Navigation

Inhaltsbereich

Incumbensa Märchy-Michel concernent las regulaziuns regiunalas da las vacanzas en las scolas dal Grischun

Sessiun: 21.04.2004
La lescha davart las scolas popularas dal chantun Grischun (lescha da scola) fixescha en l'art. 19 ch'il cussegl da scola saja cumpetent per la planisaziun dals termins da scola e che soluziuns regiunalas stoppian vegnir prendidas en mira. Displaschaivlamain na funcziunescha la coordinaziun regiunala betg en moda cuntentaivla. Geniturs, dals quals ils uffants frequentan differents stgalims da scola en differents lieus da scola (scola primara, scola secundara, scola media) èn confruntads cun plans da vacanzas fitg differents. Sche domadus geniturs ston lavurar u per chasadas d'in genitur mainan questas differenzas per part a gronds problems organisatoris che limiteschan u impedeschan schizunt spezialmain tar las dunnas in'activitad professiunala.

Las sutsegnadas ed ils sutsegnads supplitgeschan la regenza d'examinar las pussaivladads che ston vegnir iniziadas per arrivar ad ina meglra coordinaziun regiunala dals termins da scola. En quest connex ston vegnir resguardadas commensuradamain las differenzas tar ils termins da vacanzas da las regiuns turisticas che vegnan chaschunadas da la stagiun.

Cuira, ils 21 d'avrigl 2004

Name: Märchy-Michel, Geisseler, Bischoff, Arquint, Augustin, Bleiker, Büsser, Casanova (Vignogn), Casty, Cavegn-Kaiser, Caviezel-Sutter (Tusaun), Christ, Christoffel, Conrad, Crapp, Donatsch, Dudli, Fasani, Federspiel, Feltscher, Fleischhauer, Gredig, Hanimann, Hardegger, Hübscher, Jaag, Jäger, Jeker, Joos-Buchli, Keller, Kessler, Kleis-Kümin, Koch, Krättli-Lori, Lemm, Mani-Heldstab, Meyer-Grass (Claustra), Meyer Persili (Cuira), Mengotti, Montalta, Nigg, Noi, Parolini, Peyer, Pfenninger, Pfiffner, Pfister, Plozza, Portner, Righetti, Rizzi, Robustelli, Schütz, Stiffler, Tomaschett, Tremp, Trepp, Wettstein, Zarn, Zindel, Campell, Mathis, Pool, Strimer

Session: 21.04.2004
Vorstoss: rg Auftrag


Resposta da la regenza

Il giavisch da coordinar chantunalmain resp. regiunalmain las vacanzas da scola vegn exprimì da differentas varts. Cun il giavisch d'ina coordinaziun pli gronda persequiteschan diversas gruppas d'interess finamiras che sa cuntrastattan en moda diametrala, ch'èn però legitimas mintgamai da lur puntg da vista. Uschia han famiglias in interess che tut las scolas che vegnan frequentadas da lur uffants (scola populara, scola media, scola professiunala) hajan sche pussaivel vacanzas il medem mument. Da l'autra vart sa giavischa la branscha turistica ina graduaziun temporara da las vacanzas, e quai tant naziunalmain sco er chantunalmain. Spezialmain las vacanzas d'enviern e da primavaira ston vegnir repartidas en il senn d'ina utilisaziun optimala dals stabiliments da sport sin uschè bleras emnas sco pussaivel. Per sai sez sa giavischan regiuns ch'èn orientadas a l'hotellaria blocs da vacanzas ordaifer la stagiun auta, spezialmain il matg.

L'incumbensa qua avant maun è formulada ord vista da la famiglia. La finamira avisada consista d'ina coordinaziun regiunala pli gronda che resguarda commensuradamain las differenzas tar ils termins da vacanzas da las vischnancas turisticas che vegnan chaschunadas da la stagiun. La regenza vesa trais mesiras pussaivlas.

1. pussaivladad: L'art. 19 da la lescha da scola sco er la lescha davart las scolas medias en il chantun Grischun e la lescha davart la furmaziun professiunala en il chantun Grischun vegnan midadas uschia ch'il departament d'educaziun, cultura e protecziun da l'ambient (DECA) sto fixar en l'avegnir las vacanzas da tut las scolas dal Grischun.

2. pussaivladad: La basa legala vegn midada uschia ch'il DECA po fixar en l'avegnir las vacanzas da tut las scolas dal Grischun.

3. pussaivladad: La basa legala resta sco ch'ella è. Las vacanzas vegnan fixadas vinavant dal purtader da scola respectiv. En il rom d'enfin uss renda il departament cumpetent attent pli fitg ils purtaders da tut las scolas dal Grischun ch'i stoppian vegnir tschertgadas soluziuns regiunalas en quai che concerna ils termins da vacanzas.

Tut las variantas han avantatgs e dischavantatgs. Cun la varianta 1 vegnan ordinadas sco giavischà las regulaziuns regiunalas da vacanzas unifitgadas. La varianta 2 dat al chantun la pussaivladad d'ordinar ina part dals termins da vacanzas (p.ex. las vacanzas da stad, d'atun, da Nadal) e da surlaschar als purtaders da scola da fixar sco enfin uss las ulteriuras vacanzas (p.ex. las vacanzas da sport, da primavaira). Varianta 1 e varianta 2 restrenschan las cumpetenzas da decider da las vischnancas resp. da las scolas medias e professiunalas regiunalas. La terza varianta correspunda al „status quo“. La schanza d'ina coordinaziun regiunala vegn mantegnida, premetta però che tut las instanzas pertutgadas sa participeschian.

Pervi dals differents giavischs en las diversas regiuns arriva mintga coordinaziun dals termins da vacanzas ad in cunfin. Perfin sch'i vegn chattada ina regulaziun da vacanzas unifitgada en las singulas regiuns saja quai facultativamain u sin ordinaziun , vegnan famiglias cun plirs uffants ad esser confruntadas cun termins da vacanzas differents, sche las scolas che vegnan frequentadas dals uffants na sa chattan betg en la medema regiun. Vacanzas unifitgadas per tut las scolas dal Grischun sa laschassan realisar mo cun ina regulaziun da vacanzas unifitgada ordinada dal chantun senza resguardar las particularitads regiunalas.

Tenor l'avis da la regenza sto per il mument en vista a la situaziun menziunada vegnir desistì d'ina restricziun da las cumpetenzas da decider dals purtaders da scola e vegnir mantegnida la schanza e cun quella er la responsabladad d'ina coordinaziun regiunala. La regenza è però pronta d'acceptar l'incumbensa uschia che la coordinaziun regiunala per reglar las vacanzas vegnia sustegnida en moda anc pli intensiva cun recumandaziuns per mauns dals purtaders da scola.

Datum: 17 da zercladur 2004