Navigation

Inhaltsbereich

Incumbensa Trepp concernent l'index per la tgira d'uffants

Sessiun: 21.04.2004
La tgira d'uffants cumplementara a la famiglia daventa in factur dal lieu pli e pli impurtant. Mammas e babs che lavuran prefereschan vischnancas, en las qualas èn avant maun plazzas adattadas da tgira per lur uffants. Vischnancas pon sa preschentar sco lieus attractivs per interpresas, sche l'infrastructura regiunala porscha in ambient adequat per forzas da lavur qualifitgadas. Latiers tutgan er purschidas da tgira per uffants ch'èn cumpatiblas cun la lavur.
In index per la tgira d'uffants augmenta il dumber da plazzas da tgira en las vischnancas dal chantun e resguarda la lunghezza da la glista da spetga, ils custs e las subvenziuns publicas. El emprova da cumpigliar tut las furmas da la tgira d'uffants cumplementara a la famiglia che permettan ina cumpatibilitad da professiun e famiglia.

Geniturs, interpresas, represchentantas e represchentants da las vischnancas ed ulteriuras persunas interessadas duain chattar qua infurmaziuns davart quellas vischnancas che disponan en cumparegliaziun d'ina purschida da tgira cun in bun standard e davart quellas vischnancas che han in basegn da cumplettaziun. L'index per la tgira duai vegnir eruì separadamain per il sectur prescolar e per il sectur da scola. L'index per la purschida totala resguarda tut las plazzas da tgira e las subvenziuns publicas e duai vegnir actualisà mintga onn. Las vischnancas pon uschia meglierar lur plazza en la glista da rangaziun.

Tenor la lescha per promover l'economia publica po il chantun far sez marketing dal lieu (art. 5) ubain er sustegnair organisaziuns regiunalas (art. 17) per augmentar la cumpetitivitad.
Las sutsegnadas ed ils sutsegnads supplitgeschan la regenza d'acceptar questa incumbensa e d'incumbensar in post adattà cun la realisaziun d'in tal index.

Cuira, ils 21 d'avrigl 2004

Name: Trepp, Meyer Persili (Cuira), Jaag, Arquint, Bucher-Brini, Cavigelli, Christ, Frigg, Hanimann, Jäger, Meyer-Grass (Claustra), Michel, Noi, Peyer, Pfenninger, Pfiffner, Schütz, Zanolari, Zindel, Florin-Caluori

Session: 21.04.2004
Vorstoss: rg Auftrag


Resposta da la regenza

Il pievel grischun ha acceptà ils 18 da matg 2003 la lescha davart la promoziun da la tgira d'uffants cumplementara a la famiglia. En il senn d'ina politica da famiglia e d'ina politica sociala moderna sco er en il senn da las pretensiuns economicas e dal martgà da lavur stgaffescha la lescha ina basa legala per la confinanziaziun da purschidas per ina tgira d'uffants cumplementara a la famiglia tras il chantun e las vischnancas. Ella concerna purschidas da tgira per uffants da la vegliadetgna prescolara e d'uffants da la vegliadetgna scolara ordaifer il temp d'instrucziun obligatori. L'instrucziun da scola concepida en blocs u il svilup da models da scolas dal di n'èn betg cumponentas da la lescha. La realisaziun da quests giavischs tutga da princip a la cumpetenza da las vischnancas.

Tenor l'art. 4 da la lescha fixeschan las vischnancas en collavuraziun cun ils purschiders renconuschids il basegn da purschidas da la tgira d'uffants cumplementara a la famiglia. En il rom da la planisaziun dal basegn per l'onn 2004 han 62 vischnancas annunzià in basegn da 212 plazzas per in onn. Il pli grond basegn mussa la citad da Cuira cun 105 plazzas per in onn. Tavau ha annunzià in basegn da 25 plazzas per in onn. San Murezzan, Samedan e Puntraschigna han gì in total da 18 plazzas. En 51 vischnancas è il basegn annunzià sut 2 plazzas per in onn. Il dumber da las plazzas da tgira che vegnan fixadas da las vischnancas e consequentamain er il basegn cumprovà èn pli bass che spetgà.

Las valurs decisivas per la cumpetitivitad dal chantun ed uschia er per il marketing dal lieu èn la disponibladad da forzas da lavur qualifitgadas, la cuntanschibladad geografica, las purschidas da furmaziun ch'èn avant maun e la grevezza fiscala per las interpresas e per las persunas natiralas. Purschidas per la tgira d'uffants èn perencunter tenor l'avis da la regenza adattadas mo restrinschidamain sco argument e factur dal lieu per il marketing dal lieu. L'efficacitad ed il niz d'in index per la tgira d'uffants per tut il chantun n'èn betg cumprovads tenor l'avis da la regenza. Ultra da quai èn la realisaziun e l'actualisaziun permanenta d'in index per la tgira d'uffants colliadas cun pulits custs da persunal.

En vista da l'effect dispitaivel sco er areguard la situaziun e las perspectivas finanzialas dal chantun considerescha la regenza sco betg inditgà da delegar al chantun l'incumbensa da manar in index per la tgira d'uffants respectivamain da laschar manar in tal tras ina terza instituziun. Ella propona perquai da refusar l'incumbensa.

Datum: 9 da zercladur 2004