Navigation

Inhaltsbereich

Postulat concernent acquisiziun d'ina unitad da controlla mobila

Sessiun: 27.11.2001
Il grond augment dal traffic da camiuns pesants sin la A13 e sin nossas vias chantunalas pretenda dapli controllas davart la segirezza da manaschi dals camiuns. Ultra da quai duess ins dentant controllar er la paisa da la chargia, il temp da lavur e da ruaus e la forza dal frain. Igl è numnadamain sa mussà che mancanzas tecnicas gravantas vi dals frains èn stadas savens la raschun per ils accidents cun camiuns.
Tenor la resposta da la regenza sin la dumonda en scrit da deputada Augustin è planisà en il sboz dal plan directiv in center da controlla dal traffic da camiuns pesants en Tumleastga. Ulteriurs centers n'èn betg planisads ed uschia pon vegnir controllads camiuns be sin la A13 dasper Giuvaulta, q.v.d. ch'ils camiuns sin las vias chantunalas grischunas na pon be vegnir con-trollads suffizientamain. Tenor l'opiniun dals sutsegnads duai pudair vegnir controllada l'observaziun da la limita da paisa, da l'ordinaziun dal temp da lavur e da ruaus e la segirezza da manaschi dals camiuns, dentant er sin la via dal Güglia, en Partenz, en l'Engiadina e.u.v.
La polizia chantunala da Turitg è en possess da l'emprema "unitad da controlla mobila" da la Svizra per l'examinaziun dals frains e da la paisa dals camiuns. Ulteriurs chantuns pondereschan la cumpra d'in tal indriz. La "unitad da controlla mobila" po vegnir montada pronta per il diever entaifer 15 minutas en mintga lieu. Ils elements impurtants èn la stadaira purtabla ed il post mobil d'emprova dals frains. Cun la stadaira mobila vegn mesirada mintgamai la paisa dal camiun e sin il post d'emprova dals frains po vegnir eruida la forza dals frains. Cun questa "unitad da controlla mobila" pudess ins exequir di per di controllas selectivas dals camiuns insanua en noss chantun.
Ils custs inclus il char annex e l'agregat d'electricitad importan circa 180'000 francs. Sin nossas vias chantunalas e lateralas ston ins far en il futur dapli controllas. Cun l'acquisiziun da questa "unitad da controlla mobila" pudain nus prestar ina contri-buziun effizienta per la segirtad dal traffic sin nossas vias grischunas e sco quai ch'il passà ha mussà è quai er absolutamain necessari.
Ils sutsegnads supplitgeschan la regenza d'acquistar immediatamain q.v.d. tenor pussaivladad fin la fin da mars 2002 ina "unitad da controlla mobila". La concessiun d'in credit po succeder eventualmain via la procedura da credits posteriurs.

Cuira, ils 27 da november 2001
Name: Looser, Pfenninger, Jäger, Arquint, Beck, Bucher, Casanova (Cuira), Feltscher, Frigg, Jäger, Keller, Locher, Meyer, Noi, Pfiffner, Schmutz, Schütz, Trepp, Zindel

Session: 27.11.2001
Vorstoss: rg Postulat

Resposta da la regenza

La polizia da traffic dal Grischun dispona dapi 1995 d'ina stadaira ad axa dinamica e mobila che po vegnir duvrada sco stadaira da preselecziun tar controllas dal traffic da camiuns pesants sin la A13 e sin l'ulteriura rait da vias dal chantun. Ultra da questa stadaira ad axa dinamica èn tuttas secziuns da traffic, la tecnica da traffic ed il post da polizia a Glion en possess da mintgamai duas stadairas purtablas bulladas. Questas valan sco stadairas uffizialas en il senn da la lescha davart il traffic sin via (LTV) e vegnan messas en funcziun a chaschun da las controllas da traffic che vegnan exequidas regularmain per eruir la surchargia definitiva. Questas stadairas purtablas èn praticas, levas ed immediat applitgablas e pon er vegnir duvradas sin plazzas pli pitschnas per eruir il pais dal servetsch. La plazza da pasar sto be disponer d'in terren stagn e planiv.

Per l'onn 2002 vegn concludì tranter la confederaziun ed il chantun ina nova cunvegna da prestaziun, che cuntegna ina intensivaziun pli vasta da las controllas dal traffic da camiuns pesants. En quest connex èsi er planisà d'acquistar dus vehichels spezials e da munir quels tranter auter cun duas unitads da stadairas (stadairas purtablas). Questas duas unitads correspundan per part a las "unitads da controlla mobilas" menziunadas en il postulat.

Per quest motiv n'èsi betg urgent quest mument d'acquistar ina entira "unitad da controlla mobila". Cun la realisaziun da la plazza da controlla dal traffic pesant a Giuvaulta po il pli impurtant traffic da transit da las Alps (San Bernardin e Güglia) sco er ina gronda part dal traffic regiunal vegnir controllà da tut temp e sistematicamain sin la plazza da pasar previsa.

Per lung dad autras rutas frequentadas fermamein dal traffic pesant stattan quest mument a disposiziun be paucas plazzas da controlla che permettan da metter en funcziun ina tala "unitad da controlla mobila" per pasar vehichels a motor pesants.

Mancanzas tecnicas gravantas dals frains èn il pli savens vesaivlas. Tar l'examinaziun dal stadi dal vehichel vegn tranter auter adina er l'indriz dals frains controllà concernent perdita da pressiun da l'aria, las posiziuns dals pistuns da stausch da cilinders dal frain da rodas sco er lur stadi e funcziun e la posiziun giustada tar regladers da la forza da franar drizzadas a maun da chars annexs. Ultra da quai sto in expert examinar minuziusamain scadin indriz da franar manglus e far ina controlla posteriura. Quai na po betg succeder sin la plazza da controlla, uschia che mintga vehichel sto vegnir manà en ina garascha u tar l'uffizi per il traffic sin via.

La regenza è d'accord cun ils sutsegnads dal postulat che la controlla efficazia dal traffic pesant augmentia la segirezza dal traffic. Duessi sa mussar ch'ils indrizs ed apparats avant maun per quest intent na pon betg garantir la controlla per tut la rait da vias, resalva la regenza la pussaivladad da ponderar l'acquisiziun d'ina unitad da controlla mobila, eventualmein en il rom da la procedura da budget.

Resumond vesa la regenza il mument per ils motivs numnads anc betg la necessitad d'acquistar "l'unitad da controlla mobila" giavischada. Ella refusa consequentamain d'acceptar il postulat.