Navigation

Inhaltsbereich

Interpellaziun concernent promover las vacanzas sin in bain puril

Sessiun: 28.03.2001
En l'entira Europa crescha la dumonda da far vacanzas sin in bain puril. Quest champ d'activitad munta gia a 2% da las entradas dal sectur agricul.

En Svizra offran gia 8% dals manaschis agriculs la pussaivladad da far vacanzas sin lur bain puril (en Finlandia e Svezia vegn gia cuntanschì in maximum da 20%).

Las vacanzas sin in bain puril daventan pia d'ina vart in frequent factur economic ed in potent med auxiliar per il svilup da l'agricultura, da l'autra vart in instrument creativ e cultural ed ellas duessan vegnir resguardadas er en noss chantun sco integraziun pussaivla ed efficazia da l'agricultura en differents champs d'activitad ch'ins vul cuntanscher:

a. proteger las entradas agriculas,
b. promover la rolla da l'agricultura en la cultivaziun e protecziun da la cuntrada,
c. diversifitgar e pia augmentar la sporta turistica.

Cun l'entrada en vigur da la nova politica agrara ston ils purs, malgrà damain contribuziuns e pretschs pli bass per lur products, chattar ina via per meglierar la qualitad cumplessiva da lur manaschi.

Igl è pia da fitg gronda impurtanza da mantegnair manaschis sauns sin noss territori ch'èn abels da garantir ina cultivaziun moderna e la protecziun da l'ambient.
Ils manaschis stuessan avair structuras concisas, lur activitad principala stuess restar l'agricultura e na duess pia betg provocar in conflict cun l'hotellaria tradiziunala; els stuessan en sasez crear sinergias.

La progressiun da las dumondas sin plaun naziunal duai persvader las autoritads chantunalas da la valur supplementara che l'offerta da vacanzas sin in bain puril represchenta oz pli e pli.
L'entira economia dal chantun stuess profitar da questa offerta, e las consequenzas da questa „nova“ schanza economica duessan esser in augment dal commerzi regiunal, la creaziun u er mo ina consolidaziun da las plazzas da lavur sco er in augment da las entradas fiscalas.

Nus faschain las sequentas dumondas a la regenza:

    1. Co sustegna e promova il chantun las vacanzas sin in bain puril?
2. È ella da l'avis che la basa legala saja suffizienta, u vuli ina basa legala specifica?

Cuira, ils 27 da mars 2001

Namen: Pedrotti, Keller, Peretti, Battaglia, Beck, Capaul, Cavigelli, Giacometti, Giovannini, Giuliani, Gross, Hanimann, Joos, Koch, Lardi, Maissen, Noi, Plozza, Portner, Schmid (Val S. Pieder), Thurner, Zanolari, Zarro

Session: 28.03.2001
Vorstoss: rg Interpellation


Resposta da la regenza

Dapi decennis dattan famiglias grischunas da purs albiert a giasts sin lur bains. Gia durant ils onns otganta è s'imponida la publicitad da quest'offerta, perquai ch'ils giasts vulevan savair dapli davart l'ambient puril e perquai che bleras famiglias da purs vulevan sa distanziar da la parahotellaria ch'è in pau main persunala. Grazia a la buna collavuraziun cun l'anteriura uniun da traffic dal Grischun (UTG), oz Grischun vacanzas (GRV), è naschì il concept per l'offerta „vacanzas sin in bain puril“. L'emprima broschura è cumparida la stad 1987. En intervals da ca. dus onns è la broschura vegnida edida danovamain dapi lezza giada.

A las purschidas oriundas d'abitaziuns da vacanzas e da chombras cun ensolver sin bains purils è s'agiuntada spert er la locaziun d'aclas. Allevaturs da chavals e da mils han ultra da quai offrì vacanzas cun trekkings per persunas ch'han plaschair d'ir a sella. Quasi il medem mument è s'extendì il project „durmir en il strom“ da la Svizra romanda en il Grischun. Per render enconuschent e per commerzialisar lur purschidas han giavischà tut quests offerents la collavuraziun da Grischun vacanzas. Il resultat da questas stentas è stada ina broschura communabla per vacanzas sin ed enturn in bain puril, viandar a sella, trekking cun chavals e mils. La stad 2000 han ins substituì la broschura da fin uss cun ina cumparsa en l'internet. Sut l'adressa d'internet: - bain puril pon ins clomar giu ina „survista da las purschidas“, „vacanzas sin in bain puril“, „aclas“, „durmir en il strom“ u „trekking/viandar a sella“.

Resposta da las singulas dumondas:
1. Las vacanzas sin in bain puril vegnan sustegnidas e promovidas tras prestaziuns dal servetsch da consultaziun agricula (SCA) e da Grischun vacanzas. Las famiglias da pur vegnan orientadas annualmain en il „Pur grischun“ davart la cumparsa en l'internet e davart la purschida. Oz surveglia Grischun vacanzas la cumparsa en l'internet da ca. 40 famiglias cun la purschida „vacanzas sin in bain puril“ e da 16 cun la purschida „durmir en il strom“. Ils custs muntan annualmain a 60 fin 150 francs per purschida da quests offerents en l'internet. En questa summa èn includidas las visitas da las abitaziuns u da las aclas, la discussiun da la publicaziun tras il servetsch da consultaziun agricula sco er la dumonda e la furniziun en l'internet tras Grischun vacanzas. Per la purschida „durmir en il strom“ èsi d'agiuntar la visita e la cussegliaziun mintgamai d'in represchentant da l'assicuranza d'edifizis e dal servetsch da consultaziun agricula. Il servetsch da consultaziun agricula offrescha mintg'onn in fin trais dis da furmaziun supplementara davart il tema alloschi da giasts sin in bain puril. Ils custs dal curs per di e per persuna importan 50 francs. Il sustegn e la promoziun da „vacanzas sin in bain puril“ davart dal chantun succeda pia spezialmain cun l'assistenza e la furmaziun supplementara da las famiglias da purs tras il servetsch da cussegliaziun agricula e da Grischun vacanzas.

2. Per l'alloschi da giasts sin in bain puril èn d'observar ultra da la legislaziun d'ustaria e da victualias spezialmain er las prescripziuns da la planisaziun dal territori davart edifizis ordaifer la zona da construcziun. Cun la revisiun da la lescha federala davart la planisaziun dal territori (LPT) èn vegnidas meglieradas sensiblamain las cundiziuns generalas per crear purschidas sin il sectur da „vacanzas sin in bain puril“. D'impurtanza è spezialmain il nov art. 24b LPT, tenor il qual il puresser dastga endrizzar manaschis accessoris betg agriculs en edifizis existents per avrir novas funtaunas da gudogn. Tals manaschis pon esser tranter auter er alloschis da giasts. Applitgond l'art. 24b LPT ha il departament da l'intern e da l'economia publica gia pudì dar las permissiuns necessarias per intgins projects da construcziun per vacanzas sin in bain puril. En quest connex èsi sa mussà che la legislaziun federala - insumma definitiva - sin il sectur da la planisaziun dal territori e da l'ulteriura legislaziun per sustegnair e promover las „vacanzas sin in bain puril“ èn suffizientas.