I constat che durant il traffic da vacanzas sa furman las fins d'emna ferm frequentadas savens accumulaziuns da traffic sin l'autostrada A13, spezialmain avant il tunnel da Plazzas vers sid resp. avant il tunnel da l'Isla bella vers nord. Questas accumulaziuns dal traffic derivan dal fatg che davant quests tunnels vegnan ensemen dus vials.

I s'auda tar ils duairs da la polizia d'infurmar las participantas ed ils participants dal traffic immediat ed a moda fidada davart la situaziun actuala da traffic ed uschia er davart accumulaziuns. Cun las pussaivladads tecnicas las pli novas (TMC, GPS, internet etc.) e spezialmain cun las organisaziuns d'infurmaziun (p.ex. Viasuisse) vegnan las infurmaziuns dal traffic meglieradas cuntinuadamain. Talas infurmaziuns, numnadamain annunzias d'accumulaziuns, pon a tuttavia surmanar ils participants dal traffic da sviar ad ura sin autras vias che han er pli pauca capacitad.

La suletta metoda efficazia per impedir quest traffic da sviament fiss, da serrar las sortidas che vegnan da l'autostrada A13 en las vias chantunalas en il sectur problematic. Tenor la situaziun stuess vegnir bloccada vers sid la sortida da Panaduz e vers nord la sortida da Giuvaulta.

Serrar las sortidas menziunadas avess dentant per consequenza ch'ils vitgs da Razén e Panaduz pudessan vegnir cuntanschids be da davos q. v. d. da la sortida sequenta. Per questa situaziun avess la populaziun locala probablamain pauca chapientscha. Ultra da quai avess ina tala mesira er consequenzas negativas sin las vias da colliaziun a Tusaun e La Punt, perquai che il traffic da sviament vegniss guntgì sin quellas e purtass a medem temp pli bler traffic en ils vitgs da Cazas e Summaprada ed er da Tumein e La Punt.

Da serrar las sortidas a Tusaun sid ed a La Punt è però impussibel pervi da la gronda impurtanza da las colliaziuns vers las differentas destinaziuns (Engiadina, Surselva etc.).

Per finir ston ins remartgar ch'en ils dus davos onns è vegnida sanada la via en la zona dal sutpassadi en il vitg da Panaduz. Causa quellas lavurs ha stuì vegnir reglà il traffic durant ils mais da stad cun in'ampla da traffic sin in vial. Quai è bain stà in dals motivs principals ch'i ha dà accumulaziuns ed impediments dal traffic sin la via chantunala. Ussa che las lavurs da construcziun èn finidas vegn quai ad avair consquenzas positivas sin il moviment dal traffic en ils vitgs da Panaduz e Razén durant ils dis neuralgics.

Datum: 1. d'october 2002