Navigation

Inhaltsbereich

Postulat concernent il mantegniment da las vias e da la valur dals stabiliments da traffic dal chantun

Sessiun: 28.03.2001
Per il chantun Grischun è l'avertura dal traffic d'ina impurtanza existenziala. Vias d'access e lingias da viafier ch'èn bunas e segiras èn premissas per l'urbanisaziun decentrala e per in'economia publica prosperaivla.

En vista a las finanzas anc adina problematicas dal chantun ed a las pretaisas midadas envers nossa rait da vias, p. ex. in augment considerabel dal traffic, in dumber massivamain pli aut da camiuns, èn sa midadas a moda marcanta las cundiziuns da basa en quai che reguarda il mantegniment da las vias, cunzunt per las vias da colliaziun.

Concernent las finanzas n'han ins ils davos onns betg pudì metter a disposiziun dapli meds finanzials per il mantegniment da las vias, malgrà la chareschia accumulada. La regenza ha sfurzadamain mess prioritads per l'engrondiment ed il mantegniment da la rait da vias. Questas reducziuns en cumparegliaziun cun pli baud èn per part evidentas e fan quitads als sutsegnads en vista al mantegniment qualitativ da la rait da vias.

Ils postulants dumondan la regenza da rapportar al cussegl grond co ch'ella taxescha il stadi actual sco er las perspectivas futuras dals stabiliments da traffic en il chantun Grischun. Cunzunt duain vegnir respundidas las sequentas dumondas:

1. Datti en il chantun Grischun in inventari da tut las vias repartidas tenor categorias, inclusiv il stadi actual? En cas da na: è la regenza pronta da far in tal?
2. Quant aut è il basegn finanzial annual per mantegnair la valur da las vias e tge import stat oz a disposiziun?
3. Constateschan ins oz mancanzas vi da stabiliments d'avertura che pretendan pli baud u pli tard projects da sanaziun considerabels?
4. Exista in plan d'investiziun ed in plan da finanzas sin il sectur dals stabiliments d'avertura dal traffic - tant sin il sectur da las vias sco er sin quel da las viafiers?
5. Vias, sin las qualas ins po circular cun vehichels pesants (28 t, 32 t u 40 t) han per consequenza in basegn da mantegniment pli grond. Vegnan quests custs supplementars indemnisads cumplainamain tras la LSVA/TCPTP?

Cuira, ils 27 da mars 2001

Namen: Hardegger, Walther, Tuor (Mustér), Bär, Battaglia, Beck, Brüesch, Butzerin, Casanova (Cuira), Catrina, Caviezel, Christoffel, Donatsch, Göpfert, Gross, Hartmann, Heinz, Hess, Kessler, Koch, Luzi, Marti, Montalta, Nick, Patt, Plozza, Ratti, Rizzi, Robustelli, Roffler, Scharplatz, Schmid (Spleia), Stiffler, Thomann, Tramèr, Vetsch, Zarro, Zinsli

Session: 28.03.2001
Vorstoss: rg Postulat

Resposta da la regenza

Negliger il mantegniment da la rait da vias existenta ha effects problematics en plirs reguards. Vias bain mantegnidas gidan considerablamain ad augmentar la segirezza dals utilisaders. In mantegniment nunsuffizient e sanaziuns da vias e da construc-ziuns artifizialas che na vegnan betg exequidas a temp fan plinavant crescher svelt ed a moda disproporziunada ils custs per la reparatura. L'augment dal traffic, vehichels pli lads e surtut pli grevs strapatschan nossas vias adina pli ferm. Perquai ch'ina gronda part da la rait da vias grischuna è fitg veglia, strusch drenada e betg resistenta a la schelira e perquai che la fermezza da la stresa da crappa rutta e da la cuvrida n'è betg suffizienta, na po la rait betg pli satisfar dapertut e cumplainamain als basegns per part novs. La regenza sustegna perquai da princip la direcziun dal postulat, uschenavant ch'el accentuescha la significaziun dal mantegniment da las vias e da la valur. Ina meglieraziun da la situaziun nuncuntentaivla è dentant pussaivla a lunga vista be sch'igl èn disponibels meds supplementars per il mantegniment u sch'ins accepta reducziuns sin il sectur da projects per novas construcziuns.

La regenza s'exprima sco suonda davart las singulas dumondas:

1. L'uffizi da construcziun bassa dispona d'in inventari da las vias repartì tenor categorias da via. Las registraziuns dal stadi succedan sistematicamain en il rom dal sistem MSE/MMV (management dal mantegniment da las vias). Ils resultats da questas grondas retschertgas èn in agid impurtant e da vaglia per fixar las prioritads per sanar las vias chantunalas e lur construcziuns artifizialas.

2. A basa da studis generalmain renconuschids stuess ins investir annualmain circa 1,5% - 2% da la valur da reacquisiziun en il mantegniment da la substanza da nossa rait da vias ch'è ritga da construcziuns artifizialas. Er sch'ins quinta sper ils meds per il mantegniment da las vias chantunalas anc parts essenzialas dals meds d'engrondiments da las construcziuns da vias principalas e da colliaziun, è la valur correspundenta en il Grischun actualmain stgars 1.0%. Sulettamain per mantegnair la valur da l'infrastructura da las vias fissan necessaris supplementarmain almain 40 milliuns francs l'onn.

3. La rait da vias existenta ha blers donns vesaivels e zuppads che duessan vegnir eliminads urgentamain. Senza remplazzar las cuvridas manglusas ed
isadas sco er sanar e proteger las construcziuns artifizialas ch'èn donnegiadas dals effects dal sal vegn a s'augmentar prest il dumber dals trajects e da las construcziuns ch'èn en stadi nunsuffizient sin l'entira rait da vias chantunala.

4. Programs da plirs onns, orientads mintgamai ad ina durada da 4 onns per tut las categorias da vias, furman il fundament da la planisaziun per engrondir e mantegnair las vias. Els èn a medem temp la basa per il plan da finanzas ed il preventiv sco instruments directivs da la regenza e dal cussegl grond, al qual i vegn ultra da quai suttamess mintga dus onns in program davart la construcziun da vias.

5. Oz èsi difficil da taxar, en tge dimensiun ch'ils custs dal mantegniment, chaschunads tras il traffic cun camiuns pesants, vegnan a s'augmentar. I vegn decidì mintgamai en il rom da la deliberaziun dal preventiv, sche e quant da las entradas da la LSVA/PCPTP ch'ins po attribuir al quint da las vias, ultra da la part liada als custs da las vias.

Cun la resposta da las dumondas fatgas è il postulat gia exequì, e cun quai vegni proponì tenor l'art. 45a al. 3 da l'urden da gestiun dal cussegl grond da stritgar il postulat cun sia acceptaziun.