Navigation

Inhaltsbereich

Dumonda Meyer Persili concernent abus sexuals da medis, da psicologs e da psichiaters cun lur pazientas

Sessiun: 16.06.2005
Adina puspè pon ins leger en las medias d'abus sexuals da medis, da psicologs e da psichiaters cun lur pazientas. Ultimamain è vegnida cumprovada la culpa d'in medi a Zug. En in artitgel dal "Schweizerischer Beobachter" han ins pudì leger en quest connex ch'i dettia en Svizra tenor in psichiater da Basilea che s'occupa dapi onns cun quest tema circa 14'000 cas d'abus sexuals per onn, spezialmain da medis. Mo ina part fitg pitschna dals delinquents vegn chastiada per quai e paucs cas daventan insumma publics. Pertge ch'i sa tracta per gronda part da dunnas giuvnas che sa laschan tementar e che n'inoltreschan betg ina denunzia penala u che na sa drizzan betg a la publicitad perquai ch'ellas han tema u perquai ch'ellas sa turpegian. Ina gruppa da lavur da medis e da psichiaters ha pervi da quai dumandà la federaziun da las medias e dals medis svizzers (FMH) d'endrizzar in post da cussegliaziun e da stgaffir in register per registrar ils medis, dals quals l'admissiun da pratitgar la professiun è gia ina giada vegnida restrenschida pervi d'acts sexuals.

Concernent abus sumegliants da persunas d'instrucziun envers scolaras e scolars ha ina consultaziun correspundenta mussà che tut ils chantuns beneventan sin plaun federal ina basa legala per manar ina glista (in'uschenumnada "glista naira") da persunas d'instrucziun, a las qualas è vegnida retratga cun vigur legala en il rom d'ina decisiun chantunala la permissiun d'instruir u la permissiun per pratitgar la professiun.

Nus supplitgain la regenza da respunder pervi da quai las suandantas dumondas:

1. Quants cas da tals abus en noss chantun enconuscha l'autoritad da surveglianza?

2. En quants cas hai dà ina investigaziun disciplinara u penala ed eventualmain cun tge resultats?

3. Maina l'autoritad da surveglianza da noss chantun ina statistica correspundenta?

4. Tge tenuta ha la regenza envers la creaziun d'ina "glista naira" correspundenta per medis, per psicologs e per psichiaters sentenziads, analogamain a tala da persunas d'instrucziun?

5. Datti en noss chantun in post da consultaziun, al qual las dunnas pertutgadas pon sa drizzar?

Cuira, ils 16 da zercladur 2005

Name: Meyer Persili (Cuira), Trepp, Bucher, Arquint, Baselgia-Brunner, Frigg, Jaag, Jäger, Meyer-Grass (Claustra), Noi, Peyer, Pfenninger, Pfiffner, Schütz, Zindel, Brasser, Caviezel (Cuira), Gartmann, Monigatti

Session: 16.06.2005
Vorstoss: rg Anfrage


Resposta da la regenza

Tranter las persunas che pratitgeschan ina professiun dal sectur da la sanadad e tranter las persunas che vegnan tractadas dad ellas exista ina relaziun da confidenza e da dependenza. Las persunas che vegnan tractadas ston pudair sa fidar dal fatg che la persuna che las tracta observia ils cunfins, las protegia e n'ageschia betg or d'interess persunals. Da la terapia resulta per regla in ferm liom da la persuna tractada cun sia terapeuta u cun ses terapeut e quai stgaffescha er ina relaziun da dependenza. Abus sexuals en il rom da relaziuns terapeuticas èn adina ina manifestaziun d'abusar, da manipular e da nizzegiar relaziuns da confidenza u da dependenza. Correspundentamain èn els ina cuntravenziun cunter las reglas eticas e pia er
ina cuntravenziun massiva cunter las reglas fundamentalas da l'art medicinal respectiv.
Or da vista da l'autoritad da surveglianza da la polizia sanitara ston vegnir qualifitgads acts sexuals da persunas tractantas sche quels èn cumprovads tenor ils fatgs sco cuntravenziun cunter l'obligaziun professiunala dal tractament tenor princips etics ch'è cuntegnida en l'art. 3 da la lescha da sanadad. Tut tenor la dimensiun da l'act dal delict sto l'autoritad da surveglianza examinar en il rom d'ina procedura administrativa da retrair parzialmain u schizunt totalmain la permissiun per pratitgar la professiun.

Entant che las medias spezialisadas ed ils medis spezialisads per "psichiatria e psicoterapia" che vegnan menziunads en la dumonda sco er las psicoterapeutas ed ils psicoterapeuts possedan ina permissiun per pratitgar la professiun, po vegnir exequida la professiun da psicologa u da psicolog senza permissiun. En quests cas na stat actualmain a disposiziun a l'autoritad da surveglianza da la polizia sanitara nagina basa legala d'instradar ina procedura administrativa en cas d'eventualas cuntravenziuns. En il rom da la revisiun parziala da la lescha davart ils fatgs da sanadad dal chantun Grischun sco er en il sboz tar ina lescha federala davart las professiuns psicologicas è previsa la basa necessaria per chastiar er cuntravenziuns sexualas da tut las ulteriuras persunas che pratitgeschan ina professiun dal sectur da la sanadad.

Areguard l'artitgel en il "Schweizerischer Beobachter", sin il qual la dumonda sa basa, èsi da constatar che la funtauna per propi è ina retschertga fatga ad Ontario, Canada. Il resultat da questa retschertga è vegnì transponì d'ina gruppa da lavur da la societad medicinala da Basilea sin las relaziuns da la Svizra. Da quai resulta la supposiziun ch'i saja da quintar en Svizra cun annualmain 14'000 abus sexuals. Il "Beobachter" ha surpiglià questa supposiziun en ses rapport.

Respostas a las dumondas

1. A l'autoritad da surveglianza n'èn enconuschents nagins abus sexuals da medias e da medis. In psicolog atgisà dal fatg d'avair ademplì il causal penal d'avair nizzegià ina situaziun da basegn tenor l'art. 193 CP è vegnì acquittà da la dretgira. Per mancanza d'ina basa legala correspundenta n'avess l'autoritad da surveglianza en quest cas er cun ina condemnaziun betg gì la pussaivladad d'intervegnir.

2. Fin uss n'hai dà naginas inquisiziuns disciplinaras u penalas en il chantun pervi da tals abus sexuals.

3. Per mancanza da tals cas n'èsi fin uss betg stà necessari da far ina statistica correspundenta.

4. La regenza ha da princip ina tenuta positiva visavi il far ina glista da las medias spezialisadas e dals medis spezialisads, da las psicoterapeutas e dals psicoterapeuts, da las psicologas e dals psicologs sco er d'autras persunas che pratitgeschan ina professiun dal sectur da la sanadad, uschenavant che quella è cumparabla cun la legislaziun davart la protecziun da datas. En quest connex stoi vegnir constatà che cun l'entrada en vigur da la lescha federala davart las professiuns medicinalas universitaras e cun la revisiun da la cunvegna interchantunala davart la renconuschientscha da certificats da scolaziun per persunas che pratitgeschan ina professiun dal sectur da la sanadad duain vegnir creads registers naziunals, en ils quals i vegn desistì tranter auter er d'eventualas proceduras administrativas per retrair la permissiun per pratitgar ina professiun. Dentant vegnan quests registers a star a disposiziun per motivs da la protecziun da datas mo a las autoritads da surveglianza.

5. Las persunas pertutgadas pon purtar plant tar la procura publica, tar la polizia chantunala u tar il departament da giustia, polizia e sanitad en sia funcziun sco autoritad da surveglianza. In sustegn survegnan las persunas pertutgadas er dal post da cussegliaziun per l'agid a victimas dal chantun Grischun che vegn manà da l'uffizi dal servetsch social.

Datum: 26 d'avust 2005