Dumonda en scrit concernent la signalisaziun sin la via chantunala al cunfin tranter ils chantuns Tessin e Grischun
Sessiun: 10.10.2001
Jau hai l'intenziun d'orientar la ludaivla regenza cun questa dumonda en scrit davart la mancanza d'ina signalisaziun da cunfin tranter il chantun Tessin ed il chantun Grischun tar l'entrada meridiunala en la Val Mesauc.
Questa signalisaziun ch'existeva pli baud ha tranter auter la finamira d'infurmar ils viagiaturs che na conuschan betg nossa regiun davart il passagi dal terren tessinais al terren grischun. Ella ha consequentamain betg sulettamain ina incumbensa geografica, mabain er ina funcziun turistica. I ma para inutil da vulair explitgar als esters l'existenza d'ina "quasi enclava grischuna" e da vulair accentuar nossas particularitads culturalas, sch'i n'exista nagina explicaziun vesaivla al cunfin tranter ils dus chantuns. In signal destinà per quest intent, sco quai ch'el vegn duvrà tenor mes avis en autras regiuns da noss chantun, ans pudess esser util.
Perquai supplitgesch jau la regenza grischuna da prender conuschientscha da questa situaziun e da vulair eliminar questa mancanza a moda adattada.
Cuira, ils 10 d'october 2001
Name: Noi
Session: 10.10.2001
Vorstoss: rg SchriftlicheAnfrage
Resposta da la regenza
Propostas per signalisaziuns turisticas (tavlas d'annunzia e da bainvegni) èn da drizzar a la polizia chantunala. Questa decida davart las regiuns ch'èn da signalisar tenor cunvegna ed en enclegientscha cun Graubünden Ferien. Per la signalisaziun sper la via naziunala A13 dovri ultra da quai anc l'approvaziun da la confederaziun. Ils custs per l'acquist, l'installaziun ed il mantegniment da la signalisaziun turistica van a quint dals petents.
Il concept da signalisaziun per la signalisaziun turistica per lung da la A13 prevesa per la regiun da Mesauc mintgamai ina tavla da bainvegni turistica sper la A13 a San Bernardino ed en il sectur dal cunfin tranter ils chantuns Tessin e Grischun. L'onn 1984 han ins installà ina tavla da bainvegni. Il zercladur dal medem onn ha ella stuì vegnir demontada pervia da vandalissem. Essend ch'ins n'ha betg chattà ina soluziun en enclegientscha vicendaivla n'han ins betg pli renovà la tavla.
Il signet "Graubünden Ferienecke der Schweiz" duai vegnir midà anc quest onn.
Uschia sto il layout vegnir modifitgà substanzialmain. Tenor cunvegna cun Graubünden Ferien han ins concludì d'incumbensar l'entschatta da l'onn 2002 ina gruppa da lavur cun la creaziun d'in nov concept. Sin dumonda è la polizia chantunala adina pronta d'examinar propostas correspundentas e da suttametter questas a las instanzas cumpetentas per l'approvaziun.