Dumonda en scrit concernent la reducziun da las premias per assicurads en relaziuns economicas modestas
Sessiun: 04.10.2000
Tenor la lescha federala d'assicuranza da malsauns (LAM) concedan ils chantuns contribuziuns per reducir las premias als assicurads en relaziuns economicas modestas. Las reducziuns da las premias èn da fixar uschia che las contribuziuns annualas da la confederaziun e dals chantuns vegnan sbursadas da princip cumplainamain tenor l'art. 66 LAM. Ils chantuns procuran ultra da quai da pajar la reducziun da la premia uschia che las persunas cun dretg da pretensiun na ston betg ademplir a quint lur obligaziun da pajar las premias.
Tenor la legislaziun chantunala (LARP) èn decisivas las entradas suttamessas a la taglia e 10% da la facultad suttamessa a la taglia (facturs da taglia) tenor la taxaziun chantunala da l'onn precedent. La regenza fixescha resguardond l'art. 8 LARP ina resalva persunala en pertschient da las entradas suttamessas a la taglia inclusiv 10% da la facultad suttamessa a la taglia. Ella ha fixà las resalvas persunalas a basa da las dumondas inoltradas e tenor ils meds disponibels.
Las disposiziuns per l'onn 2000 èn vegnidas relaschadas e dattan uss da discussiunar concernent la quota da la resalva persunala. Fin ad entradas suttamessas a la taglia da fr. 10'000. è vegnida fixada ina quota da resalva persunala da 5,2%. L'onn passà è vegnida fixada per las medemas entradas ina quota da 4,4%. Tenor experientscha èn numerusas persunas cun entradas suttamessas a la taglia fin a fr. 20'000. retschaviders d'agid social. Da quels vegn pretendì ina resalva persunala cun il sistem tschernì. Quai na fa betg senn ord vista da la politica sociala e finanziala.
La regenza vegn supplitgada da respunder las sequentas dumondas:
1. È la regenza conscienta da la problematica menziunada?
2. Ha la regenza gia ina idea co ch'ella vul tractar ils retschaviders d'agid social en connex cun la valitaziun da la resalva persunala?
3. Tenor tge ponderaziuns fixescha la regenza mintgamai las quotas da la resalva persunala?
Cuira, ils 4 d'october 2000
Namen: Schütz
Session: 04.10.2000
Vorstoss: rg SchriftlicheAnfrage
Resposta da la regenza
La regenza respunda las dumondas sco suonda:
1. La regenza è conscienta dal fatg ch'il sistem actual da reducir las premias pretenda ina resalva persunala da las retschavidras e dals retschaviders d'agid social. En quest connex èsi da dir che la lescha davart l'assicuranza da malsauns e la reducziun da las premias (LARP), en concordanza cun la lescha federala davart l'assicuranza da malsauns (LAM), na prevesa betg da finanziar cumplettamain las premias da las cassas da malsauns or dals meds da la reducziun da las premias. Tras la reducziun da las premias vul ins plitost garantir a las persunas che vivan en relaziuns economicas modestas e ch'han il dretg da contribuziuns ina protecziun commensurada d'assicuranza a cundiziuns finanzialmain supportablas.
Il sistem da la reducziun da las premias è concepì a moda sociala. La resalva persunala ch'ins pretenda da las persunas assicuradas è dependenta da las entradas e da la facultad suttamessas a la taglia. Analog a la grevezza fiscala s'augmenta la resalva persunala da las premias a moda surproporziunala sche las entradas taxablas creschan. Ina resalva persunala resulta pia sulettamain, sch'in tegnairchasa dispona dad entradas e/u facultad suttamessas a la taglia. La resalva persunala da las premias na dependa betg da la grondezza dal tegnairchasa, quai che distgargia surtut las famiglias. Tar tegnairchasas cun entradas imputablas da circa fr. 30'000.- vegn mo ina persuna creschida a stuair pajar ina resalva persunala parziala. Per tut tschellas persunas vegn la premia subvenziunada dal tuttafatg. Finalmain vulain nus anc render attent al fatg che las categorias cun las entradas las pli bassas han profità il pli fitg da la midada da sistem dal 1996 che ha remplazzà la reducziun generala da las premias cun quella individuala, e quai sin donn e cust da las persunas ch'èn economicamain situadas meglier.
2. En il rom da las lavurs per la revisiun parziala da la LARP ch'è necessaria sin fundament da la revisiun parziala da la LAM examinescha la regenza differentas pussaivladads d'adattar il sistem. En quest connex è er d'examinar la dumonda, sch'ins vul en il futur dispensar da la resalva persunala ils retschaviders d'agid social sco er las persunas che vivan sut la limita da la paupradad. Quai fiss oravant tut in levgiament per las vischnancas. Per evitar in spustament da las grevezzas da las vischnancas al chantun, stuessan vegnir prendidas mesiras da correctura correspundentas tar la gulivaziun da las grevezzas per prestaziuns socialas. Il sistem da la reducziun da las premias na dastga en mintga cas betg vegnir giuditgà a moda isolada or dal puntg da vista dals retschaviders d'agid social.
3. La LARP prescriva che las tariffas da la resalva persunala èn da graduar tenor las categorias d'entradas. Sche las entradas creschan, s'augmenta er la tariffa da la resalva persunala. Tenor l'art 7 da las disposiziuns executivas da la regenza tar la LARP ston las resalvas persunalas s'orientar tenor la tariffa da la taglia chantunala sin las entradas per persunas maridadas. Uschia vegn res-guardada l'idea, tenor la quala la productivitad economica d'in tegnairchasa crescha a moda surproporziunala al mument d'in augment da las entradas. Questa graduaziun da las tariffas da las resalvas persunalas duai a medem mument sustegnair pli fitg las persunas en relaziuns economicas flaivlas. L'autezza concreta da las tariffas da las resalvas persunalas per categoria d'entradas e per onn dependa mintgamai dal dumber da las dumondas entradas sco er da las premias directivas d'ina vart, da l'autra vart dals meds finanzials che stattan a disposiziun.
Cuira, ils 4 d'october 2000