Navigation

Inhaltsbereich

Dumonda Trepp concernent il tractament da requirentas e da requirents d'asil cun ina decisiun da betg entrar en chaussa (RBEC)

Sessiun: 24.04.2006
Differents eveniments dals ultims onns ch'èn succedids tant en l'entira Svizra sco er tar nus en Grischun dattan perditga a l'avis da la fracziun da la PS d'ina direzza, d'ina fradaglia e d'ina nunchapientscha pli e pli gronda visavi ils giavischs giustifitgads dals umans che tschertgan refugi cunter la persecuziun u er lavur tar nus. Quai testimonieschan displaschaivlamain plirs fatgs che tanschan da la negligientscha visavi expressiuns rassisticas fin tar attatgas violentas.

Plinavant stoi vegnir constatà ch'il chantun Grischun refusescha, retardescha, retira u collia cun cundiziuns absurdas adina puspè l'agid d'urgenza a requirentas ed a requirents d'asil cun decisiun da betg entrar en chaussa. El fa quai, schebain ch'ils chantuns èn obligads tras ina decisiun dal tribunal federal da conceder senza cundiziuns il minimum d'existenza absolut. L'uschenumnada "rait da solidaritad da la Svizra da l'ost" ha pia l'incumbensa da laschar accumpagnar sin giavisch e tenor voluntad requirentas e requirents d'asil che dumondan per l'emprima giada agid d'urgenza en il Grischun da persunas che prestan lavur voluntara.

Tenor infurmaziuns ch'èn enconuschentas a la fracziun da la PS è ina persuna ch'ha dumandà agid d'urgenza vegnida arrestada immediat ed en preschientscha da ses accumpagnader tar la polizia da persunas estras a Cuira. In cas sumegliant è succedì ils 4 d'avrigl 2006, medemamain en il biro da la polizia da persunas estras. En quest cas è medemamain vegnida prendida immediat en arrest d'expulsiun ina persuna che vuleva s'annunziar voluntarmain ed accumpagnada d'in gidanter per dumandar agid d'urgenza e per chattar ina soluziun degna per sia partenza. Questa persuna fa ina chauma da la fom en la praschun d'expulsiun Sennhof.

In tal proceder da las autoritads cumpetentas discreditescha las gidantras ed ils gidanters en ina moda e maniera extrema. Cun bun dretg pon las requirentas ed ils requirents d'asil crair ch'els vegnian surdads da quests organs directamain a las autoritads. Uschia vegn ina cussegliaziun che sa basava sin la confidenza sutminada da las autoritads.

Las commembras sutsegnadras ed ils commembers sutsegnaders da la fracziun da la PS supplitgeschan la regenza da respunder las suandantas dumondas:

1. Tge posiziun ha la regenza visavi quests eveniments?

2. È la regenza pronta da dar la garanzia a requirentas ed a requirents d'asil cun ina decisiun da betg entrar en chaussa (RBEC) che s'annunzian voluntarmain che, sch'ellas e sch'els coopereschan correspundentamain, i vegn er gidà ad ellas ed ad els a tschertgar ina soluziun degna per lur partenza, ma ch'ellas e ch'els na vegnan dentant betg arrestads fin a quest termin?

3. È la regenza pronta da respectar la preziusa lavur da las persunas che lavuran sin il champ da las fugitivas e dals fugitivs e da betg pli las discreditar tras tals eveniments?

Cuira, ils 24 d'avrigl 2006

Name: Trepp, Peyer, Pfiffner, Arquint, Baselgia, Bucher-Brini, Frigg, Jaag, Jäger, Meyer Persili (Cuira), Noi, Pfenninger, Schütz, Zindel, Brasser, Caviezel (Cuira)

Session: 24.04.2006
Vorstoss: rg Anfrage


Resposta da la regenza

Cun las revisiuns da la lescha d'asil (LAsil; CS 142.31) e da la lescha federala davart la dimora ed il domicil dals esters (LDDE; CS 142.20; en vigur dapi il 1. d'avrigl 2004) ch'èn vegnidas fatgas en il rom dal program da distgargia 2003 (PD 03) vegnan persunas dal sectur d'asil cun ina decisiun da betg entrar en chaussa (BEC) che ha vigur legala exclusas da l'assistenza d'asil e suttamessas a la LDDE sco persunas da l'exteriur che sa chattan illegalmain en Svizra. Requirentas e requirents d'asil cun ina BEC cun vigur legala ston bandunar immediatamain la Svizra. Per la preparaziun e per l'organisaziun dal return en il pajais d'origin stattan a disposiziun a talas persunas posts da cussegliaziun per il return. La premissa per il sustegn èn la prontezza da returnar e la revelaziun da l'identitad. Persunas che na fan betg diever da questa purschida vegnan tramessas davent dal center d'accoglientscha cun la cundiziun da bandunar la Svizra. Sche quellas persunas vegnan suenter tschiffadas u passan tar in'autoritad ch'è cumpetenta per las persunas estras, examinescha quella sco tar tut las persunas da l'exteriur che sa trategnan illegalmain en Svizra las pussaivladads per exequir cun forza la spedida. Sche las pussaivladads èn dadas e sche las premissas èn ademplidas per ordinar l'arrest d'expulsiun tenor l'artitgel 13b LDDE vegn ordinà quel arrest.

1. Tar ils cas singuls menziunads en l'intervenziun sa tracti da persunas che na dattan betg suatientscha a l'obligaziun ch'è vegnida imponida ad ellas per bandunar voluntariamain la Svizra. Cunquai che omaduas persunas n'han betg fatg diever da la cussegliaziun per il return e cunquei ch'ellas n'han betg preschentà motivs che han impedì ellas da partir confurm a l'obligaziun, èn omaduas persunas vegnidas messas en arrest d'expulsiun. Il proceder da l'uffizi da fatgs da polizia e da dretg civil è confurm a la lescha e na sto betg vegnir contestà. Quest post da servetsch è cumpetent per l'execuziun dal dretg d'asil (art. 46 al. 1 LAsil; art. 3 da l'ordinaziun executiva tar la legislaziun federala davart ils esters ed ils fatgs d'asil; DG 618.100) ed er obligà da far quai.

2. Decisiv è il mument che vegn fixà per la requirenta resp. per il requirent d'asil per bandunar la Svizra. Fin ch'il termin da partenza scada, vegn purschì a la persuna refusada cussegliaziun ed agid per il return. Sch'ina requirenta u in requirent d'asil na profita betg da la pussaivladad da partir voluntariamain entaifer il termin da partenza fixà, sto questa persuna sco consequenza da sia dimora illegala far quint da vegnir prendida en arrest d'expulsiun e da vegnir manada enavos en ses pajais d'origin. Tenor la lescha federala è l'uffizi da fatgs da polizia e da dretg civil l'autoritad cumpetenta per ordinar in arrest preparatoric u in arrest d'expulsiun. La regenza n'è betg cumpetenta e pervi da las prescripziuns dal dretg federal er betg pronta da contractar cun persunas da las qualas il termin da partenza è scadì nunutilisà davart las modalitads da partenza e da las laschar en libertad fin il termin da lur partenza. Ella na po perquai betg dar garanzias correspundentas.

3. En la procedura d'asil fan numerusas persunas ed organisaziuns privatas lavur umanitara preziusa en uffizi d'onur. La regenza respecta e stima quest engaschi. La stima da questa lavur chatta dentant ses cunfins tar l'abus evident da la procedura d'asil. Tenor l'avis da la regenza na dastgi betg esser che persunas che na dattan aposta betg suatientscha a lur obligaziun da partir pon sa render sut la protecziun da persunas u d'organisaziuns caritativas per sa proteger da l'execuziun sfurzada da lur decisiun d'asil. Perquai na po la realisaziun dal dretg vertent en nagin cas vegnir cumpareglià cun la discreditaziun dals sforzs umanitars.

Datum: 3 fanadur 2006