan dentant perscrutadas er autras furmas da mobilitad. En blers lieus dal mund vegn per exempel per­scru­tada en il fratemp la tecnologia da hyperloop. La tecnologia da hyperloop è in sistem da traffic d'auta sveltezza, nua che capslas vegnan spedidas tras in bischen a vacum e cuntanschan bunamain la sveltezza dal sun.

La tecnologia na vegn betg mo perscrutada en il Silicon Valley. Er en l'Europa percorschan adina dapli persunas ed organisaziuns las schanzas da questa tecnologia. Uschia ha per exempel l'organisaziun da perscrutaziun EuroTube, ch'è domiciliada a Turitg, preschentà l'idea da construir in traject da test per la tecnologia da hyperloop en il Vallais. Cumbain ch'in traject da hyperloop para actualmain utopic per il traffic da persunas, na dastga il Grischun – sco chantun periferic – betg perder ord ils egls ils svilups en il sectur da la mobilitad. Ina rolla pli activa en quest sectur da perscrutaziun pudess esser d'avantatg per l'economia grischuna a lunga vista. In center da cumpetenzas per la mobilitad permettess da perscrutar en il sectur da la mobilitad da damaun, da stgaffir novas plazzas da lavur e da crear bunas cundiziuns per start-ups da la branscha da mobilitad.

Sut quest aspect vulan las sutsegnadras ed ils sutsegnaders savair il suandant da la Regenza:

  1. Co giuditgescha la Regenza l'installaziun d'in center da cumpetenzas per la mobilitad en il chantun Grischun?
  2. Co persequitescha la Regenza ils svilups internaziunals en il sectur da la mobilitad?
  3. Duess il chantun Grischun promover activamain la perscrutaziun da la tecnologia da hyperloop u d'autras tecnologias da mobilitad innovativas?

Cuira, ils 15 da favrer 2023

Collenberg, Luzio, Haltiner, Bachmann, Berther, Bisculm Jörg, Brandenburger, Brunold, Bundi, Della Cà, Derungs, Epp, Feuerstein, Furger, Messmer-Blumer, Michael (Donat), Rettich, Righetti, Sax, Schneider, Spagnolatti, Tomaschett, Zanetti (Sent)

Resposta da la regenza

La Regenza è conscienta da l'impurtanza da la mobilitad per il Grischun. La mobilitad è in factur economic impurtant. L'augment da l'attractivitad dal traffic public è in ele­ment essenzial dals puncts centrals da svilup dal Program da la Regenza 2021–2024 (cf. missiva carnet nr. 8/2019–2020, p. 460 ss.), dal Plan directiv chantunal revedì sco er dal project chantunal «Plan d'acziun Green Deal» (AGD). Dapi l'onn 2016 vegnan las infrastructuras da viafier finanziadas en emprima lingia tras la Confedera­ziun sur l'uschenumnà fond per l'infrastructura da viafier (FIV) en il rom dals «Pro­grams da svilup strategics da las infrastructuras da viafier» (PROSSIV 2025 ss.). Bain n'è la tecnologia da roda e rodaglia da la viafier betg nova, ma grazia a divers avantatgs dal sistem – sco in pitschen consum d'energia, grondas capacitads (fin 1200 plazzas da seser per tren), autas sveltezzas (fin 350 km/h en il manaschi regu­lar) ed ina gronda segirezza – è ella anc adina moderna.

Tar la dumonda 1: La mobilitad ha ina gronda impurtanza per la societad d'ozendi en quai che reguarda l'abitar, il turissem, la lavur e cunzunt las activitads da temp liber, ed ella è suttamessa a midadas permanentas. Blera glieud na viagia betg pli mo cun in unic med da transport, mabain cumbinescha ils avantatgs da las differentas furmas da mobilitad. Plinavant exista ina tendenza da parter ils meds da transport (sharing economy). Las furmas da mobilitad èn oz uschè eterogenas sco ils basegns da las persunas mobilas sezzas. La mobilitad da damaun represchenta la libertad da sa mover en differents secturs da la vita ed è caracterisada d'in augment permanent da la dumonda. Pervia dal svilup ch'è da spetgar, ha il chantun Grischun gia stgaffì il sectur «Center da cumpetenza per la mobilitad coordinada» tar l'Uffizi d'energia e da traffic (UEnTr). Il center da cumpetenza porscha cussegliaziuns per interpresas, per vischnancas sco er per projectadras e projectaders. La cussegliaziun cumpiglia tran­ter auter la cumbinaziun da differentas furmas da mobilitad e tegna quint da talas en las planisaziuns.

Tar la dumonda 2: Tant la Regenza sco er l'administraziun chantunala accumpognan las tendenzas ed ils svilups internaziunals da la mobilitad e concepeschan il program da la Regenza tenor ils basegns respectivs. Sch'ins observa quests svilups, stoi den­tant vegnir resguardà che structuras urbanas na pon betg vegnir cumparegliadas directamain cun las structuras en il chantun Grischun. Savens èn ils svilups con­cepids per las relaziuns da las citads e na pon betg simplamain vegnir transferids sin il chantun Grischun. Per il traffic public ha il chantun dentant lantschà il project «Venda» – in sistem da bigliets ch'è cumplainamain digital e che na dovra nagins daners contants. Vegnì inspirà è quest sistem da la «Oyster Card», la carta da suc­cess da Londra. L'utilisaziun dal traffic public vegn uschia simplifitgada per las passa­gieras ed ils passagiers.

Tar la dumonda 3: La viafier da suspensiun magnetica da hyperloop en bischens a vacum è anc en ina fasa da svilup tempriva. Actualmain exista mo in traject da test fitg curt en il desert dal stadi federal Nevada (USA). Ils custs d'investiziun na pon anc betg vegnir stimads. Plinavant han ils «hyperloop pods» mo plazza per 28 viagiaturas e viagiaturs. Per quest intent fissan las capacitads da bischens a dus vials memia pitschnas. Per il project sumegliant «Swissmetro 1999» (capslas a 200 plazzas) èn gia vegnids fatgs numerus scleriments. Quels mussan ch'in sistem cun bischens a vacum cuntegna blers problems tecnics ed è fitg char. Ina viafier da suspensiun ma­gnetica na vegn dentant er betg considerada sco med da transport per la colliaziun cun il Grischun, perquai ch'i resultass ina ruptura dals sistems e perquai che las colliaziuns cun la Svizra e cun l'exteriur na fissan betg pussaivlas senza stuair midar med da transport. Tenor il studi dal martgà europeic 2006 per il sistem Swissmetro da la Scola politecnica federala Turitg pon temps da viadi vegnir reducids tut en tut pir a partir d'ina distanza da passa 200 km. Sin basa dals motivs numnads qua sur­vart na vesa la Regenza nagin basegn da promover la perscrutaziun da la tecnologia da hyperloop. Sche autras tecnologias da mobilitad porschan dentant ina schanza per sviluppar vinavant il traffic public en il Grischun, vegn il chantun a nizzegiar las schanzas correspundentas. A curta ed a media vista sto vegnir promovida en em­pri­ma lingia la realisaziun da las planisaziuns naziunalas PROSSIV 2025 resp. 2035 sco er Perspectiva Viafier 2050 / Crusch federala da la mobilitad.

28 d'avrigl 2023