Dumonda en scrit concernent la reducziun radicala da la rait d'uffizis postals
Sessiun: 29.01.2001
Cun smirvegl hai jau prendì enconuschientscha dals plans da restructuraziun da la posta. Per il chantun Grischun sco chantun da muntogna a la periferia munta ina tala reducziun dals uffizis postals ina suppressiun totala. Var 70% da tut ils uffizis postals dal chantun vegnan classifitgads sco „tip in“ ed èn pia previs per ina furma da manaschi alternativa.
Il servetsch public vegn reducì sulettamain ad ina purschida da prestaziuns fundamentalas minimalas. Cun tutta chapientscha per ponderaziuns da l'economia da manaschi na po in tal agir betg vegnir acceptà senza opposiziun. Puspè ina giada daventan las regiuns periferas e da muntogna cun pauca populaziun in'unfrenda da las stentas da spargn, e quai ina giada dapli tras ina interpresa publica da monopol.
Quest agir è in ulteriur segn che las regiuns periferas na vegnan en il futur strusch pli a pudair sa mantegnair.
Las regiuns da muntogna daventan pass per pass in'unfrenda da la rentabilitad e da la „shareholder value“.
Il sutsegnà fa pia las suandantas dumondas:
1. È er la regenza da l'avis ch'il servetsch public saja periclità en entiras valladas e cun tut las consequenzas negativas?
2. Po la regenza admetter che la posta fa ina politica ch'oppona las vischnancas flaivlas da finanzas a quellas fermas da finanzas?
3. Na fiss qua betg giustifitgada ina sperta acziun da las regenzas dals chantuns da muntogna?
Cuira, ils 29 da schaner 2001
Namen: Capaul
Session: 29.01.2001
Vorstoss: rg SchriftlicheAnfrage
Resposta da la regenza
1. Il servetsch public po gnir descrit sco suonda: „Il servetsch public cumpiglia bains e prestaziuns da servetsch d'infrastructura che duain star a disposiziun a l'entira populaziun ed a tut las regiuns dal pajais per las medemas cundiziuns, che na vegnan dentant betg producids dal martgà u betg en la qualitad politicamain giavischada.“ Il servetsch public cuntegna pia adina in provediment fundamental ch'è da fixar politicamain e che demussa trais dimensiuns: il provediment fundamental duai esser cumplessiv e star a disposiziun a mintgin, ina tscherta qualitad duai esser garantida, il pretsch duai esser raschunaivel per tuts.
La fixaziun concreta dal provediment fundamental (dimensiun) è chaussa da la politica resp. dal stadi. Dal servetsch public na fai dentant betg part ch'il stadi sto furnir sez las prestaziuns da servetsch ed er betg co ch'il servetsch public vegn furnì. Igl è sulettamain da garantir che las prestaziuns da servetsch giavischadas vegnian furnidas.
Tenor la lescha da posta sto la posta svizra garantir il provediment fundamental da posta (servetsch universal) en l'entira Svizra. Sche quest servetsch universal u servetsch public vegn furnì en furma d'uffizis postals u en autra furma na prescriva la lescha betg. Tenor quella n'è betg il dumber d'uffizis postals in indicatur per il servetsch public, mabain sulettamain il provediment effectiv da la popula-
ziun cun prestaziuns fundamentalas da posta. Uschenavant che la posta ademplescha sia incarica legala, n'è il servetsch public betg periclità. La regenza vegn a s'engaschar per che la posta vegnia ad ademplir sia incarica da provediment fundamental er areguard la qualitad. La regenza è plinavant conscienta che la rait d'uffizis postals n'è betg impurtanta be per il provediment fundamental da posta da la populaziun, mabain creescha er plazzas da lavur impurtantas en la regiun.
2. I constat che la restructuraziun da la rait d'uffizis postals pertutga bler dapli las vischnancas pitschnas che las vischnancas pli grondas. La grevezza tras eventualas investiziuns che n'èn betg amortisablas u tras la sutminaziun resp. la flaivlezza da tschertas cumbinaziuns da gudogn pertutga surtut vischnancas pitschnas. Quellas èn savens flaivlas da finanzas. Questas consequenzas negativas effectivas na pon dentant betg vegnir interpretadas sco in'opposiziun intenziunada da vischnancas flaivlas da finanzas encunter vischnancas grondas, fermas da finanzas. Las consequenzas da la restructuraziun dals uffizis postals, sco quellas d'auters process da liberalisaziun, pertutgan las regiuns da muntogna e periferas spezialmain ferm. Qua hai perquai num da rinforzar e d'amplifitgar ils mecanissems da gulivaziun tranter la confederaziun ed ils chantuns da muntogna.
3. La conferenza da las regenzas dals chantuns alpins ha numnà gia l'onn 2000 ina gruppa da lavur ch'è s'occupada dal servetsch public e da la reducziun da plazzas da lavur en la regiun da muntogna. La conferenza da las regenzas vegn a s'occupar er da las dumondas actualas da la rait d'uffizis postals ed a proponer sias ideas sin plaun federal.
Qua èsi da menziunar ch'en connex cun la liberalisaziun dals manaschis federals e cun las consequenzas negativas per las regiuns periferas e da muntogna èn vegnidas fatgas numerusas intervenziuns da las pli differentas varts. Il cussegl grond da sia vart ha inoltrà ina iniziativa chantunala davart in fond naziunal da coesiun. La cumpetenza per mesiras concretas sa chatta dentant tar la confederaziun. Il cussegl federal ha pia er concludì l'avust 2000 da preschentar a las chombras federalas mesiras limitadas temporalmain per accumpagnar eventuals effects negativs da la liberalisaziun regiunala. Ils meds duain vegnir impundids cun cleras finamiras en ils chantuns e las regiuns ch'èn il pli fermamain pertu-
tgads da las mesiras da structura da la Swisscom, las VFF e la posta. Il chantun è represchentà en la gruppa accumpagnanta e sa stenta da trair a niz il meglier pussaivel las mesiras empermessas. Per quest intent vuli dentant spert projects concrets da las regiuns. Actualmain n'existan anc nagins tals projects. Qua ston uss agir las regiuns.
27 da favrer 2001