Interpellaziun concernent l'egualitad sin il sectur da tgira
Sessiun: 01.06.2001
La dretgira administrativa dal chantun Turitg ha concludì la fin da schaner tranter auter che las pajas da las tgirunzas e fisioterapeutas sajan discriminantas, q.v.d. ch'ellas violeschian la lescha d'egualitad. La regenza dal chantun Turitg sto uss augmentar las pajas respectivas per almain dus classas da salari. Er en auters chantuns, per exempel a Soloturn, èn gia vegnids inoltrads plants concernent las pajas e/u èn pendentas tractativas tranter la regenza e represchentants dal persunal.
Cun gronda probabilitad èn las pajas, respectivamain las classificaziuns da tschertas professiuns dal sectur da tgira, discriminantas er en il Grischun.
- Vesa la regenza in basegn d'agir urgent sin quest sectur?
- È ella pronta d'examinar la dumonda da la discriminaziun da paja, per exempel cun agid dals criteris sviluppads da la dretgira administrativa dal chantun Turitg, e d'eventualmain adattar las pajas?
- Vul la regenza spetgar fin che la dretgira administrativa la sforza da far in tal pass?
Cuira, il 1. da zercladur 2001
Namen: Schmutz, Bucher, Meyer, Frigg, Jäger, Locher, Schütz, Trepp
Session: 1.06.2001
Vorstoss: rg Interpellation
Resposta da la regenza
Durant ils onns 1993 e 1994 èsi vegnì fatg ina revisiun dal sistem chantunal da salarisaziun e la classificaziun da tut las categorias da professiuns e da funcziuns èn vegnidas examinadas tenor il stadi da la scienza il pli nov. Sco cussegliaziun professiunala externa è vegnì consultà l'institut da scienza da manaschi (BWI) da la SPF da Turitg ch'aveva gia cusseglià intgins auters chantuns l'entschatta dals onns 90. Sin il 1. da schaner 1995 è vegnì mess en vigur il nov sistem da salarisaziun. Per il chantun Grischun han pia gia pudì vegnir integradas vastas experientschas ed enconuschientschas, spezialmain er dumondas da l'egualitad e dal resguard da caracteristicas specificas per las dunnas. Ina gronda paisa han ins plinavant dà a la co-operaziun da las differentas represchentanzas dals patruns e dals lavurants sin il sectur da sanadad. En il fratemp n'èn resultadas naginas midadas gravantas en las scolaziuns professiunalas che n'avessan betg gia pudì vegnir integradas en questa revisiun da la salarisaziun. Uschia èn per exempel vegnidas resguardadas las novas scolaziuns per il persunal da tgira da malsauns DN I e DN II. Medemamain vegnan resguardadas las pretaisas fundamentalas envers la scolaziun da fisioterapeutas e da fisioterapeuts ch'èn oz anc usitadas. En quest reguard n'exista pia betg in basegn d'agir urgent.
En il chantun Turitg è succedida la classificaziun da las collavuraturas e dals collavuraturs en las professiuns da sanadad per ina classa damain che quai ch'i fiss stà inditgà sin fundament da la valur da la lavur, e quai per mantegnair sut controlla ils custs supplementars. Talas decisiuns da reducir per ina classa, dentant er d'augmentar per ina classa eran da princip admissiblas en il sistem da classificaziun tschernì dal chantun Turitg, e quai per tegnair quint da la situaziun sin il martgà da lavur. Il plan da classificaziun da l'administraziun chantunala dal Grischun na cuntegna betg ina tala discriminaziun da paja. Tuttina è ina gruppa da lavur actualmain vidlonder d'examinar las cundiziuns d'engaschament dal persunal da tgira. Ella analisescha il sistem da salarisaziun e fa in rapport per mauns da la regenza.
Tenor l'avis da la regenza na fai dal rest nagin senn da cumparegliar ina cun l'autra duas funcziuns tschernidas casualmain. L'entir plan da classificaziun furma in'unitad e las funcziuns-clav da las differentas categorias da funcziun èn vegnidas cumparegliadas ed accordadas ina cun l'autra a moda cumplessiva. Sch'ins cumpareglia uss simplamain ina funcziun cun in'autra ch'è vegnida tschernida cun cleras finamiras e ch'è posiziunada autramain, alura datti il privel ch'i resultia in fauss maletg e che l'entira structura giaja dapart.