Postulat concernent la recepziun da novs uffizis da pilot GRiforma
Sessiun: 28.11.2000
Sin fundament da las experientschas da fin uss e tenor l'avis da la CdG na po il cussegl grond strusch influenzar las finamiras e prestaziuns surordinadas dals uffizis da pilot GRiforma tras ils preventivs globals. Er las finanzas sa laschan diriger tras il cussegl grond be a moda limitada e generala. En il project na pon ins oz anc strusch mesirar las finamiras; la colliaziun tranter las prestaziuns e las finanzas na sa lascha quasi betg anc distinguer. Perquai èsi difficil per il cussegl grond da midar a curta vista per exempel las prescripziuns finanzialas, damai ch'el sa memia pauc davart las consequenzas sin las prestaziuns - e viceversa. Sch'il cussegl grond vul adattar oz las prestaziuns cun ina intervenziun, alura sa retarda, tenor il sistem existent, la realisaziun da quellas.
Ils tschintg uffizis da pilot da fin uss èn vegnids integrads en il project GRiforma senza in'examinaziun pli detagliada da las incumbensas e da l'effizienza. La basa per il preventiv global han furmà l'adempliment da las incumbensas da fin uss e las relaziuns finanzialas cun las eventualas reservas ed insuffizienzas existentas. Tenor l'avis da la CdG fissi raschunaivel d'examinar ordavant ils uffizis ch'èn da recepir da nov en il project.
En il program da la regenza 2001 - 2004 ha il cussegl grond declerà ch'el sustegnia la regenza ad amplifitgar il project GRiforma. Tenor l'avis da la CdG stuess ins iniziar quest pass cun quità. Igl è da far diever da la schanza che l'experiment porscha, per far in test da las pussaivladads da prender influenza ch'il cussegl grond ha en il dialog cun la regenza. Sin fundament da questas enconuschientschas propona la CdG las suandantas novaziuns:
Per ils uffizis da pilot che vegnan recepids da nov en il project GRiforma supplitgescha il cussegl grond la regenza:
- d'examinar ordavant il cuntegn e la dimensiun da lur incumbensas, la furniziun da lur prestaziuns e lur structura directiva areguard effizienza ed efficacitad;
- da preschentar al cussegl grond per la discussiun las finamiras e las incaricas da prestaziun surordinadas, avant che fixar l'emprima giada ils preventivs globals respectivs;
- da resguardar ina colliaziun transparenta tranter las prestaziuns e las prescripziuns finanzialas.
Cuira, ils 28 da november 2000
Namen: Möhr (CdG)
Session: 28.11.2000
Vorstoss: rg Postulat
Resposta da la regenza
1. La regenza è da la medema opiniun sco la CdG ch'il cussegl grond na possia anc betg prender l'influenza vulida dal project GRiforma en la dimensiun giavischada. La direcziun politica na funcziuna anc betg dal tuttafatg en il nov project. Dapi l'entschatta suonda il project ina via pragmatica; elements essenzials sco incaricas da prestaziun e preventivs globals èn vegnids concepids dals uffizis da pilot (bottom up). Ils novs instruments directivs da manaschi han adina dapli effect, il niz suonda successivamain. Er per la direcziun politica han ins tschernì fin uss ina via pragmatica. GRiforma ha fatg diever da las proceduras existentas per la budgetaziun ed il rendaquint e l'influenza parlamentara vegniva fatga cun l'organisaziun existenta u cun paucs respectivmain novs instruments adattads. La regenza renconuscha che la refurma administrativa sa mida pli e pli ad ina furma da direcziun dal stadi. Il focus sa sposta dal plaun da manaschi al plaun politic. L'ulteriur andament dal project vegn a s'orientar tenor questa direcziun.
2. L'extensiun dal project succeda a la moda e maniera accurata sco giavischada da la CdG. Uschia vegnan integrads actualmain mo dus ulteriurs uffizis en il project GRiforma. Tar l'uffizi da stimaziun e tar il CFCA Plantahof duain vegnir rendidas transparentas e pia accessiblas per ina examinaziun las incumbensas, resursas e structuras cun ils instruments da GRiforma. Qua èn insumma vegnidas cumbinadas midadas futuras cun il project GRiforma per duvrar sinergias e per disponer d'ina basa pli vasta per la procedura da novaziun. Correspundentamain a la decleraziun dal cussegl grond pertutgant il program annual 2001 n'è betg planisada in'ulteriura extensiun dal project fin a l'existenza dal rapport GRiforma 2002.
3. La regenza è da l'opiniun che gist la procedura GRiforma saja ina pussaivladad zunt attractiva per examinar la furniziun da prestaziuns d'in uffizi a moda correspundenta al stgalim. La paletta da products, las finamiras da prestaziun e d'effect sco er la cumbinaziun cun ils custs e retgavs creeschan exactamain la transparenza necessaria per quest intent. La concepziun da la meglra structura directiva ch'è pussaivla e l'optimaziun da las proceduras per furnir las prestaziuns duain suandar. La regenza vuless perquai tscherner il project GRiforma per l'uffizi da stimaziun ed il CFCA Plantahof e desister d'ina examinaziun preliminara da l'organisaziun. La modalitad per integrar ulteriurs uffizis duai perencunter sa basar sin las experientschas dal manaschi d'experiment. Dal giavisch da la CdG d'examinar ordavant las incumbensas, la furniziun da prestaziuns e la structura directiva, duai vegnir tegnì quint uschenavant che quai è pussaivel e raschunaivel.
4. Da princip vegnan las finamiras surordinadas deducidas da la legislaziun ed èn pia vegnidas discutadas politicamain e fixadas democraticamain. Spezialmain là, nua ch'igl existan largias sin il plaun legislativ, è giustifitgà il giavisch da la CdG da discutar las finamiras. La pussaivladad da far quai exista oz a chaschun da la discussiun dal preventiv cun las duas variantas da budget, nua che las finamiras pon vegnir examinadas directamain u indirectamain mintg'onn. La proposta da la CdG correspundass, almain l'emprima giada, ad ina midada da sistem vers ina budgetaziun en dus pass, in fatg che lascha anc avertas dumondas da la politica statala ed eventualmain er giuridicas. La regenza è gugent pronta d'examinar l'idea en connex cun la discussiun davart la nova partiziun da las rollas.
5. La regenza accepta il giavisch da la CdG da resguardar ina colliaziun transparenta tranter las prestaziuns e las prescripziuns finanzialas. Quai correspunda ad ina finamira centrala da GRiforma; ins emprova da cuntanscher in'ulteriura meglieraziun. Ina relaziun "matematicamain equilibrada" tranter ils effects, las prestaziuns ed il diever dals meds na vegni dentant mai a dar; quai vul dir, i na vegnan betg ad esser pussaivlas decisiuns dal gener: 20% damain effect e 10% damain prestaziun dattan 30% damain custs.
6. La regenza è pronta d'acceptar il postulat en il senn da questas explicaziuns.
Cuira, ils 28 da november 2000