Dumonda en scrit concernent la segirezza da la via dal Malögia, tranter Malögia e Segl
Sessiun: 29.01.2001
La via dal Malögia tranter Segl e Plaun da Lej è spezialmain privlusa d'enviern, pervia dal privel da lavinas. Durant e suenter grondas navadas sto la via surmenziunada vegnir serrada per il traffic durant in u plirs dis. I daventa pli e pli problematic da serrar questa via che collia la Val Bergiaglia cun l'Engiadina ed il medem mument er l'Italia dal nord cun ils centers turistics da l'Engiadina.
Ans regurdain che blers Bergiagliots e fitg blers cunfinaris van mintga di en Engiadina a lavurar ed èn lavurants indispensabels per l'economia da la val. Mintga patrun ha in interess ch'ils agens lavurants possian cuntanscher lur plazza da lavur mintga di senz'interrupziun. Questa via è er impurtanta per il traffic da rauba or ed en la Val Bergiaglia e per il traffic internaziunal talian. Sco ch'ins vesa è questa via indispensabla per ina val perifera sco la Bergiaglia senza viafier ed er per ina regiun turistica sco l'Engiadina.
Actualmain na pon ins betg garantir la segirezza ed igl è in fatg indispensabel ch'igl è da far insatge sin quest traject da la via. Sch'ina schliaziun cun agid d'in tunnel para memia chara, alura vegnan ins a stuair chattar in'autra schliaziun cun galarias avertas o cun autras metodas da protecziun. La segirezza stuess avair dapli muntada ch'ils problems finanzials, perquai ch'ina via da colliaziun uschè impurtanta na po betg vegnir negligida.
Jau envid la preziada regenza chantunala ed il departament respectiv da far tut il pussaivel per render pli segir a media vista quest traject da via.
Cuira, ils 29 da schaner 2001
Namen: Giovannini
Session: 29.01.2001
Vorstoss: rg SchriftlicheAnfrage
Resposta da la regenza
La regenza è natiralmain conscienta da la muntada da vias da traffic segiras. La situaziun extraordinaria da l'aura en Engiadina il schaner 2001 cun serradas da la via da plirs dis mussa, ch'igl è da far anc bler sin il sectur da l'avertura dal traffic, per augmentar la segirezza e per meglierar l'accessibladad durant l'entir onn.
En passa 450 lieus privlus en il chantun e resguardond las resursas finanzialas èsi dentant stringentamain da metter prioritads en connex cun l'amplificaziun da las vias e la segirezza da quellas.
Il plans avant maun per il traject Segl - Malögia mussan, ch'ils custs per eliminar il privel d'enviern muntan a bundant 100 milliuns francs tant en il cas d'ina schliaziun cun in tunnel u ina galaria che na sa cunfà strusch cun la cuntrada sco er en il cas d'ina construcziun da vasts rempars da lavinas. En vista als projects gronds currents e planisads sco er per motivs finanzials na pon ins strusch patratgar da realisar ina tala schliaziun a media ed a lunga vista.
Uschia resta la situaziun da fin uss per forza nunvariada per ils proxims onns. Las persunas responsablas per la segirezza d'enviern da las vias ston prender er en il futur decisiuns difficilas areguard la serrada e l'avertura da quest traject. En quest connex èsi da resguardar a moda engrevgianta ch'en il sectur dals guauds da protecziun na pon ins betg distatgar artifizialmain las lavinas.
En quest connex ston ins dentant er far attent ch'il traject Segl - Malögia è stà serrà en media be 1.5 dis per onn durant ils davos 20 onns.
Tuttina vegn la regenza a s'engaschar per che la serrada da quest traject restia restrenschida sin in minimum ch'ins po responsar.
14 da favrer 2001