Las votantas ed ils votants grischuns han refusà ils 24 da settember 2000 il credit impegnativ da 7 milliuns francs svizzers en favur dal campiunadi mundial da skis 2003 a San Murezzan cun 50.9 % vuschs negativas. Quai mussa ch'i n'è betg reussì dal tuttafatg als organisaturs da l'Engiadin'ota ed al comité da votaziun da far valair il niz d'in campiunadi mundial da skis alpins per l'entir chantun Grischun e d'eliminar las resalvas per motivs dal patratgar interchantunal da concurrenza. Ina giada dapli èsi sa confermà che la tematica d'occurrenzas da sport sto vegnir communitgada cun fitg grond quità. Las differentas stentas da spargn dal chantun ch'han stuì vegnir fatgas sin differents plauns per cuntanscher l'equiliber da finanzas, vegnan probablamain er ad avair contribuì al fatg che las votantas ed ils votants han prendì ina posiziun negativa envers il credit.
La regenza è da l'avis che la cumulaziun da differents motivs ha manà a quest resultat da la votaziun e che quel na po betg vegnir interpretà en quel senn, ch'il pievel grischun refuseschia da princip occurrenzas grondas da sport. La circumstanza ch'il suveran refusescha in project ch'è vegnì sustegnì dal parlament cun 102 a 0 vuschs, è in motiv suffizient per la regenza d'analisar da radent il depurtament da las votantas e dals votants. Per quest intent ha ella surdà ina incarica correspundenta ad in institut demoscopic. Ils resultats da l'analisa vegnan ad esser avant maun probablamain il december 2000.
A la regenza para anc adina intacta la schanza d'ina candidatura als gieus olimpics d'enviern 2010 Turitg / Grischun / Sviz. D'ina vart giuditgescha ella sco fitg bun, fundà e cumpetitiv il dossier da candidatura per la fasa da candidatura naziunala che vegn inoltrà ils 2 da november 2000 a l'associaziun olimpica svizra e da l'autra vart ha la candidatura Turitg / Grischun / Sviz ina ferma basa politica ed economica grazia a la participaziun concludida en il fratemp dals chantuns Sviz e Turitg e da la citad leader Turitg. La participaziun da Turitg permetta da tegnair quint meglier dals interess ecologics. La regenza è da l'avis che las votantas ed ils votants grischuns sa laschan persvader, en la probabla votaziun dal pievel successiva per ils gieus olimpics, cun in bun dossier equilibrà e che fa grondas pretaisas envers la persistenza e la protecziun da l'ambient, per l'Olimpiada, sch'igl ha lieu in process intensiv e vast per furmar l'opiniun e sch'ils avantatgs e dischavantatgs d'ina candidatura pon vegnir preschentads a moda objectiva.
L'interrupziun dal project uss tras la regenza grischuna na vegniss betg chapida tant dals partenaris d'ordaifer il chantun sco er betg dal chantun Turitg, il chantun Sviz, la citad da Turitg, las vischnancas da Nossadunnaun e da Kloten, l'associaziun olimpica svizra u las differentas federaziuns da sport sco er betg da las vischnancas grischunas pertutgadas, suenter che las lavurs èn progredidas uschè fitg e che tut las decisiuns dals partenaris spezialmain quellas da la citad e dal chantun da Turitg èn vegnidas tratgas en senn positiv. La regenza è pia pronta d'inoltrar il dossier da candidatura ils 2 da november 2000 a l'associaziun olimpica svizra e da s'engaschar per ina decisiun positiva tras il parlament svizzer da sport dals 17 da schaner 2001. Sin fundament da questas explicaziuns propona la regenza da refusar il postulat.


Cuira, ils 4 d'october 2000