Navigation

Inhaltsbereich

Incumbensa da fracziun da la PLD Hanimann concernent la promoziun da la forza idraulica

Sessiun: 13.02.2006
La promoziun e l'amplificaziun da la forza idraulica è da la pli gronda impurtanza per il Grischun or dal puntg da vista da l'economia publica, da l'economia regiunala, da l'economia da l'energia sco er da l'ecologia. Pervi da las atgnas resursas è il Grischun predestinà da far ina politica d'energia. E quai tant dapli perquai ch'il consum d'electricitad s'augmenta permanentamain per il mument e perquai che la producziun d'electricitad sa chattava l'onn passà cleramain sut la media pervi dal nivel il pli bass dals lais da serra.
Per augmentar la schanza da l'energia indigena che vegn producida cun forza idraulica ston vegnir mess ils suandants accents or dal puntg da vista da las interpellantas e dals interpellants:
1. Las participaziuns decisivas dal chantun e da las vischnancas a las societads d'ovras electricas na dastgan betg vegnir tractadas sco participaziuns finanzialas e na dastgan pervi da quai betg vegnir vendidas. A lunga vista èn quellas decisivas per il provediment d'energia dal chantun e pervi da quai d'ina gronda impurtanza strategica per l'economia publica.
2. Las scadenzas da la concessiun ston - en il senn da l'impurtanza strategica - vegnir messas en il servetsch da la politica d'energia sco part da la politica economica e betg en il servetsch da la politica da finanzas. En connex cun las scadenzas da la concessiun sto vegnir fatg tut per che la valur agiuntada che deriva da la forza idraulica vegnia transferida tant sco pussaivel en il Grischun.
3. Las proceduras che ston vegnir passadas per utilisar la forza idraulica ston vegnir acceleradas. Cun tut ils meds politics ston vegnir fatgs sforzs che las decisiuns definitivas davart las ovras electricas idraulicas restian en mauns dals chantuns (p.ex. davart l'examinaziun ecologica, davart la planisaziun da protecziun e d'utilisaziun e.u.v.).
4. La forza idraulica resta il trumf dal Grischun. En cas d'ina ulteriura utilisaziun da la forza idraulica sto vegnir favurisada la producziun d'energia per il consum maximal. Las pussaivladads d'engrondiment ch'existan ston vegnir realisadas uschè spert sco pussaivel.
5. En vista a las disposiziuns da protecziun ch'èn gia oz fitg rigurusas ston activitads che cuntrafan a la promoziun da las energias regenerablas vegnir cumbattidas activamain (p.ex. iniziativa da revitalisaziun [iniziativa aqua viva] u la regulaziun da las undadas en la lescha davart la protecziun da las auas (sbassament ed undada).
6. L'access als martgads internaziunals è da la pli gronda impurtanza per las societads d'ovras electricas ch'èn activas en il chantun Grischun. La forza idraulica dovra l'avertura dal martgà d'electricitad. Cundiziuns da basa che sustegnan quest svilup sco la lescha davart il provediment d'electricitad u la lescha davart ils implants electrics ston vegnir sustegnidas.
È la regenza er da l'avis
a) ch'ils puncts centrals menziunads qua survart èn las pitgas da la politica chantunala d'energia, ch'els ston esser decisivs per tala e ch'els ston vegnir precisads en in rapport da la regenza al cussegl grond?
b) che las disposiziuns legalas actualas dal chantun bastian per cuntanscher las finamiras avisadas cun ils accents menziunads qua survart?
c) ch'il know-how da la politica d'energia sto vegnir mantegnì sin tut ils plauns dal chantun e forsa schizunt amplifitgà per pudair prender las dretgas decisiuns per il futur?
d) ch'il project da la "ovra electrica da cunfin En" sco er auters projects d'engrondiment en il sectur da la forza idraulica (p.ex. l'ovra d'accumulaziun a pumpa Curciusa) ston vegnir sustegnids dal puntg da vista dal chantun e che las lavurs preparativas necessarias ston ussa vegnir prendidas per mauns per ch'i possia vegnir agì spert en cas d'ina interessenza da l'economia d'electricitad?
e) che projects per revitalisar il Rain da las Alps sin il territori dal chantun Grischun èn dal tuttafatg cuntraris a las finamiras da la politica d'energia?
Cuira, ils 13 da favrer 2006

Name: Hanimann, Bachmann, Bär, Barandun, Bischoff, Bühler-Flury, Casanova (Cuira), Christ, Donatsch, Feltscher, Giacometti, Hartmann, Hess, Jenny, Kessler, Marti, Mengotti, Michel, Perl, Rizzi, Robustelli, Thomann, Tramèr, Wettstein, Bernhard

Session: 13.02.2006
Vorstoss: rg Auftrag



Resposta da la regenza

Fin dacurt aveva la regenza adina puspè la pussaivladad da s'exprimer davart l'impurtanza da la forza idraulica per il chantun Grischun en spezial e per la producziun da forza electrica en general. En quest connex pon vegnir menziunadas las finamiras da la politica d'energia ed il rapport davart las consequenzas da la liberalisaziun dal martgà d'electricitad (missivas carnet nr. 8/1999 - 2000) ma er il plan directiv chantunal, relaschà da la regenza ils 19 da november 2002, e la reposta da la regenza sin la dumonda Jeker concernent il futur segir da l'energia da la forza idraulica (PCG 2004/2005, paginas 737, 1032).
Cun l'incumbensa da fracziun vegn la regenza intimada da definir las pitgas da la politica chantunala d'energia e da stgaffir las premissas per mantegnair la valur da la forza idraulica ch'è avant maun e per amplifitgar la forza idraulica. Las dumondas sa laschan respunder en detagl sco suonda:
a) La regenza va per gronda part d'accord cun las pretensiuns che furman la basa da las cifras 1 fin 6 da questa incumbensa da fracziun. Però na vesa ella nagin motiv da definir anc ina giada las pitgas da la politica chantunala d'energia en in ulteriur rapport. Ensemen cun las ponderaziuns davart il provediment d'energia e davart la producziun da forza electrica fatgas en il plan directiv chantunal sco mussavia per la politica chantunala d'energia èn circumscrittas suffizientamain las finamiras da la politica d'energia da l'onn 2000. Areguard il dretg da finanzas renviescha la regenza al fatg ch'ina retscha da participaziuns è vegnida transferida en la facultad administrativa a chaschun da la revisiun totala da la lescha davart las finanzas (en vigur dapli il 1. da schaner 1999). En quai che concerna las participaziuns correspundentas demussa quai che la regenza valitescha l'impurtanza da la politica d'energia e da provediment d'ina vart e l'impurtanza per l'economia publica da l'autra vart pli fitg che las aspectativas da rendita e da dividendas. La regenza vul dentant sa resalvar la libertad da pudair giuditgar en il cas singul, sche la participaziun correspundenta saja necessaria u betg per cuntanscher las finamiras da la politica d'energia.
b) La regenza resguarda las disposiziuns vertentas da la lescha davart il dretg da las auas sco suffizientas per pudair persequitar las atgnas finamiras. Ina impurtanza speziala han en quest connex il dretg francà da las vischnancas e dal chantun da sa participar vi d'interpresas d'ovras electricas sco er las disposiziuns davart la scadenza da la concessiun ch'èn vegnidas adattadas l'ultima giada l'onn 1995.
c) Tgi che vul defender effectivamain ils interess da la communitad en il rom da surdadas da concessiun e d'adattaziuns da la concessiun, ma er en il rom da tractativas davart la scadenza da la concessiun, sto avair enconuschientschas profundas dal dretg da las auas, da la politica d'energia en general e da l'economia d'electricitad en spezial. Quest know-how è avant maun tar il chantun. Pervi da quai na vesa la regenza nagin motiv da midar insatge vi da las cumpetenzas actualas concernent las dumondas dal dretg da las auas e da la politica d'electricitad.
d) La decisiun da renovar, d'optimar u d'engrondir in'ovra electrica è en emprima lingia ina decisiun d'interpresa. Quai èn las interpresas che ston decider davart talas investiziuns sin basa da lur analisa dal martgà. Per il chantun vali da mantegnair resp. da stgaffir bunas cundiziuns generalas per quai. Ina impurtanza speziala survegn en quest connex il plan directiv chantunal, cun il qual ils potenzials nunutilisads vegnan tegnids libers preventivamain per garantir a lunga vista il provediment d'electricitad.
e) Il concept da svilup per il Rain alpin menziunà persequitescha la finamira a lunga vista per in svilup persistent dal territori dal Rain alpin. Consequentamain s'occupa el centralmain cun ils temas da la protecziun cunter aua gronda, dal provediment d'aua da baiver, da l'ecologia ma er da l'utilisaziun da la forza idraulica. Il concept da svilup na po en quest connex absolutamain betg impedir la suveranitad da las auas da las vischnancas territorialas e - collià cun quai - ina ponderaziun dals interess.


Datum: 18. April 2006