Navigation

Inhaltsbereich

Postulat concernent l'examinaziun da la finanziaziun dals servetschs da la tgira a chasa (spitex)

Sessiun: 04.10.2000
Cun la revisiun parziala da la lescha davart promover la tgira da malsauns (lescha da la tgira da malsauns) ch'ils votants dal Grischun han acceptà ils 3 da mars 1991 èn vegnidas creadas las premissas legalas e finanzialas per sviluppar ils servetschs da la tgira e l'assistenza a chasa (sectur da spitex).
Cun la revisiun parziala da la lescha da la tgira da malsauns dals 28 da settember 1997 han ins introducì il sistem da la garanzia da deficit. Uschia han ins realisà in'adattaziun al sistem da finanziaziun da las chasas da vegls e da tgira.
Cun la cumpensaziun dals deficits che vegn pratitgada oz n'existan ni per ils pazients, ils furniturs da prestaziuns, las cassas da malsauns ni per il maun public quellas structuras da finanziaziun da l'economia dal martgà che garantissan in diever uschè economic sco pussaivel dals meds finanzials.
Cun la revisiun parziala da la lescha da la tgira da malsauns en occasiun da la sessiun d'october 2000 han ins concludì in nov sistem da finanziaziun per il sectur staziunar da pazients stabels. Tar questa revisiun parziala han ins en numerus secturs mess a pèr ils servetschs da la tgira a chasa (spitex) al sectur staziunar da pazients stabels. Tar questa revisiun han ins desistì sapientivamain d'includer er la finanziaziun dal sectur da spitex. Tras quai fiss la soluziun da la finanziaziun da las chasas stada inutila e fiss er vegnida retardada considerablamain. Consequentamain ston ins uss realisar spert il proxim pass numnadamain quel d'examinar la finanziaziun dal sectur da spitex.
Tenor l'art. 31 da la lescha da la tgira da malsauns èn ils servetschs da la tgira e l'assistenza a chasa ina incumbensa da las vischnancas. Tras la professiunalisaziun da las organisaziuns, la pretaisa da qualitad pli auta sco er las relaschadas or dals ospitals e las clinicas che succedan tendenzialmain pli baud, s'augmentan las sutgaranzias da las organisaziuns da spitex e cun quai la grevezza per il chantun e las vischnancas.
Ils differents sistems da finanziaziun actuals tranter il sectur staziunar da pazients stabels ed il sectur da spitex creeschan premissas inegualas. Ultra da quai vegn cumplitgada la realisaziun da divers projects ch'èn per exempel vegnids inizialisads en il rapport davart il svilup dals custs sin il sectur da sanadad dal chantun Grischun.
La pretaisa giustifitgada, ch'i saja da renunziar a considerar ils fatgs da sanadad tenor secziuns e ch'ins duai resguardar il sistem da provediment sin il sectur da la sanadad sco sistem cumplessiv, premetta er in'adattaziun dals sistems da finanziaziun.En quest senn vegn la regenza dumandada d'examinar la finanziaziun per ils servetschs da la tgira e l'assistenza a chasa (sectur da spitex).

Cuira, ils 4 d'october 2000


Namen: Nick, Hardegger, Bucher, Arquint, Augustin, Bachmann, Bär, Battaglia, Beck, Berther (Mustér), Berther (Sedrun), Bischoff, Bühler, Büsser, Casanova (Cuira), Casanova (Vignogn), Catrina, Cavegn, Caviezel, Christ, Christoffel, Claus, Crapp, Dalbert, Farrér, Federspiel, Feltscher, Frigg, Giacometti, Giuliani, Hanimann, Hübscher, Jäger, Joos, Juon, Keller, Koch, Lardi, Locher, Loepfe, Luzio, Maissen, Märchy, Parolini, Patt, Pfiffner, Portner, Rizzi, Robustelli, Roffler, Sax, Scharplatz, Schmid (Spleia), Schmid (Val S. Pieder), Schütz, Stiffler, Suenderhauf, Suter, Tramér, Tremp, Trepp, Tscholl, Tuor, Valsecchi, Vetsch, Wettstein, Zarro, Zegg, Zindel, Kollegger, Bezzola, Martschitsch

Session: 04.10.2000
Vorstoss: rg Postulat

Resposta da la regenza

Tenor l'art. 31 da la lescha davart promover la tgira da malsauns (lescha da la tgira da malsauns) è il sectur da la tgira e l'assistenza a chasa ina incumbensa da las vischnancas. Tenor questa disposiziun han quellas da procurar per ina purschida suffizienta da servetschs da tgira e d'assistenza a chasa.
Il chantun conceda a las instituziuns ch'el renconuscha sco instituziuns cun dretg da contribuziun per la tgira e l'assistenza a chasa contribuziuns annualas en l'autezza da 50 pertschient dal deficit dal quint da gestiun pli stretg. Las vischnancas ed ils purtaders han da surpigliar per lur instituziuns communalas e regiunalas il deficit dal quint total che resta suenter la deducziun da las contribuziuns chantunalas.
Cun la cumpensaziun pratitgada oz dals deficits dals ospitals publics, da las clinicas psichiatricas, da las chasas da tgira e dals servetschs da spitex n'existan ni per ils pazients, ils furniturs da prestaziuns, las cassas da malsauns ni per il maun public quellas structuras da finanziaziun da l'economia dal martgà che garanteschan in diever raziunal ed adequat dals meds finanzials. En il rapport davart il program da la regenza per ils onns 2001-2004 ha la regenza perquai fixà la finamira d'introducir ina finanziaziun attractiva dals ospitals, da las chasas da tgira e dals servetschs da spitex.
En il sectur da las chasas da vegls e da tgira ha il cussegl grond concludì durant la sessiun d'october in nov model da finanziaziun che correspunda a questa finamira.
Sin il sectur dals ospitals elavura da preschent ina gruppa da lavur, incumbensada dal departament da giustia, polizia e sanitad, in nov model da finanziaziun.
En il senn da la finamira surmenziunada ston ins er sviluppar ina nova furma da finanziaziun per il sectur da spitex. En il rom da las lavurs correspundentas èsi d'examinar, quant enavant ch'ils puncts da chantun dal nov model da finanziaziun ch'è vegnì concludì per il sectur staziunar da pazients stabels sa laschan er transferir sin il sectur da spitex.
A basa da las explicaziuns surmenziunadas sa declera la regenza pronta d'acceptar il postulat.


Cuira, ils 4 d'october 2000