Interpellaziun concernent las mesiras da la polizia dals 27 da schaner 2001 en connex cun il WEF a Tavau
Sessiun: 30.01.2001
En connex cun il WEF han ins prendì mesiras per regular l'arriv da persunas er en la periferia da noss chantun. Da questas mesiras en lur totalitad pon ins segir e franc discutar, ma quai n'è betg l'object da mia interpellaziun.
Qua duain star en il center las consequenzas ch'èn resultadas per la populaziun. Igl è in fatg che la bloccada da la via sin la ruta dal San Bernardin ha chaschunà in stop da traffic d'insaquantas uras.
Persunas ch'eran en viadi èn vegnidas confruntadas cun in stop da pliras uras sin l'autezza da Pian San Giacomo e correspundentamain er da la vart dal nord. Pertutgads èn stads persunas ch'eran en viadi cun uffants, famiglias, cars cun skiunzs ed autras persunas.
Experientschas extremamain negativas ha fatg ina gruppa da 65 scolaras e scolars e 40 creschids ch'era en viadi dal Moesano a San Bernardino (hotel reservà; la gruppa vegniva spetgada da ses instructurs ed organisaturs dal viadi). La gruppa ha stuì interrumper ses viadi a Pian San Giacomo. Igl è da dir ch'ils polizists han per part conuschì persunalmain ils viandants e n'han betg pudì laschar passar els pervia dal scumond.
En vista a las consequenzas per nossa economia, la reputaziun dal chantun e la fidanza da nossas burgaisas e noss burgais ed en vista al futur faschain nus las sequentas dumondas a la regenza.
1. Considerescha la regenza sco necessari da bloccar er en il futur la via sur il San Bernardin en tuttas duas direcziuns pervia dal WEF?
2. En cas da gea: tge pussaivladads vesa la regenza per infurmar la populaziun ad uras davart ils sviaments?
3. Tge mesiras accumpagnantas pon vegnir prendidas supplementarmain per scolar il persunal da la polizia co ir enturn cun la populaziun?
Cuira, ils 29 da schaner 2001
Namen: Noi , Locher, Arquint, Bucher, Frigg, Jäger, Looser, Meyer, Pfenninger, Pfiffner, Schmutz, Schütz, Trepp
Session: 30.01.2001
Vorstoss: rg Interpellation
Resposta da la regenza
Cunter il World Economic Forum WEF 2001 era vegnida convocada ina demonstraziun per ils 27 da schaner 2001 a Tavau, e quai malgrà il scumond da demonstrar. A basa da las infurmaziuns eri da quintar cun acziuns violentas massivas. Per garantir la segirezza da la populaziun da Tavau, dals participants dal WEF e surtut per garantir la protecziun dals represchentants dals stadis esters ha la polizia chantunala stuì prender in dispositiv da segirezza cumplessiv. Da las mesiras prendidas èn er stads pertutgads la populaziun indigena ed ils giasts. Ina valitaziun cumplessiva da tut las mesiras da segirezza e tut ils eveniments en connex cun il WEF 2001 po vegnir fatga pir suenter in'elavuraziun ed analisa exacta en il rom d'in rapport, sco ch'el vegn pretendì dal postulat Pfenninger.
1. A basa da las infurmaziun existentas gia avant il WEF eri da spetgar ch'ina quantitad pli gronda da demontrants pronts a la violenza da la regiun da l'Italia settentriunala e dal Tessin meridiunal vegnian a pruvar da viagiar a Tavau cun cars ed autos privats. Per evitar ina quantitad betg dumagnabla da demonstrants ha la direcziun da l'acziun decidì da franar quels gia al sid dal tunnel dal San Bernardin. Perquai ch'il punct central dal dispositiv da segirezza da la polizia sa chattava en la regiun da Landquart - Tavau, han ins gì a disposiziun be pauc persunal per ademplir quest'incumbensa (circa 10
umens). Quai hai pretendì per intgin temp la serrada totala da la via. Sch'i re
sulta ina situaziun sumeglianta en il futur, vegnan ins a stuair procurar per in dumber suffizient da polizists per pussibilitar in transit controllà. Impediments e bloccadas dal traffic dessi dentant tuttina.
2. Tut tenor il svilup da la situaziun ston ins decider sin il lieu, co ch'ins po
ademplir a moda optimala l'incumbensa da la polizia. Talas decisiuns pon daventar necessarias a curt termin e na sa laschan betg adina planisar exactamain. La populaziun sto pudair vegnir infurmada a curt termin davart eventuals sviaments. Infurmaziuns da traffic al radio èn il med il pli effizient e duain vegnir duvradas er en il futur. Publicaziuns en las medias stampadas èn
adattadas per render attent generalmain gia ordavant ad impediments. Tras questas medias n'èsi dentant betg pussaivel d'infurmar la populaziun a moda actuala e confurma al temp.
3. La regenza n'ha retschavì naginas infurmaziuns, tenor las qualas las forzas da polizia engaschadas sajan sa depurtadas indecentamain envers la popula-ziun. Igl è pussaivel ch'ils polizists da la Svizra franzosa cun lur mandura hajan tementà ina part da la populaziun. Il fatg che lur cuvridas dal chau laschan liber be la vista ha probablamain anc rinforzà quest'impressiun. Quest equipament correspunda dentant al standard da las forzas engaschadas da la Svizra franzosa e tegna quint da las experientschas fatgas là cun activists violents. Per motivs d'effectiv n'èsi ultra da quai betg stà pussaivel a la polizia chantunala dal Grischun da rinforzar tut las forzas engaschadas a la front supplementarmain cun persunal indigen per avair sin il lieu polizists che conuschan las isanzas localas en il contact cun la populaziun. Il chantun n'ha betg in dumber suffizient d'agens polizists per far quai.
La polizia vegn dentant a sa stentar cun mesiras adattadas da garantir la communicaziun cun la populaziun er durant occurrenzas grondas e d'avair dapli chapientscha per ils basegns da las burgaisas e dals burgais.
27 da favrer 2001