Dumonda Peyer concernent l'assistenza e la cussegliaziun da requirentas e da requirents d'asil sco er da requirentas e da requirents d'asil che la polizia da persunas estras dal Grischun ha refusà
Sessiun: 24.04.2006
A l'avis da la fracziun da la PS ha l'excorporaziun da l'organisaziun d'asil or da l'uffizi dal servetsch social chantunal e sia subordinaziun sut l'uffizi da polizia chaschunà in pegiurament da las cundiziuns da viver da las requirentas e dals requirents d'asil pertutgads sco er da las requirentas e dals requirents d'asil refusads.
Per l'assistenza n'ha la polizia da persunas estras evidentamain betg pli engaschà lavureras socialas diplomadas e lavurers socials diplomads. Plinavant vegnan visadas evidentamain cun sistem las abitaziuns, en las qualas las famiglias fugitivas dimoran ed ils umans er famiglias bain integradas vegnan tramess enavos en ils centers transitorics. Quai capita evidentamain cun la clera intenziun d'augmentar la pressiun d'als far partir.
Plinavant stoi vegnir constatà ch'ils agids d'integraziun vegnan tralaschads pli e pli e che la malsegirezza daventa cultura da mintgadi tar las persunas pertutgadas. En almain in cas d'ina pazienta fermamain traumatisada ans èsi vegnì conscient che las prestaziuns per translaturas u per translaturs èn vegnidas stritgadas senza motiv e senza cumpensaziun. Quai ha chaschunà in grev pegiurament d'in tractament ch'era gia difficil.
Per resumar stoi vegnir constatà che la maschaida d'incumbensas da la polizia e d'incumbensas socialas ha gì per consequenza che l'accumpagnament emfatic è vegnì reducì e ch'ils organs repressivs d'execuziun e da spedida èn vegnids rinforzads.
Las commembras sutsegnadras ed ils commembers sutsegnaders da la fracziun da la PS supplitgeschan la regenza da respunder las suandantas dumondas:
1. Co giuditgescha la regenza ord vista d'ozendi l'excorporaziun da l'organisaziun d'asil or da l'uffizi dal servetsch social chantunal?
2. Co è la relaziun tranter las resursas finanzialas e las resursas persunalas che vegnan impundidas per il champ repressiv da la polizia respectivamain per il champ social da l'assistenza?
3. Cun tge meds vegn garantida l'assistenza sociala da las requirentas e dals requirents d'asil?
4. Co vegnan preparads las collavuraturas ed ils collavuraturs da la polizia da persunas estras e dals ulteriurs uffizis cumpetents per lur lavur (scolaziun), co vegnan ellas ed els accumpagnads (coaching) e controllads (controlling)?
5. Tge èn las finamiras da lur lavur e vulan quellas plitost cuntanscher uschè bleras spedidas sco pussaivel u miran ellas ad in accumpagnament cumpetent?
6. Tge midadas vi dal sistem actual èn necessarias a l'avis da la regenza?
Cuira, ils 24 d'avrigl 2006
Name: Peyer, Trepp, Pfiffner, Arquint, Baselgia, Bucher-Brini, Frigg, Jaag, Jäger, Meyer Persili (Cuira), Noi, Pfenninger, Schütz, Zindel, Brasser, Caviezel (Cuira)
Session: 24.04.2006
Vorstoss: rg Anfrage
Resposta da la regenza
1. In giudicament da las novas structuras organisatoricas suenter mo quatter mais para a la regenza memia baud. Sin fundament da las experientschas cun las novas structuras da manaschi èsi dentant sa cumprovà che tut il sectur d'asil e da persunas da l'exteriur è vegnì mess sut la medema direcziun. Ils andaments pon vegnir coordinads meglier; spezialmain en il sectur da l'administraziun pon ins profitar da sinergias. I resultan er respargns finanzials, cun ils quals i pon vegnir gulivadas las reducziuns da las indemnisaziuns da la confederaziun ch'èn succedidas perquai ch'il dumber da dumondas d'asil è sa sminuì fermamain e pervia da differents programs da spargn da la confederaziun.
2. En il sectur da collocaziun e d'assistenza èn engaschadas 22 collavuraturas e collavuraturs (1734 pertschients da plazzas) e butgetads custs da salari da 2'630'000. francs. En il sectur da proceduras e d'execuziuns vegnan engaschads tschintg collavuraturas e collavuraturs (450 pertschients da plazzas) e bugetads custs da salaris da ca. 425'500. francs. En la secziun ch'è activa per omadus secturs èn occupadas set collavuraturas e collavuraturs supplementars (550 pertschients da plazzas).
3. L'assistenza sociala da requirentas e da requirents d'asil en alloschis collectivs succeda tras la direcziun da la chasa en collavuraziun cun las persunas d'assistenza. Quai èn per il solit las medemas persunas che han gì funcziuns d'assistenza gia en las organisaziuns d'asil existentas. Requirentas e requirents d'asil ch'èn collocads en abitaziuns vegnan assegnads en il rom dal concept d'assistenza surlavurà ad in dals quatter alloschis collectivs da Cuira (2), da Schluein e da Landquart, nua ch'ellas ech'els survegnan assistenza. En fatgs socials vegnan els assistids da la direcziun resp. da las persunas d'assistenza dals alloschis collectivs respectivs. Per cas cumplitgads stattan a disposiziun collavuraturas e collavuraturs cumpetents cun enconuschientschas correspundentas u ch'i pon vegnir consultadas terzas persunas.
4. Tar las persunas responsablas en il sectur da collocaziun e d'assistenza sa tracti en mintga cas da persunas ch'èn gia ditg activas en il sectur d'asil e che disponan d'experientschas professiunalas spezialas da blers onns. Perquai na fai betg basegn d'ina preparaziun speziala. L'introducziun da las collavuraturas e dals collavuraturs sa drizza tenor las incumbensas; novas collavuraturas e novs collavuraturs vegnan scolads specificamain per lur funcziun e per lur incumbensa. Sin il champ da la scolaziun e da la furmaziun supplementara da las collavuraturas e dals collavuraturs dal sectur da collocaziun e d'assistenza èn planisadas midadas. Sco fin ussa frequentan ellas ed els las purschidas da furmaziun supplementara da l'uffizi federal da migraziun sco er ils curs generals da furmaziun supplementara da l'uffizi chantunal da persunal e d'organisaziun. In sistem spezial da controlling per las collavuraturas e per ils collavuraturs da l'uffizi da fatgs da polizia e da dretg civil dal Grischuna na datti betg. Ellas ed els vegnan giuditgads regularmain tras lur persunas superiuras, sco tut las autras collavuraturas e tut ils auters collavuraturs da l'administraziun chantunala.
5. Al chantun suttastat l'assistenza e la collocaziun da las requirentas e dals requirents d'asil sco er l'execuziun da decisiuns d'asil cun vigur legala (art. 46 al. 1 lescha d'asil; CS 142.31). Per ademplir sias incumbensas sto l'uffizi resguardar las prescripziuns da la confederaziun, dentant er ils princips generals da l'administraziun. L'assistenza e la collocaziun da requirentas e da requirents d'asil sto lura vegnir concepida uschia che las pauschalas e las indemnisaziuns che la confederaziun paja per cuvrir ils custs tanschan e ch'i na stoppian betg vegnir duvrads meds finanzials chantunals supplementars per quai. Ulteriuras prescripziuns en il senn ch'in sectur d'incumbensas avess prioritad na datti betg.
6. Tenor l'avis da la regenza na s'imponia betg ussa, mo paucs mais suenter lur introducziun da curreger las midadas organisatorias e las adattaziuns administrativas ch'eran vegnidas fatgas pir il 1. da schner 2006 .
Datum: 3 fanadur 2006