Navigation

Inhaltsbereich

Postulat concernent la refurma da l'Armada XXI, dismessa dal train, ulteriura utilisaziun da la plazza d'armas St. Luziensteig

Sessiun: 31.05.2001
L'armada planisescha gia dapi intgin temp refurmas sut il titel "Armada XXI". Novas concepziuns e novs models duain tegnair quint da la situaziun politica midada en l'Europa ed en il mund. In rearmament che cuntegna ils sistems d'armas ils pli moderns ed autamain tecnisads e cumplexs duai permetter da crear in'armada pli effizienta e pli efficazia.

La refurma ha planisà er midadas decisivas per noss chantun. Uschia duain ils chantuns da muntogna perder lur furmaziuns tradiziunalas da l'armada perquai ch'i vegn schlià il corp d'armada da muntogna, entant che la Svizra bassa duai vegnir defendida cun brigadas da planira autamain tecnisadas, fitg flexiblas e moviblas.

Per consequenza duai er vegnir dismess il train. Uschia va a perder per adina in med indispensabel en il territori difficil da las Prealps e da las Alps per sustegnair las truppas da cumbat sco er per dumagnar incumbensas sin ils secturs: transport, provediment, agid en cas da catastrofas sco er agid a la populaziun. Ins na dastga er betg emblidar la perdita sin il sectur da l'economia publica (mastergn, allevament da chavals e.u.v.). En quest connex vegn er a vegnir schliada dal tuttafatg la scola da train St. Luziensteig. En il rom da l'Armada XXI duai ella vegnir remplazzada tras in center da cumpetenza per ils chavals da l'armada a Sand BE. L'ulteriura utilisaziun da la plazza d'armas St. Luziensteig vegn a succeder en collavuraziun cun la scola da tir a Walenstadt.

Per ch'il chantun Grischun possia disponer er en il futur da truppas ch'èn adattadas a las relaziuns topograficas specificas da quest chantun da muntogna vegn la regenza dumandada:

    1. d'interprender tut per che las unitads d'armada da muntogna vegnian mantegnidas, modernisadas e duvradas a moda liada al lieu er en l'Armada XXI.
    2. da cooperar per ch'il train sco part integrala da las truppas da muntogna possia mantegnair sia plazza en l'Armada XXI tenor il nov concept d'acziun per il train sco er da gidar a mantegnair il chaval en l'armada.
    3. da procurar tras mesiras e concepziuns adattadas che la restructuraziun e l'utilisaziun futura da la plazza d'armas St. Luziensteig succedia senza perdita da l'impurtanza economica.
    4. d'examinar tras ulteriuras mesiras, en tge furma che la colliaziun tradiziunala St. Luziensteig - train - chaval d'armada possia vegnir mantegnida er en il futur.


Cuira, ils 31 da matg 2001

Namen: Hanimann, Möhr, Schmid (Val S. Pieder), Bär, Battaglia, Bischoff, Brüesch, Bucher, Bühler, Capaul, Casanova (Vignogn), Cathomas, Caviezel, Christ, Christoffel, Conrad, Crapp, Dalbert, Farrér, Federspiel, Feltscher, Giovannini, Godly, Hartmann, Jäger, Jenny, Joos, Juon, Kessler, Lardi, Lemm, Maissen, Märchy, Marti, Montalta, Nick, Parolini, Peretti, Portner, Quinter, Ratti, Rizzi, Roffler, Schmid (Sedrun), Stiffler, Suenderhauf, Suter, Telli, Thomann, Thöny, Trachsel, Tuor (Trun), Zarro, Zegg

Session: 31.05.2001
Vorstoss: rg Postulat


Resposta da la regenza

A chaschun da l'emprima preschentaziun dal model da l'armada è cusseglier federal Schmid s'exprimì en quel senn ch'ins desistia dal train en l'Armada XXI. Ma quai n'era mai stà en discussiun. Ultra da quai avevan ins discutà mo in onn avant cun l'uffizi federal per las truppas da cumbat davart il transferiment dal train en il center da cumpetenza per animals a Sand/Schönbühl. Er en il model da lezza giada na sa chattava nagina indicaziun davart ina renunzia al train.

En il fratemp è vegnida dada en consultaziun la versiun elavurada dal model da l'armada inclusiv la legislaziun militara. Er en questa versiun dal model da l'armada na legian ins betg ch'il train duaia vegnir eliminà. Differents chantuns da muntogna ed er la regenza dal chantun Grischun s'expriman en la consultaziun expressivamain per mantegnair quest gener da truppa.

Davart las singulas cifras dal postulat piglia la regenza posiziun sco suonda:

1. En il sboz per il model da l'Armada XXI èn previsas duas brigadas da muntogna. En la consultaziun pertutgant il model da l'armada è la regenza, ensemen cun ils auters chantuns da muntogna, s'engaschada per rinforzar anc pli fitg las truppas da muntogna, a moda ch'ella ha pretendì ina terza brigada da muntogna per che las transversalas tras las Alps Grischun, Gottard e Vallais vegnian protegidas da mintgamai ina brigada.

2. En las muntognas e per las truppas da muntogna è il train il sulet med da transport che po vegnir duvrà cun segirtad, sch'ils helicopters na pon betg sgular pervia da trid'aura u sch'ins na po betg far diever da vehichels pervia dal territori intransibel. La regenza è perquai adina s'engaschada per mantegnair il train ed è s'exprimida er en la consultaziun davart il model da l'armada anc ina giada cleramain en favur dal train.

3. En l'Armada XXI vegn la plazza d'armas St. Luzisteig ad appartegnair ensemen cun Cuira al consorzi da scolaziun ost, en il qual duai vegnir scolada en emprima lingia l'infantaria mecanisada. Uschia èsi da spetgar che las plazzas d'armas St. Luzisteig ed er Cuira vegnian ad esser occupadas anc meglier che fin uss.

4. La colliaziun tradiziunala St. Luzisteig - train - chaval d'armada na po betg pli vegnir mantegnida per motivs materials. En l'Armada XXI vegnan reducids massivamain ils effectivs totals. Questa reducziun pertutga er il train. Las scolas da train èn dentant gia oz uschè pitschnas ch'en l'Armada XXI pudess vegnir organisada maximalmain anc ina scola da recruts per onn. Cun crear in center da cumpetenza per ils animals da l'armada (reuniun dal train, dal servetsch veterinar, ils ferrers da chavals e dals chauns) cuntanschan ins in effectiv che pussibilitescha da realisar scolas da recruts regularas, schebain pitschnas. L'impurtanza economica da la plazza d'armas St. Luzisteig sa lascha mantegnair be sche l'infantaria mecanisada po er vegnir scolada là. Sulettamain cun il train na pon ins betg segirar las plazzas da lavur. Ina tala concentraziun sin il train avess per consequenza ch'ins perdess plazzas da lavur e chaschunass inevitablamain che la dumonda dal dretg d'existenza dal train daventass puspè actuala.