Navigation

Inhaltsbereich

Interpellaziun concernent il transferiment da prestaziuns da servetschs interns d'ospital en il sectur da prestaziuns da servetschs externs d'ospital

Sessiun: 01.06.2001
D'in rapport da pressa da la "Südostschweiz" dals 23 da matg 2001 resorta ch'i ston vegnir serradas a l'ospital chantunal dal Grischun mintgamai ina partiziun en la medischina ed en la chirurgia pervia da mancanza da persunal, e quai davent da mez zercladur fin la fin da november 2001. I saja planisà da relaschar ils pazients anc pli baud e d'organisar lur tgira tras il medi da famiglia u il servetsch da spitex.

Gia oz pon ins constatar che pazients vegnan relaschads prematuramain or da la tgira a l'ospital. Uschia vegni pretendì dals servetschs da spitex da furnir prestaziuns da tgira interna d'ospital, dentant senza posseder las resursas persunalas necessarias sco er l'infrastructura necessaria. Il medem vala er per ils medis da famiglia che n'èn per regla betg spezialists e che na disponan da nagina conferenza professiunala interna d'ospital. Cun il svilup menziunà sco er cun l'intenziun da serrar duas partiziuns a l'ospital chantunal vegnan tant il problem da la mancanza da persunal sco er las stentas da spargnar sin il sectur d'ospitals transferids sin terzas persunas, e quai en ina moda e maniera inadmissibla. Ins sto cumbatter la tendenza ch'in ospital chantunal sco proveditur medicinal principal dal chantun possia be anc tgirar pazients che dovran ina funcziun dal provediment central da l'ospital chantunal (coronarografia, angiologia) e ch'ils ospitals na possian pli ademplir lur incumbensas centralas, numnadamain da far l'examinaziun diagnostica da la davos'instanza e da tgirar ils pazients fin ch'els han cuntanschì in stadi da sanadad stabil avunda per il mintgadi, ditg cun auters pleds: els han da translocar persunas ch'han basegn da tgira d'ospital.

Las purschidas actualas da la spitex èn limitadas tras il mandat general da prestaziun e tras la lescha davart l'assicuranza da malsauns. Il transferiment d'incumbensas or dal sectur intern d'ospital premetta l'elavuraziun da novas structuras e da novs models da tgira en il sectur extern d'ospital. La regenza vegn cun quai envidada da prender posiziun davart las sequentas dumondas:

    - Co vul la regenza mitigiar las consequenzas dal svilup descrit?
    - Tge mesiras vul la regenza prender per garantir la qualitad da las prestaziuns e per limitar la responsabladad dals purtaders da prestaziuns sin il sectur extern d'ospital?
    - Han ins gia envidà las organisaziuns da spitex e/u la federaziun da spitex dal Grischun ed ils medis da prender posiziun?
    - Va la tendenza en direcziun da crear e d'organisar ambulatoris survegliads tras ils medis da famiglia?
    - Duai la purschida d'ospitals da center sa restrenscher propi be anc sin funcziuns da provediment centralas?


Cuira, il 1. da zercladur 2001

Namen: Cahannes, Suter, Büsser, Cathomas, Catrina, Cavegn, Dalbert, Demarmels, Dermont, Giuliani, Godly, Hess, Henny, Joos, Kessler, Lardi, Luzio, Marti, Peretti, Quinter, Robustelli, Sax, Schmid (Sedrun), Tramèr, Tremp, Tuor (Mustér), Tuor (Trun), Zarro, Zegg

Session: 01.06.2001
Vorstoss: rg Interpellation


Resposta da la regenza

Tenor il mandat general da prestaziun relaschà da la regenza cumpeta a las organisaziuns da spitex da furnir prestaziuns da tgira e d'assistenza er ad umans cun malsognas acutas. La regenza parta en quest connex dal fatg che las organisaziuns da spitex duessan esser capavlas da surpigliar las prestaziuns da la tgira da tractament che vegnan circumscrittas en l'ordinaziun davart las prestaziuns da l'assicuranza obligatoria per la tgira da malsauns (OPM) e ch'ellas adempleschian las premissas necessarias tant concernent il persunal sco er concernent l'infrastructura. Ina finamira explicita da la tgira da malsauns externa d'ospital è quella da realisar a chasa quellas prestaziuns che dovran in agir qualifitgà, dentant nagina surveglianza permanenta interna d'ospital. Correspundentamain duain ils pazients, sche pussaivel e raschunaivel, vegnir relaschads da l'ospital e vegnir tgirads tras las organisaziuns da spitex uschespert ch'els na dovran pli nagina surveglianza permanenta interna d'ospital. L'extrada da l'ospital na succeda perquai betg pir al mument cur che lur stadi da sanadad è stabil avunda per il mintgadi.

La reproscha che problems che naschan tras la mancanza da persunal ed ils sforzs da spargnar sin il sectur d'ospitals vegnian transferids a moda e maniera inadmissibla sin terzas parts n'è perquai betg motivada. En quest connex èsi er da render attent al fatg ch'il concept da la tgira da malsauns externa d'ospital è vegnì motivà tranter auter cun l'argument ch'in transferiment da las pazientas e dals pazients en l'ambient usità accelereschia il process da guariziun e sbassia ils custs sin il sectur da sanadad.

La regenza respunda las dumondas fatgas sco suonda:

    1. Sin il sectur dal persunal ha la regenza gia concludì emprimas mesiras. I vegnan preparadas ulteriuras mesiras per meglierar l'attractivitad da la lavur. La regenza spetga ch'ils ospitals preparian e discutian a temp cun l'organisaziun da spitex la relaschada da pazients che drovan ulteriura tgira ed assistenza.

    2. La regenza parta dal fatg ch'ils mandats da prestaziun individuals per ils ospitals acuts ed il mandat general da prestaziun dal chantun per las organisaziuns da spitex resguardian suffizientamain la garanzia da la qualitad.

    3. Fin uss n'han ins betg dumandà ina posiziun dals medis, da la federaziun da spitex dal Grischun e da las organisaziuns da spitex davart la problematica pledentada en l'interpellaziun.

    4. Na. Ins aspirescha perencunter d'optimar la collavuraziun tranter ils ospitals e las organisaziuns da spitex.

    5. Na. Il mandat individual da prestaziun da l'ospital chantunal e da l'ospital da dunnas Fontana s'extenda sin l'entir sectur dal provediment acut medicinal e da tgira. Ina restricziun dal mandat da prestaziun da l'ospital chantunal e da l'ospital da dunnas Fontana en il senn da sa concentrar sin las funcziuns da provediment centralas na stat betg en discussiun sin il stgalim politic.