Navigation

Inhaltsbereich

Interpellaziun concernent la software per decleraziuns da taglia sin DC-ROM

Sessiun: 02.06.2000
En il temp dad oz sa derasa il computer persunal pli e pli er sin il sectur privat. Quest svilup duess vegnir utilisà tar in'occupaziun che na giauda betg gist gronda simpatia, numnadamain tar l'emplenir or la decleraziun da taglia.
Differents chantuns (ZH, SG, TG, BS, BL, e.u.v.) han dà als pajataglias la pussaivladad d'emplenir or la decleraziun da taglia cun agid d'ina software da decleraziun che vegn consegnada sin in DC-ROM. Uschia na vegn betg mo simplifitgada la lavur als pajataglias. Er per las autoritads da taglia resultan simplificaziuns essenzialas, damai che las decleraziuns da taglia vegnan inoltradas en ina meglra qualitad ed èn pli legiblas.
È la regenza pronta da metter a disposiziun ina software per emplenir or la decleraziun da taglia als pajataglias davent dal cumenzament da la valitaziun actuala?

Cuira, ils 2 da zercladur 2000

Namen: Schmid (Spleia), Juon, Loepfe, Ambühl, Bär, Bischoff, Cathomas, Catrina, Cavegn, Caviezel, Demarmels, Donatsch, Federspiel, Feltscher, Geisseler, Hartmann, Hess, Jeker, Kehl, Keller, Kessler, Lardi, Lemm, Marti, Meyer, Pleisch, Portner, Quinter, Rizzi, Robustelli, Roffler, Schmid (Sedrun), Stiffler, Suenderhauf, Telli, Thöny, Tremp, Tuor (Trun), Vetsch, Walther, Wettstein, Zarro, Zegg

Session: 02.06.2000
Vorstoss: rg Interpellation

Resposta da la regenza

La midada a la valitaziun actuala ha tranter auter per consequenza ch'ils pajataglias ston emplenir or ed inoltrar mintg'onn ina decleraziun da taglia. La regenza ha l'intenziun da simplifitgar quest'activitad tant sco pussaivel. Questa finamira po vegnir cuntanschida tranter auter cun metter a disposiziun gratuitamain als pajataglias ina software da decleraziun sin DC-ROM u sur l'internet.
Cun consegnar ina software da decleraziun als pajataglias ademplescha il chantun ina incumbensa publica. El metta a disposiziun ils formulars da taglia en ina moda nova e moderna. Questa soluziun duai dentant vegnir applitgada be per il diever privat. Ina soluziun cumplessiva per ils cussegliaders da taglia che po vegnir applitgada per mandants e che cumpiglia plirs chantuns duai vegnir surlaschada vinavant a l'economia privata. Uschia po tenor l'opiniun da la regenza vegnir chattada ina soluziun equilibrada tranter in depurtament che s'orientescha a la clientella e l'economia libra.
Per acquistar la software da decleraziun èn d'observar las prescripziuns dal dretg da submissiun. La regenza parta il mument dal fatg che la procedura d'invit possia vegnir elegida.
Cun la software da decleraziun na duain betg sulettamainvegnir cuntanschidas simplificaziuns per ils pajataglias. I po er vegnir cuntanschida ina meglra qualitad da las decleraziuns da taglia, damai ch'ellas èn pli legiblas e simplifitgeschan l'elavuraziun electronica a moda essenziala. Sin fundament dals motivs menziunads è la regenza pronta da metter a disposiziun gratuitamain ina software da decleraziun als pajataglias davent da la decleraziun da taglia per l'onn calendar 2001.

Cuira, 16 d'avust 2000