Navigation

Inhaltsbereich

Incumbensa Ratti concernent la vendita da la plazza aviatica da Samedan

Sessiun: 27.08.2009
La fin da l'onn 2003 ha la regenza dal chantun Grischun acquistà da la confederaziun svizra las immobiglias ed ils edifizis da la plazza aviatica da Samedan. En il contract da dretg da construcziun, d'utilisaziun e da gestiun è la gestiunaria da la plazza aviatica, la Plazza aviatica Engiadina SA, vegnida obligada da far tut las lavurs da mantegniment necessarias sco er investiziuns en la dimensiun dad 8 fin 10 milliuns francs per renovar e per amplifitgar ils edifizis ed ils stabiliments. Perquai che la regenza ha concludì da vender la plazza aviatica a vista mesauna a la gestiunaria Plazza aviatica Engiadina SA, ha quella da sia vart survegnì in dretg da precumpra per ina durada da 25 onns. I po vegnir constatà che la gestiunaria ademplescha sia incumbensa en moda cumpetenta e confurma al contract. En il fratemp dat la Plazza aviatica Engiadina SA lavur a passa 100 collavuraturas e collavuraturs.

La plazza aviatica da Samedan è da gronda impurtanza per l'Engiadina e per il chantun Grischun. Ella è en spezial ina da las basas per la gronda valurisaziun che resulta dal turissem sco sectur economic impurtant.

La regenza vegn supplitgada d'examinar tut las pussaivladads per chattar la soluziun la meglra pussaivla per mantegnair e per garantir a lunga vista il manaschi aviatic a Samedan. En quest connex sto er vegnir examinà, sche la gestiun sco er sche las investiziuns per ils indrizs d'infrastructura ch'èn necessaris per il manaschi aviatic pon vegnir regladas sin basa da contracts da dretg da construcziun, da fittanza e da gestiun, e quai cun integrar l'investur, la vischnanca da staziunament e la regiun empè da vender l'implant ad ina societad privata. Nus engraziain la regenza per sias stentas ch'ella ha fatg enfin ussa e sperain ch'il resultat da questa examinaziun saja bainprest ina soluziun che cuntenta tut las parts participadas.

Cuira, ils 27 d'avust 2009

Ratti, Bezzola (Samedan), Arquint, Bezzola (Zernez), Bleiker, Bondolfi, Brandenburger, Brüesch, Buchli, Campell, Castelberg-Fleischhauer, Casty, Caviezel-Sutter (Tusaun), Christoffel-Casty, Conrad, Frigg-Walt, Gartmann-Albin, Giovanoli, Hardegger, Jäger, Jeker, Jenny, Mani-Heldstab, Märchy-Michel, Meyer Persili (Cuira), Meyer-Grass (Claustar Vitg), Michel, Montalta, Nigg, Noi-Togni, Pedrini (Roveredo), Peer, Perl, Peyer, Pfenninger, Pfiffner-Bearth, Ragettli, Stiffler, Stoffel, Thöny, Thurner-Steier, Trepp, Tscholl, Vetsch (Pragg-Jenaz), Clalüna, Furrer-Cabalzar, Gunzinger, Jecklin-Jegen, Locher Benguerel, Mainetti

Resposta da la regenza

La plazza aviatica regiunala da Samedan sco plazza aviatica la pli auta da l'Europa è in indriz d'infrastructura impurtant per l'Engiadin'ota cun sia orientaziun fermamain turistica. Or d'interess regiunal sco er chantunal vali pia da mantegnair – ad ina vista uschè lunga sco pussaivel – quest avantatg dal lieu essenzial visavi autras destinaziuns d'enviern cumparegliablas.

L'Engadin Airport SA ch'è vegnida en agid, suenter che l'anteriura gestiunaria da la plazza aviatica ha fatg naufragi, ha enconuschentamain fatg – suenter ch'ella ha surpiglià questa immobiglia chantunala l'onn 2004 sin basa d'in contract da dretg da construcziun, d'utilisaziun e da gestiun da 40 onns, suenter ch'ella ha pudì fundar in dretg da precumpra da 25 onns e suenter ch'ella ha survegnì la garanzia d'in transferiment da la proprietad cun limitaziun temporara – las investiziuns ch'èn vegnidas pretendidas tenor contract en la dimensiun da circa 10 milliuns francs ed ha procurà per in manaschi regular sin la plazza aviatica da Samedan en il rom da la concessiun valaivla. Er per l'avegnir ha la gestiunaria da la plazza aviatica l'intenziun d'investir en l'infrastructura da la plazza aviatica e mussa uschia ses interess vi d'in svilup duraivel da la plazza aviatica regiunala.

Suenter che l'Engadin Airport SA ha preschentà l'onn 2007 ina dumonda da cumpra al chantun en connex cun ses plans d'in engrondiment cumplessiv da la plazza aviatica, n'ha la regenza – en vista a las investiziuns preliminaras ch'èn vegnidas fatgas da la gestiunaria da la plazza aviatica ed en vista al manaschi confurm a la concessiun – gì nagin motiv da sa distanziar da sia garanzia ch'ella aveva dà en consentiment cun il circul da l'Engiadin'ota e cun la vischnanca da staziunament e da trumpar la confidenza ch'era vegnida stgaffida. Cun il conclus dals 11 da december 2007 ha la regenza approvà – cun diversas cundiziuns e pretensiuns – da princip ina vendita da l'areal da la plazza aviatica a l'Engadin Airport SA ed ha dà l'incumbensa d'elavurar ils documents da contract necessaris.

En connex cun questa fatschenta, ch'è impurtanta per la regiun, è la regenza stada ed è conscienta da sia responsabladad per l'economia regiunala. Pervia da quai na relaschass ella quest indriz d'infrastructura d'impurtanza regiunala betg senza garanzia contractuala en la proprietad d'ina interpresa privata. En quest senn èn previs ils instruments da segirezza correspundents che permettan al chantun da mantegnair ses interess resp. ils interess da l'Engiadin'ota en cas che la plazza aviatica vegniss vendida vinavant, en cas ch'il manaschi aviatic vegniss sistì u en cas ch'i dess ina midada da l'intent u ina midada essenziala da las relaziuns da participaziun.

En spezial pervia da las ordinaziuns che n'èn betg anc vegnidas prendidas da l'uffizi federal d'aviatica civila (realisaziun da las disposiziuns da la ICAO sin la plazza aviatica da Samedan sco er la determinaziun dal sistem per la segirezza da sgol futur) e ch'èn centralas per la segirezza da planisaziun e d'investiziun da l'Engadin Airport SA vegnan – en il rom da las tractativas contractualas actualas – examinadas seriusamain da tuttas duas partidas da contract – ultra d'in transferiment da proprietad – tranter auter er ina cuntinuaziun resp. in'adattaziun da la relaziun en dretg da construcziun da fin ussa sco er construcziuns economicamain maschadadas en ina cuminanza da public private partnership (PPP). Tranter las cundiziuns generalas che pon vegnir spetgadas en il futur duai uschia pudair vegnir chattada quella soluziun ch'è la finala la pli raschunaivla per mantegnair la plazza aviatica, e quai tant per il maun public sco er per la gestiunaria da la plazza aviatica.

En vista a la malsegirezza che crescha tar tut las parts participadas pervia da la lunga durada da las tractativas sa stenta la regenza da manar questa fatschenta uschè svelt sco pussaivel ad ina fin positiva.

La regenza è pia senz'auter pronta d'examinar tut las soluziuns contractualas pussaivlas ch'èn admessas da la lescha e ch'èn materialmain adequatas e d'acceptar correspundentamain l'incumbensa. Cun l'assegnaziun da l'intervenziun na sa mida dentant nagut vi da la cumpetenza da la regenza da defender ils interess dal chantun en moda giuridicamain lianta.

5 da november 2009