Dumonda en scrit concernent il tractament reservà als petents per ina reducziun da las premias da la cassa da malsauns e l'infurmaziun respectiva en scrit da la populaziun da lingua taliana da noss chantun
Sessiun: 29.11.2000
Diversas persunas da la regiun dal Moesano, ma er da la regiun da Cuira, èn stadas confruntadas il davos temp cun in tractament spezialmain nunflexibel da vart las uffizis en connex cun lur dumonda per ina reducziun da las premias da la cassa da malsauns.
En quels cas, nua che la contribuziun è vegnida refusada perquai che la dumonda è vegnida inoltrada memia tard, è vegnì proponì il recurs a la dretgira administrativa dal chantun.
Il fatg dentant ch'ils funcziunaris chantunals, als quals in tal cas è vegnì affidà, na tegnan insumma betg quint dal stadi da sanadad e da la vegliadetgna da las petentas e dals petents, ils quals han savens difficultads da sa regurdar e da s'exprimer, fa smirvegliar e na duai betg vegnir acceptà.
Ultra da quai è l'infurmaziun davart las modalitads ed ils termins da las dumondas per ina reducziun da las premias da la cassa da malsauns che vegn furnida als organs da stampa savens manglusa u manca insumma.
Las duas gasettas localas dal Moesano per exempel na vegnan betg servidas cun las communicaziuns da la chanzlia chantunala.
Jau dumond perquai la preziada regenza:
- È ella infurmada davart quests fatgs?
- Tge mesiras quinta ella da prender per eliminar questas mancanzas che difficulteschan l'existenza da quellas persunas, a las qualas vegn en scadin cas refusada ina plazza al sulegl?
Cuira, ils 29 da november 2000
Namen: Noi
Session: 29.11.2000
Vorstoss: rg SchriftlicheAnfrage
Resposta da la regenza
Il sistem da la reducziun da las premias ch'è reglà en la lescha davart l'assicuranza da malsauns e la reducziun da las premias, tenor il qual la regenza fixa la resalva persunala tenor las dumondas entradas, pretenda che persunas che fan valair in dretg da reducziun da las premias (RIP), inoltreschan il formular d'annunzia fin ils 31 da mars a la filiala AVS. Ina prolungaziun dal termin avess la consequenza nungiavischada sociopoliticamain ch'il termin da pajament da las contribuziuns a la reducziun da las premias sa retardass correspundentamain. La revisiun parziala da la lescha davart l'assicuranza da malsauns concludida ils 24 da mars 2000 da l'assamblea federala oblighescha il chantun da resguardar a partir dal 1. da schaner 2001, cun examinar las premissas per far valair ina reducziun, las relaziuns las pli actualas da gudogn e da famiglia. La prescripziun dal legislatur federal ha per consequenza ch'il termin d'annunzia da fin uss dals 31 da mars scroda. Annunzias èn da nov pussaivlas durant l'entir onn.
Ils meds da massa orienteschan la populaziun annualmain davart las modalitads da la RIP. La chanzlia chantunala trametta las communicaziuns a las medias electronicas ed ultra da quai a las suandantas medias stampadas che vegnan legidas frequentamain en il Moesano: La Regione a Bellinzona, La Voce delle Valli a Locarno, Il Giornale del Popolo sco er al schurnalist liber Marco Tognola a Roveredo. En connex cun la midada sin EED (spediziun da las communicaziuns per e-mail u internet / fax) ha Il San Bernardino a Roveredo desistì d'obtegnair er vinavant las communicaziuns.
Las filialas AVS rendan attenta la populaziun sin plaun communal da la pussaivladad da la RIP, dattan infurmaziuns e gidan a far la dumonda.
La regenza respunda las dumondas fatgas sco suonda:
1. Il dretg d'ina RIP scroda tenor il dretg valaivel, sche l'annunzia na vegn betg fatga entaifer ils termins prescrits. Las collavuraturas ed ils collavuraturs da l'institut d'assicuranza sociala incumbensads cun l'execuziun da la RIP vegnan intimads tenor il sistem valaivel da na betg elavurar formulars d'annunzia inoltrads suenter ils 31 da mars. In'annunzia posteriura po vegnir resguardada be, sche l'inoltraziun a temp dal formular n'è betg stada pussaivla senza culpa.
2. La chaschun da la problematica ch'ha provocà la dumonda en scrit pertutgant il termin d'annunzia dals 31 da mars n'exista betg pli en il futur, perquai che, sin fundament dal dretg valaivel a partir dal 1. da schaner 2000, in'annunzia è pussaivla durant l'entir onn. Las filialas AVS che lavuran sin plaun communal sustegnan persunas ch'han bregia d'emplenir or il formular d'annunzia.
Sa basond sin questa situaziun da partenza na vesa la regenza nagin basegn d'agir immediat en il senn da la dumonda en scrit.
Cuira, ils 29 da november 2000