Navigation

Inhaltsbereich

Interpellaziun concernent il „profil da ristgas per la Svizra“ / (Grischun)

Sessiun: 30.01.2001
Sut il titel „analisa cumplessiva da ristgas per la Svizra“ ha la confederaziun, integrond tut ils departaments ed intgins chantuns, empruvà dapi passa diesch onns da sclerir cun metodas scientificas, nua che la segirezza da la Svizra è effectivamain smanatschada e nua betg. La finamira da la „analisa cumplessiva da ristgas per la Svizra“ è quella d'augmentar l'effizienza e l'efficacitad da la politica da segirezza cun impunder cun cleras finamiras ils stgars meds per la prevenziun, il cumbat e la superaziun da donns là, nua ch'ils potenzials da privel ils pli gronds existan.

Surprendentamain han ins intervegnì avant la votaziun davart l'iniziativa da redistribuziun che l'anteriur schef dal DDPS, cusseglier federal Ogi, na vuleva betg render accessibel al public il studi il pli nov da questa analisa, il „profil da ristgas per la Svizra“, perquai che quel inditgava las flaivlezzas evidentas da la politica da segirezza. L'analisa è vegnida integrada er en il rapport davart la politica da segirezza 2000, ma n'ha betg manà al resultat ch'il militar sperava. Gia la cumissiun Brunner aveva constatà: la Svizra dispona d'ina preparaziun efficazia encunter ils privels ils pli improbabels, ma n'è betg preparada a moda suffizienta per ils privels effectivs dad oz e damaun.

En il rapport davart il program da la regenza 2001-2004 han ins dà la prioritad, en punct 10 sin pagina 33, a „l'optimaziun da las structuras, la scursanida da las vias da decisiun, il diever da sinergias en ils secturs protecziun civila ed agid en cas da catastrofas, sanitad e pumpiers“, e numnà ina gruppa da lavur.

En quest connex èsi da far las suandantas dumondas:

1. Co sa cumpona questa gruppa da lavur puncto persunal? Èn represchentadas er dunnas en quella?
2. Garantescha la cumposiziun
a) in'analisa raziunala dals privels ed in augment massiv da l'effizienza e da l'effectivitad, spezialmain sin il sectur da la prevenziun e dal scleriment da la populaziun davart ils potenzials da privel ch'existan effectivamain e lur motivs?
b) ch'ils interess da tut las classas da la populaziun vegnian resguardads?
c) ch'ins entschaiva las refurmas necessarias da structura independentamain dals agens interess?
3. Enconuschan ils commembers da questa gruppa da lavur il rapport „profil da ristgas per la Svizra“? (da consultar sut ). Sche betg, vegn quel mess a disposiziun ad els?
4. È la regenza pronta d'acceptar l'analisa „profil da ristgas per la Svizra“ sco ina da las basas da lavur e da resguardar las conclusiuns che resultan da quella en la repartiziun da daners?
5. Fin cura vegn la regenza ad obtegnair las propostas da la gruppa da lavur? Cura vegn il cussegl grond a prender enconuschientscha da quellas, ed en tge furma?

Cuira, ils 30 da schaner 2001

Namen: Trepp, Meyer, Arquint, Augustin, Frigg, Locher, Looser, Marti, Michel, Noi, Pfenninger, Pfiffner, Schmutz, Schütz, Zindel

Session: 30.01.2001
Vorstoss: rg Interpellation

Resposta da la regenza

Il rapport da la confederaziun menziunà pertutgant il profil da ristgas per la Svizra exista pir en furma da sboz. Quest rapport represchenta ina basa da planisaziun e sa drizza en emprima lingia a quels uffizis da l'administraziun federala che s'occupan da mesiras da politica da segirezza. Al dretg temp duai el star a disposiziun er als chantuns sco basa per las incumbensas en ils secturs politica da segirezza e protecziun da la populaziun.

En il program da la regenza 2001-2004 è vegnì integrà sco ina da las finamiras il project „l'optimaziun da las structuras, la scursanida da las vias da decisiun, il diever da sinergias en ils secturs protecziun civila ed agid en cas catastrofas, sanitad e pumpiers“, e quai betg il davos per garantir la coordinaziun cun ils projects federals „armada XXI“ e „protecziun da la populaziun“. Ils concepts directivs e la basa legala per quests dus projects n'ha il cussegl federal dentant betg anc deliberà. Uschespert che las novas leschas federalas che cuntegnan las incumbensas e cumpetenzas dals chantuns èn avant maun, pon ins entschaiver cun lur realisaziun en ils chantuns.

In emprim pass ha il chantun Grischun tuttina gia fatg en quest connex. Cun la revisiun parziala da la lescha davart l'agid en cas da catastrofas èn vegnids abrogads ils stabs directivs regiunals. Tras quai pon ins scursanir considerablamain las vias da decisiun per mesiras e prestaziuns d'agid.

La regenza respunda las dumondas sco suonda:

1. La gruppa da lavur sa cumpona dals secretaris dal departament da construcziun, traffic e selvicultura e dal departament da finanzas e militar (presidi) sco er dals cumandants da la polizia chantunala, dal directur da l'institut d'assicuranza d'edifizis, da l'inspectur da pumpiers, dal medi chantunal, dal schef da l'uffizi per la protecziun civila e l'agid en cas da catastrofas, dal cumandant cirquital (commembers) sco er dal collavuratur da stab da l'uffizi per la protecziun civila e l'agid en cas da catastrofas (actuar). En la gruppa da lavur n'èn betg represchentadas dunnas, perquai che nagin dals uffizis consultads na vegn manà d'ina dunna.

2. L'incarica da la gruppa da lavur resulta dal punct 10 dal program da la regenza 2001 - 2004 che vegn cità dals interpellants. I sa tracta d'optimar las structuras, da scursanir las vias da decisiun e da trair a niz sinergias tranter ils partenaris. La gruppa da lavur n'aveva dentant betg l'incarica da far in'ulteriura analisa dals privels u da preschentar propostas per il sectur da la prevenziun. Analisa dals privels e prevenziun eran gia dapi blers onns ina incarica permanenta dals singuls partenaris da la protecziun da la populaziun (polizia, pumpiers, servetsch da sanitad, protecziun civila). Igl è evident che qua vegnan resguardads ils interess da l'entira populaziun.

Pussaivlas refurmas da structura vegnan analisadas e giuditgadas a moda objectiva, e quai independentamain dals agens interess. Refurmas che daventan necessarias en il chantun duain entschaiver, uschespert ch'exista la basa legala che la confederaziun sto relaschar.

3. La gruppa da lavur ha enconuschientscha dal sboz dal rapport „profil da ristgas per la Svizra“. Ma perquai ch'il rapport n'è betg vegnì deliberà a moda impegnativa, ha el sulettamain caracter provisori.

4. Uschespert che l'analisa „profil da ristgas per la Svizra“ è definitivamain avant maun, vegn la regenza ad examinar quest rapport ed ad integrar las conclusiuns da quel en sias ponderaziuns.

6. La regenza ha gia prendì enconuschientscha dal rapport da la gruppa da lavur „protecziun da la populaziun“. Partind da quest rapport èn vegnidas dadas incaricas che mainan vinavant a la gruppa da lavur. Quellas incaricas ston vegnir terminadas anc quest onn. Perquai che las lavurs en il chantun èn da coordinar cun quellas dals projects federals, na pon ins betg dir al mument actual a moda impegnativa, cura ch'il cussegl grond po vegnir infurmà.

20 da favrer 2001