Navigation

Inhaltsbereich

Interpellaziun concernent ils custs da la distribuziun d'energia en regiuns periferas cun in martgà d'electricitad avert

Sessiun: 28.03.2001
La nova lescha davart il martgà d'electricitad duai crear ina concurrenza sin il martgà d'electricitad. Cunzunt consuments a l'engrossa spetgan ch'i sa resultan pretschs d'electricitad pli favuraivels. Sin il sectur da l'attatg a la rait duai la concurrenza esser limitada. En las regiuns pauc populadas vegnan ad esser da grond'impurtanza sin quest sectur las indemnisaziuns per il conduct da l'electricitad che vegnan quintadas vitiers il pretsch d'electricitad. Ins spetga marcantas differenzas dals custs, tut tenor nua che la distribuziun da l'electricitad ha lieu. Tenor la situaziun giuridica actuala en il chantun Grischun èn da princip cumpetentas las vischnancas per il provediment d'electricitad sin lur territori. La LME da tschella vart metta a disposiziun als chantuns instruments per garantir il provediment d'electricitad en in martgà d'electricitad avert.

Cunter la LME è conuschentamain vegnì prendì il referendum. Malgrà quai s'interessan ils interpellants, co ch'il chantun po garantir il provediment da basa sut las novas circumstanzas. La regenza vegn envidada da prender posiziun davart las sequentas dumondas:

1. Sco quant problematics taxescha la regenza ils differents pretschs per il diever da la rait e danunder vegnan questas differenzas?
2. Tge pussaivladads concretas ha il chantun per garantir il provediment dals territoris pauc populads a pretschs cunvegnents?
3. Co vul la regenza proseguir en cas che la LME entra en vigur per garantir il servetsch public tar il provediment d'electricitad?

Cuira, ils 27 da mars 2001

Namen: Heinz, Schmid (Spleia), Tuor (Mustér), Arquint, Bachmann, Bär, Battaglia, Beck, Berther (Mustér), Bischoff, Bucher, Büsser, Capaul, Casanova (Vignogn), Catrina, Cavegn, Caviezel, Christ, Claus, Conrad, Dalbert, Farrér, Frigg, Giacometti, Giovannini, Gross, Hartmann, Hess, Jeker, Joos, Kehl, Kessler, Koch, Lemm, Luzi, Märchy, Marti, Montalta, Nick, Nigg, Noi, Parolini, Patt, Peretti, Pfiffner, Portner, Ratti, Rizzi, Robustelli, Sax, Scharplatz, Stiffler, Suter, Thöny, Thurner, Tramèr, Trepp, Vetsch, Zarro, Zinsli

Session: 28.03.2001
Vorstoss: rg Interpellation

Resposta da la regenza

Las explicaziuns introductivas dals interpellants èn congruentas cun las constata-
ziuns che la regenza ha fatg en sia missiva al cussegl grond concernent la liberalisaziun dal martgà d'electricitad (carnet nr. 8/1999-2000). En occasiun da la sessiun da mars 2000 ha il cussegl grond discutà detagliadamain quest rapport.

Resposta da las singulas dumondas:

1. Tenor la lescha davart il martgà d'electricitad (LME), deliberada ils 15 da december 2000 dal parlament federal, duai l'indemnisaziun per il dretg da passar cun conducts sa drizzar tenor ils custs d'ina rait che vegn manada a moda effizienta en il martgà liberalisà da l'electricitad; per questa raschun èn effectivamain da pajar indemnisaziuns pli autas en las regiuns periferas ch'en territoris urbans ed aglomeraziuns. Questa situaziun chaschuna ch'ils custs per passar cun conducts vegnan ad esser auts en singulas regiuns da noss chantun. Quant auts che quels vegnan ad esser na pon ins dentant betg giuditgar, perquai ch'il chantun n'ha d'exequir naginas incumbensas da provediment sin il sectur da l'electricitad.

Il provediment d'electricitad è stà pussaivel fin uss a cundiziuns favuraivlas en quellas regiuns, nua che las vischnancas pudevan pretender prestaziuns correspundentas en il rom da concessiuns da dretg d'aua. Quest avantatg da la posiziun ch'è d'engraziar a l'utilisaziun da la forza idraulica vegn er a restar en il futur.

Per las differenzas dals custs ch'èn da spetgar en ils differents territoris da provediment èn responsabels surtut ils sequents facturs:
    - grad da grevezza da las raits (relaziun tranter il basegn en media ed il basegn maximal);
    - facturs dal basegn (svieuta d'electricitad, dumber da la populaziun, part da l'industria);
    - fatgs geografics (lunghezza da la rait, construcziun da la rait, relaziuns topograficas)
    - structuras da provediment per in spazi pitschen.

2. Oz na posseda il chantun nagina basa legala che pudess garantir il provediment da territoris pauc populads a pretschs adequats. Grazia a las cumpetenzas che la LME ha attribuì ad el sto el perencunter procurar che differenzas sproporziunadas tar las indemnisaziuns per passar cun conducts vegnian
nivelladas. Questas cumpetenzas cumpiglian er l'autorisaziun dal chantun d'ordinar la fusiun da regiuns da rait. Per la realisaziun da questas mesiras dovri dentant anc ina basa legala chantunala.

Sche las mesiras dals chantuns per la nivellaziun n'èn betg suffizientas, dat la LME la cumpetenza a la confederaziun da fixar societads da rait surregiunalas u da prender subsidiarmain autras mesiras adattadas. Ella po surtut er ordinar in fond da cumpensaziun cun participaziun obligatoria da tut las societads da rait. Il chantun vegn a pretender meds da quest fond en favur da ses territoris da rait dischavantagiads.

3. Per garantir il servetsch public en il provediment d'electricitad tenor la LME ha il departament da construcziun, traffic e selvicultura sut la direcziun dal schef da l'uffizi d'energia gia numnà ina gruppa d'experts. Da quella fan part surtut represchentants da la branscha. La gruppa d'experts vegn ad elavurar ils emprims resultats fin la fin 2001; ins vegn er a stuair resguardar il resultat da la votaziun dal pievel davart la LME, previsa per il december 2001.