Navigation

Inhaltsbereich

Interpellaziun concernent il diever futur dals stabiliments d'instrucziun e d'infrastructura da l'armada en il chantun Grischun

Sessiun: 31.05.2001
Il model da l'Armada 21 è vegnì suttamess, ensemen cun la revisiun parziala da la lescha militara, il matg 2001 als chantuns per la consultaziun. Sche tut va tenor plan, vegn il cussegl federal a preschentar il model da l'Armada 21 e la revisiun parziala da la lescha militara l'atun 2001 en sia missiva al parlament. Il medem mument han uss las truppas terrestras l'intenziun da decider davart la planisaziun definitiva en chaussa occupaziun da plazzas d'armas. Questa decisiun è da fitg gronda impurtanza per l'economia publica dal chantun Grischun e da las vischnancas pertutgadas!

Pervia da fusiuns, centralisaziuns e reducziuns è vegnida eliminada la gronda part da las plazzas federalas ils davos onns e consequentamain ha nossa economia privata er pers numerusas incaricas. Quai è succedì cun la dissoluziun dal circundari da duana 3 a Cuira, cun la serrada dal lavuratori da las VFF, cun la reducziun tar la Telecom e cun la partenza dal corp da guardiafortezzas.

Gia l'entschatta d'avrigl han ins pudì leger ed udir en las medias che la „plazza d'armas Cuira“ saja segirada er cun l'Armada 21, ch'i saja pia da far quint cun ina reducziun da las truppas e da las plazzas da lavur sumeglianta a quella dals auters chantuns (tenor il princip da la simmetria da las concessiuns). Dumondas èn dentant er vegnidas fatgas en connex cun l'occupaziun da las plazzas federalas d'instrucziun a Breil ed a S-chanf.

Fin uss eran staziunads a Cuira ils commandos da las unitads grischunas da truppas, da la divisiun da muntogna 12, da la brigada territoriala 12, e tenor il model da l'Armada 95 er il commando da la brigada da fortezza 13. Cun l'Armada 21 vegnan uss dissolvidas resp. restructuradas questas unitads da truppas. Igl è pia da far la dumonda, qualas unitads da truppas che prestan anc servetsch militar en il Grischun ed en tge dimensiun. Igl è evident ch'en il fratemp èn sensibilisads tut ils chantuns e ch'els tuts cumbattan per parts da la nova Armada 21.

Sin fundament da quests novs fatgs e da l'impurtanza economica per il chantun Grischun dumandain nus la regenza:

    1. Tge pon far las vischnancas cun plazzas d'armas Breil, Cuira, Valragn, Fläsch, Maiavilla e S-chanf per che l'infrastructura d'instrucziun federala moderna e dapi decennis bain occupada vegnia duvrada stediamain er cun l'Armada 21?
2. È er la regenza da l'avis ch'il Grischun - cun in dals pli gronds potenzials da plazzas d'instrucziun e d'infrastructura - stuess daventar in center da cumpetenza militara tras l'Armada 21? (La meglra occupaziun pussaivla da las plazzas d'instrucziun e da la sedia dal(s) post(s) da commando p.ex. a Cuira sco sedia da l'uniun d'instrucziun!)
    3. Tge strategia futura ha la regenza en mira en vista a las ulteriuras reducziuns da l'armada ed en vista a las fusiuns dals centers da cumpetenza militara e dals manaschis da logistica ch'èn stringentamain la consequenza?
4. È la regenza pronta da far tut il pussaivel ed er d'intervegnir tar la confederaziun per impedir la reducziun da las prestaziuns da servetsch da las truppas e la partenza dals secturs da logistica? È er la regenza da l'avis ch'il chantun Grischun na dastgia betg supportar anc ina giada l'uschenumnada simmetria da las concessiuns e che l'Armada 21 na dastgia betg chaschunar ulteriuras perditas a l'economia publica dal Grischun?


Cuira, ils 31 da matg 2001

Namen: Cathomas, Lemm, Tremp, Augustin, Bär, Berther (Mustér), Berther (Sedrun), Biancotti, Brüesch, Cahannes, Casanova (Cuira), Casanova (Vignogn), Cavegn, Caviezel, Crapp, Dalbert, Demarmels, Federspiel, Geisseler, Giuliani, Hanimann, Hardegger, Hess, Jenny, Joos, Keller, Kollegger, Lardi, Luzio, Maissen, Marti, Möhr, Montalta, Nick, Parpan, Portner, Quinter, Righetti, Rizzi, Sax, Schmid (Sedrun), Schmid (Spleia), Schmid (Val S. Pieder), Schütz, Stiffler, Suenderhauf, Suter, Trachsel, Tramèr, Tuor (Mustér), Tuor (Trun), Walther, Zanolari, Zarro, Zegg, Zinsli

Session: 31.05.2001
Vorstoss: rg Interpellation


Resposta da la regenza

Cun l'Armada XXI vulan ins smesar l'effectiv da l'Armada 95, uschia che l'effectiv da l'armada muntass anc ad in terz da l'effectiv da l'Armada 61. L'entir effectiv vegn pia reducì da 600'000 (Armada 61) sin var 200'000 (Armada XXI) schuldadas e schuldads (sdt). Quest fatg chaschuna inevitablamain er che las infrastructuras, las plazzas d'armas e da tir, na vegnan betg pli duvradas en la medema dimensiun sco pli baud e ch'ins ha gia reducì plazzas da lavur e vegn anc a stuair reducir ulteriuras plazzas da lavur en il futur. Sche las plazzas da lavur vegnan mantegnidas u reducidas vegn influenzà a moda decisiva da l'occupaziun da las plazzas d'armas e da tir.

Las dumondas fatgas en l'interpellaziun po la regenza respunder sco suonda.

1. Enconuschentamain sa tracti tar las plazzas d'armas e da tir a Cuira, St. Luzisteig, Valragn, Breil ed a S-chanf da fitg buns stabiliments cun ina excellenta infrastructura. Na be per la regenza, mabain er per las vischancas pertutgadas hai perquai num da far valair quests arguments a mintga chaschun e da s'engaschar per che las persunas che decidan en la confederaziun tegnian quint da quest fatg cun planisar l'occupaziun da las plazzas d'armas e da tir.

2. I n'è betg pussaivel da pretender in center da cumpetenza militara per il Grischun, perquai che las tschintg plazzas d'armas e da tir servan a differents geners da truppas. Ins n'enconuscha pia anc betg tut ils detagls davart la futura occupaziun da las plazzas d'armas grischunas. Malgrà tut èsi da spetgar che nossas plazzas d'armas vegnian ad esser occupadas plitost meglier ch'oz, perquai ch'i duain vegnir staziunadas scolas da recruts da l'infantaria mecanisada a Cuira e sin il St. Luzisteig. Plinavant èsi previs ch'ils schuldads che fan lur servetsch en ina tratga absolvian medemamain ina part da lur scolaziun a Cuira. Las plazzas da tir a Valragn, Breil ed a S-chanf duain vegnir occupadas en il rom da fin uss, a moda che quests alloschis duain star a disposiziun en temps senza servetsch militar dapli er ad organisaziuns civilas.

En l'Armada XXI vegni a dar in'uniun d'instrucziun ost ed in'uniun d'instrucziun vest. Igl è da presumar che l'uniun d'instrucziun ost na vegnia betg ad esser staziunada a Cuira. Ma la regenza vegn a sa stentar per ch'il commando d'ina brigada da muntogna haja sia sedia a Cuira.

3. La regenza vegn a s'engaschar per che las plazzas d'armas e da tir grischunas sajan occupadas durant l'entir onn pli bain pussaivel. Tras quai pon ins mitigiar cleramain il squitsch da fusiunar ils centers da cumpetenza militara ed ils manaschis da logistica.

4. Grazia a sias excellentas plazzas militaras da tir e d'exercizi ed a la buna infrastructura militara ha il chantun Grischun pudì dar alloschi durant blers onns a truppas da prest tut ils geners e da tut ils chantuns ed ha profità da quai. Igl è evident ch'il Grischun vegn ad esser pli fermamain pertutgà da la reducziun da l'armada da var 600'000 (Armada 61) schuldads sin 200'000 (Armada XXI) schuldads ch'in chantun che na vegniva fin oz strusch resguardà da l'armada.

Sco gia menziunà pon ins mitigiar la reducziun da las prestaziuns da servetsch da las truppas e la partenza dals secturs da logistica (e pia la perdita da plazzas da lavur) be cun occupar bain nossas plazzas d'armas e da tir. Per quest intent è la regenza gia s'engaschada cun insistenza e vegn a far quai er en il futur. Il mantegniment da plazzas da lavur è in grond giavisch da la regenza er per quest sectur.