Navigation

Inhaltsbereich

Dumonda Arquint concernent ina burgaisa da la UE ch'è sa domiciliada a S-chanf

Sessiun: 25.04.2006
Il fatg che la dunna F.B. ha prendì domicil a S-chanf è stà in tema actual en tut la Svizra. Ina dunna taliana che deriva - sco ch'i para - da relaziuns fitg modestas prenda domicil a S-chanf e lascha renovar la chasa engiadinaisa en moda luxuriusa. Sin basa da la cunvegna dal 1. da zercladur 2006 cun la UE pon persunas pensiunadas d'in stadi commember da la UE survegnir ina permissiun facilitada da dimora B, sche tschertas cundiziuns èn ademplidas (sco p.ex. il domicil, la situaziun finanziala e.u.v.). Tals cas na crodan pia betg sut las disposiziuns da la lescha davart l'acquist da bains immobigliars tras persunas a l'exteriur. Qua nascha il suspect che questa pratica po er vegnir duvrada per guntgir la lescha menziunada qua survart. En quest connex sa tschenta spezialmain la dumonda, quant seriusamain e quant detagliadamain che la polizia da persunas estras e l'administraziun da taglia sclereschan gia en la procedura da permissiun eventualas guntgidas.

Nus dumandain la regenza:
1. Davart la dimora
1. 1. Tenor il CCS na dastgan naginas persunas avair lur domicil stabel en dus lieus. Cur che la permissiun da domicil vegn dada, vegni alura controllà dal chantun tar cas sco tal da la dunna F.B., sche l'annunzia da la partenza da l'anteriur domicil è avant maun?
1.2. Èsi insumma permess da prender domicil en ina vischnanca grischuna senza sa trategnair là fisicamain, forsa cun ina empermischun ch'ins veglia viver là 1 u 2 onns pli tard?
1.3. Co fa il chantun las controllas, en spezial tar cas, nua ch'il prender in domicil stabel - per exempel da persunas pensiunadas dal territori da la UE - pudess vegnir abusà per guntgir la lex Koller ch'è actualmain en vigur?
2. Davart la situaziun finanziala
2. 1. Èn las relaziuns finanzialas vegnidas examinadas en il cas F.B. ed han ins pudì excluder davart dal chantun ch'i sa tracta da fatschentas illegalas tar las transacziuns finanzialas ch'èn vegnidas fatgas en Svizra?
2.2. Po la regenza almain dar infurmaziuns davart la dumonda, sch'igl è vegnì fatg diever da la pussaivladad da far ina "taxaziun pauschala" tenor la lescha d'armonisaziun da taglia en il cas F.B.?
2.3. Co è stà il svilup da las persunas taxadas en moda pauschala en il chantun Grischun ils ultims 5 onns?
3. En general
Il cas F.B. ch'è vegnì enconuschent pervi da las medias ha demussà las difficultads en connex cun las praticas commerzialas tar transacziuns immobigliaras cun persunas da l'exteriur.
3. 1. Tge mesiras fa la regenza quint da prender per impedir - per motivs da la constituziunalitad - che la lex Koller vegnia guntgida, e quai betg pir posteriuramain, p.ex. pervi da rapports en las medias u pervi da denunzias, mabain gia en connex cun la procedura da permissiun?
3.2. Tge mesiras fa la regenza quint da prender per far endament a las vischnancas - ch'èn savens surdumandadas - ch'ellas hajan tschertas obligaziuns e co quinta la regenza da procurar ch'ellas las observian er?

Cuira, ils 24 d'avrigl 2006

Name: Arquint, Bucher-Brini, Caviezel (Cuira), Baselgia, Frigg, Jäger, Meyer Persili (Cuira), Peyer, Pfenninger, Pfiffner, Schütz, Trepp, Zindel, Brasser

Session: 25.04.2006
Vorstoss: rg Anfrage



Resposta da la regenza

Il dretg davart la libra circulaziun da persunas conceda a burgaisas ed a burgais da stadis da la CE/AECL in dretg da dimora e statutescha in'egualitad cun Svizras e cun Svizzers areguard la cumpra d'in bain immobigliar, sch'il domicil principal vegn transferì en Svizra. En cas da l'admissiun hai dà ina midada en quel senn ch'ins ha bandunà il sistem d'enfin uss. Dar ina permissiun è daventà da nov la regla. Cunquai ch'il pievel ha acceptà la cunvegna davart la libra circulaziun da persunas ston er vegnir acceptadas las consequenzas correspundentas.

1.1 Il chantun n'ha - en cas d'ina immigraziun da l'exteriur - facticamain naginas pussaivladads da procurar confermas da l'annunzia da partenza da vischnancas da domicil da l'exteriur u da controllar l'annunzia da partenza a l'exteriur. Ultra da quai datti urdens giuridics che enconuschan plirs domicils.

1.2 Sch'ina persuna prenda domicil en ina vischnanca grischuna u svizra ha quai la consequenza legala ch'ella sto s'annunziar tar la vischnanca. Ina dimora per propi ch'è colliada cun cundiziuns davart la durada n'è betg prescritta.

1.3 Dapi il 1. da zercladur 2002 na valan burgaisas e burgais da stadis da la CE/AECL che han lur domicil factic e giuridic en Svizra betg pli sco persunas da l'exteriur e n'èn uschia betg suttamessas a la lex Koller. En cas da l'acquist da bains immobigliars n'èn ellas ed els betg suttamess ad ina controlla speziala ed il dretg federal na prevesa betg ina procedura da permissiun speziala. Sch'il chantun constatescha in stadi illegal, vegn quel eliminà.

2.1 Sche l'abundanza dals meds finanzials è la premissa per conceder ina permissiun, vegnan las relaziuns finanzialas controlladas da l'uffizi da fatgs da polizia e da dretg civil. En cas da burgaisas e da burgais da la CE/AECL che n'han nagina activitad da gudogn dastgi mo vegnir controllà, sche questa persuna ha avunda meds finanzials per pajar ils custs da viver. L'uffizi da fatgs da polizia e da dretg civil controllescha en il cas concret - sco en tut ils auters cas, sch'ils meds finanzials èn avant maun. La controlla da la legalitad da singulas transacziuns finanzialas è sullettamain chaussa da las autoritads ch'èn cumpetentas per la persecuziun penala.

2.2 Tenor l'art. 122 da la lescha da taglia ston las autoritads da taglia observar ina discreziun severissima en connex cun las constataziuns ch'ellas fan en connex cun lur activitad uffiziala. Infurmaziuns a terzas persunas basegnan il consentiment da la pajataglia u dal pajataglia. Questas directivas na permettan betg da respunder la dumonda, sch'ina taxaziun tenor l'art. 14 LT è vegnida cunvegnida.

2.3 Ils ultims onns è il dumber da persunas da l'exteriur che vegnan taxadas en moda pauschala restà quasi identic (2000: 226 persunas; 2005: 232 persunas).

3.1 Burgaisas e burgais da stadis da la CE/AECL cun domicil en Svizra n'èn betg suttamess a l'obligaziun da dumandar ina permissiun tenor la lex Koller. Tenor il mussavia da la confederaziun è l'uffizi dal register funsil - sco en il cas qua avant maun - obligà da registrar in act giuridic directamain, quai vul dir senza renviament a las autoritads da permissiun, en il register principal, sche l'acquistadra u sche l'acquistader preschenta ina permissiun da dimora u in attest da domicil d'ina vischnanca svizra. Perquai che l'acquist d'in bain immobigliar na pretenda betg - pervi da la cunvegna davart la libra circulaziun - da prender il domicil principal en il Grischun, mabain mo en Svizra, n'avessan mesiras da la regenza - sco per exempel ina procedura da permissiun speziala che n'è betg previsa en il dretg dal chantun Grischun - nagin effect. Talas mesiras pudessan schizunt avair per consequenza che questas persunas na s'annunziassan betg pli en ina vischnanca grischuna e ch'ellas na fissan uschia betg pli obligadas da pajar qua taglia illimitadamain.

3.2 A la regenza n'èsi betg enconuschent che las vischancas fissan surdumandadas en il sectur menziunà qua survart u ch'ellas violassan lur obligaziuns legalas. Ellas emettan ils attests da domicil, sche la persuna è annunziada en la vischnanca ed ademplescha sias obligaziuns, cunzunt talas da pajar las taglias. Per las vischnancas n'èsi betg pussaivel da far ina controlla permanenta da la dimora effectiva. E da controllar unicamain persunas da l'exteriur fiss - pervi dal princip dal tractament egual - cuntrari als contracts internaziunals. Ultra da quai po ina persuna s'annunziar adina puspè da nov en ina vischnanca, sch'ella fa valair sia intenziun da prender domicil là. Pervia da la situaziun giuridica vertenta na ston pia vegnir prendidas naginas mesiras sin plaun chantunal.

Datum: 27 da zercladur 2006