Navigation

Inhaltsbereich

Postulat concernent la paisa maximala da 28 tonnas sin la via dal Pass dal Fuorn

Sessiun: 30.01.2001
Cun l'introducziun da la TCPTP/LSVA davent dal 1. da schaner 2001 dastgan circular sin quasi tut las vias e pass dal Grischun, sco p.ex. sin tut ils pass impurtants dal Grischun Güglia, Bernina, Malögia e Flüela, ils camiuns pesants cun ina paisa da 32/34 tonnas. Malavita na fa il Pass dal Fuorn, la suletta colliaziun da la Val Müstair cun il Grischun resp. cun il rest da la Svizra, betg part da questa liberalisaziun e po vegnir charrà sco fin uss mo cun camiuns da 28 t paisa totala. Il motiv èn las relaziuns da la tecnica da construcziun, sco che l'uffizi da construcziun bassa communitgescha en ina brev d'infurmaziun dal 1. da november 2000. Cun questa decisiun da la regenza e da l'uffizi da construcziun bassa vegnan ils abitants da la Val Müstair dischavantagiads e discriminads ina giada dapli. Sa chapescha che la populaziun da la Val Müstair sa dosta cun vehemenza cunter questa decisiun e n'è betg pronta d'acceptar silenziusamain quest tractament inegual.

Exempel: In camiun da 34 tonnas paisa totala sto stgargiar a Zernez 6 tonnas da sia chargia per arrivar sur il Pass dal Fuorn en la Val Müstair e viceversa. Che quai è cumbinà cun custs extrems, na ston ins betg menziunar spezialmain. D'agiuntar èsi ch'igl è da pajar la TCPTP/LSVA per l'entira chargia da 34 tonnas, schebain ch'in traject parzial po vegnir charrà mo cun 28 tonnas. Questas construcziuns supplementaras van sin donn e cust dals consuments finals, pia puspè da la populaziun da la Val Müstair che vegn insumma gia dischavantagiada permanentamain.

Las decleraziuns da l'uffizi da construcziun bassa inditgeschan ch'intginas ovras artifizialas e duas punts pli pitschnas na supportan betg la paisa da 32/34 tonnas. Ils sutsegnads èn dentant persvadids che questa mancanza sa laschass reparar provisoriamain cun relativamain pitschens custs, ed els supplitgeschan la regenza d'entschaiver il pli spert pussaivel cun questas lavurs. Perquai ch'i sa tracta da relativamain paucs viadis da camiuns pesants, en cumparegliaziun cun auters pass, supplitgain nus la regenza d'examinar la pussaivladad:

- Da dar permissiuns spezialas fin ch'ils differents puncts flaivels èn reparads. Sche quai na fiss betg pussaivel, alura pretendain nus ch'ils custs supplementars che resultan, vegnian indemnisads cun daners da la TCPTP/LSVA.

In ulteriur punct problematic è il fatg che la via sur il pass vegn mantegnida d'enviern mo parzialmain sin il traject dal Parc naziunal tranter Ova Spin e Buffalora.

- Nus envidain la regenza da procurar ch'in servetsch da mantegniment nuninterrut vegnia garantì er qua sco sin tut ils auters pass.

Cuira, ils 30 da schaner 2001

Namen: Gross, Conrad, Lemm, Bär, Battaglia, Beck, Berther (Mustér), Berther (Sedrun), Biancotti, Butzerin, Casanova (Cuira), Casanova (Vignogn), Catrina, Caviezel, Christoffel, Dalbert, Demarmels, Deplazes, Federspiel, Giacometti, Giovannini, Gunzinger, Hardegger, Hasler, Hess, Hübscher, Janett, Joos, Keller, Kessler, Koch, Lardi, Luzi, Loi, Märchy, Montalta, Nigg, Noi, Parolini, Parpan, Patt, Peretti, Plozza, Portner, Ratti, Robustelli, Stiffler, Telli, Trachsel, Tramèr, Vetsch, Wettstein, Zanolari, Zinsli

Session: 30.01.2001
Vorstoss: rg Postulat

Resposta da la regenza

La via dal Pass dal Fuorn maina sin var 40 km da Zernez fin al cunfin dal pajais en la Val Müstair. Sco via da pass cun il punct culminant sin 2'149 m.s.m. dispona ella, cun ina pitschna intensitad dal traffic, d'in stadi da construcziun cumparegliabel cun
autras vias da pass. Uschia ha il chantun accelerà pass per pass e cuntinuadamain er il mantegniment e l'amplificaziun da la via dal pass dal Fuorn en il passà.

1. En connex cun la realisaziun da la cunvegna davart il traffic terrester tranter la Svizra e la UE e cun l'admissiun da vehichels cun ina paisa totala da 34/40
tonnas è vegnida examinada er la capacitad maximala da chargia da las construcziuns artifizialas a la via dal Pass dal Fuorn. Qua èsi resultà che sin diversas punts sa mussan mancanzas staticas e surtut da construcziun che restrenschan la stabilitad da l'armament. L'admissiun da paisas maximalas pli autas premetta pia la sanaziun ed il rinforz da differentas construcziuns artifizialas. In project d'amplificaziun e da sanaziun che cuntegna er las punts vegn elavurà. L'uffizi da construcziun bassa vegn plinavant ad examinar, sch'i sa laschan far ordavant rinforzs provisoris cun ina lavur ch'ins po responsar. Independentamain da quai è previsa per quest onn la sanaziun ed il rinforz stringentamain necessaris da la punt il Fuorn.

2. Sco la Val Müstair n'èn tut las vals lateralas dal chantun ch'èn accessiblas sur vias da colliaziun betg cuntanschiblas per vehichels da 34/40 tonnas. La restituziun da daners da la LSVA al chantun, perquai che la populaziun e l'economia vegnan spezialmain pertutgadas (art. 38 e 39 da l'ordinaziun davart la taxa sin il traffic pesant, OTTP), resguarda il fatg, che sin questas vias na sa laschan betg realisar gudogns da productivitad pervia da las paisas maximalas pli autas.

3. Per quai che reguarda il servetsch d'enviern, è la particularitad da la via dal Pass dal Fuorn quella ch'ella traversa per part il Parc naziunal svizzer. Il servetsch d'enviern sin quest traject dumonda spezialmain in diever pli ecologic pussaivel dals meds chemics da terrenar. Uschia hai num d'accordar spezialmain en quest sectur ils interess da la segirezza dal traffic cun quels d'in servetsch da mante-
gniment ecologic. Dal rest èsi da constatar che las diversas relaziuns topograficas e climaticas tranter Zernez e Tschierv fan grondas pretaisas al servetsch da mantegniment. I n'è betg inditgà da discurrer sut questas circumstanzas d'ina negligientscha dal servetsch d'enviern mecanic e manual, sch'ins patratga a las onestas stentas dals responsabels per garantir che nossas vias e pia er la via dal Pass dal Fuorn restian transiblas.

Per resumar pon ins constatar che la regenza vegn a s'engaschar per ina amplificaziun e per in rinforz che succedan il pli spert pussaivel da las ovras da construcziun insuffizientas sin la via dal Pass dal Fuorn e ch'ella vegn a procurar er en il futur per in servetsch d'enviern cunvegnent e che tegna quint da las cundiziuns generalas spezialas. Ulteriuras pretaisas, sco la concessiun da permissiuns spezialas per vehichels cun ina paisa totala da 34/40 tonnas e d'indemnisaziuns a regiuns che n'èn betg cuntanschiblas cun tals vehichels, na po ella betg ademplir. En consequenza propona la regenza da refusar il postulat.

20 da favrer 2001