Navigation

Inhaltsbereich

Postulat concernent l'exposiziun annuala dal Museum d'art dal Grischun

Sessiun: 30.01.2001
Il Museum d'art dal Grischun (MAG) promova - en il rom dals credits permess e tenor enconuschientschas scientificas ed administrativas renconuschidas - l'avertura, la tgira, la preschentaziun e l'intermediaziun da la collecziun grischuna d'art. El intermediescha, promova e preschenta l'art figurativ en furma d'exposiziuns temporaras.

L'art figurativ cuntegna tranter auter sculpturas, maletgs, graficas ed artisanadi. Uschenavant è tut cler. Ma sch'i sa tracta da giuditgar tge ch'è art e tge betg, alura daventi pli difficil. Vuli en scadin cas in spezialist per il giudicat? N'è il burgais normal betg abel da renconuscher art? Datti democrazia en l'art? È art neutrala areguard las schlattainas?

L'exposiziun annuala da l'onn passà ha fatg sensaziun. Surtut er la cumposiziun da la giuria. Ins ha crititgà spezialmain che las dunnas na sajan betg vegnidas resguardadas ni en la giuria, ni tar ils expositurs.

Igl è interessant da constatar ch'ils quatter artists tschernids chattan praticamain mintg'onn ina plazza en l'exposiziun annuala. Plinavant èn els preschents en l'exposiziun regulara.

La politica na stuess betg prescriver tge ch'è art. Ma ella stuess dar bunas cundiziuns generalas. Igl è da sa regurdar ch'il Museum d'art vegn finanzià principalmain cun in import da milliuns dal chantun. Consequentamain spetgassan ins dapli varietad da la lavur artistica, spezialmain da las artistas grischunas, ed in'exposiziun pli equilibrada. Ins pudess senz'auter era s'imaginar che p.ex. mintga mais vegniss dà la pussaivladad ad ina artista u in artist nunenconuschent ch'ha ina relaziun cun il Grischun d'exponer sias ovras en in local dal museum e da las mussar ad in public pli vast.

Nus supplitgain la regenza da sclerir, sche tras l'exposiziun annuala en il Museum d'art, na duai betg vegnir offerì in'art pli popular ed equilibrà al public grischun, sco er da s'engaschar per ch'artistas ed artists che n'èn betg anc enconuschents e ch'han ina relaziun cun il Grischun obtegnian pliras giadas l'onn la pussaivladad d'exponer lur ovras en il Museum d'art dal Grischun.

Cuira, ils 30 da schaner 2001

Namen: Frigg, Meyer, Bucher, Arquint, Joos, Locher, Looser, Noi, Pfenninger, Pfiffner, Schmutz, Schütz, Zindel

Session: 30.01.2001
Vorstoss: rg Postulat

Resposta da la regenza

Il Museum d'art dal Grischun (MAG) sa basa sin trais purtaders: il chantun Grischun, la fundaziun collecziun grischuna d'art e l'uniun grischuna d'art. Ils detagls da las
relaziuns giuridicas che furman la basa dal MAG resultan da la cunvegna tranter la
regenza, il cussegl da la citad da Cuira e la suprastanza da l'uniun grischuna d'art concernent la collecziun grischuna d'art dals 17 da december 1979/11 da schaner 1980 sco er da la cunvegna tranter il chantun e l'uniun grischuna d'art concernent l'activitad da l'uniun grischuna d'art en il Museum d'art dal Grischun dals 10 da december 1979.

Tenor la cunvegna metta il chantun Grischun gratuitamain a disposiziun il Museum d'art dal Grischun ed il persunal dal museum a l'uniun grischuna d'art per exposi-
ziuns e referats. L'uniun grischuna d'art porta l'entira responsabladad per la concepziun dal program, l'organisaziun e la realisaziun da sias activitads en il Museum d'art. Questa furma da collavuraziun tranter il chantun e l'uniun grischuna d'art che la regenza ha confermà pliras giadas garantescha - dal tuttafatg en il senn dal postulat - ch'en il Museum d'art dal Grischun possian vegnir intermediadas e promovidas tut las spezias e generaziuns da la lavur culturala tradiziunala ed actuala.

Ina da las finamiras expressivas da l'uniun grischuna d'art è quella da promover e d'intermediar tant l'art pli vegl sco er quel actual, tant l'art enconuschent sco er quel strusch anc scuvrì dal Grischun. Sper l'impurtanta exposiziun annuala han lieu per quest intent regularmain exposiziuns singulas u da gruppa cun artistas ed artists pli giuvens dal Grischun. Per mancanza da cumpetenza na po la regenza betg prender detagliadamain posiziun davart la critica da la postulanta e na condivida quella er betg dal tuttafatg. Ma ella è senz'auter er da l'avis ch'i fiss giavischabel, sch'il
Museum d'art dal Grischun mettess a disposiziun ina plattafurma pli vasta ad artistas ed artists grischuns ch'han ina relaziun cun il chantun Grischun per pudair mussar lur ovras regularmain.

Exposiziuns annualas vegnan organisadas en il Museum d'art dal Grischun dapi l'onn 1933. Dapi l'entschatta dals onns 80 ha lieu questa exposiziun tenor il medem princip: tut las Grischunas ed ils Grischuns pon inoltrar lavurs; ina giuria decida davart lur recepziun per l'exposiziun. La giuria che vegn numnada da l'uniun grischuna d'art sa cumpona mintg'onn da nov d'in/a expert/a extern/a (president/a), da dus commembers da l'uniun grischuna d'art, d'in/a artist/a, d'in commember numnà
libramain (or da la politica, da l'economia e.u.v.) sco er dal directur dal MAG ch'ha vusch consultativa. Questa cumposiziun da la giuria garantescha che cun trais commembers represchentan las persunas laicas la maioritad. L'exposiziun annuala cuntanscha mintg'onn in aut nivel qualitativ, dal qual vegn prendì enconuschientscha er ordaifer il chantun. E mintg'onn vegnan scuvrids e promovids giuvens talents.

A chaschun dal giubileum da 100 onns da l'uniun grischuna d'art l'onn 2000 ha quella concludì d'instradar excepziunalmain in'autra via enstagl da l'exposiziun
annuala. La critica envers l'exposiziun na sa drizza betg cunter ils artists envidads e lur ovras, mabain plitost cunter il gremi ch'ha tschernì quests artists. Tenor l'avis da la regenza èsi in sbagl ch'en quest gremi n'eran represchentadas naginas dunnas. Ma tenor l'infurmaziun da l'uniun grischuna d'art n'è quai insumma betg stà ina intenziun, mabain quai è capità, perquai ch'ins è stà memia pauc sensibel envers ils giavischs giustifitgads d'ina cumposiziun pli equilibrada da quest gremi.

En il senn da questas explicaziuns è la regenza pronta d'acceptar il postulat e da supplitgar l'uniun grischuna d'art d'examinar las pussaivladads d'ulteriuras furmas per l'intermediaziun e la promoziun d'artistas ed artists ch'han ina relaziun cun il Grischun.

20 da favrer 2001