Procurar palpiri en moda persistenta en l'administraziun chantunala, quai è in tema per la regenza gia ditg. Uschia ha la regenza relaschà ils 3 da settember 1990 las directivas davart il diever da palpiri e d'emballadis sco er davart la dismessa da palpiri vegl. Questas directivas han la finamira da reglar il diever spargnus ed ecologic da palpiri e d'emballadis, e quai en moda adattada als basegns da l'administraziun, sco er la dismessa correcta suenter lur diever (art. 2). Cumpetenta per exequir questas directivas è d'ina vart la centrala chantunala per stampats e material che procura ch'ils stampats vegnian elavurads confurm a las directivas e che las sorts da palpiri correspundentas vegnian messas a disposiziun. En lur sectur èn - da l'autra vart - mintgamai responsabels ils singuls posts da servetsch ch'il palpiri e ch'ils emballadis vegnian duvrads tenor las directivas (art. 8 al. 1 e 2).

Tar las singulas dumondas:
1. Promover il diever da palpiri da recicladi è raschunaivel tant dal puntg da vista economic sco er ecologic. Il pretsch da palpiri da fibras primaras è per 35 - 240% pli aut ch'il pretsch da palpiri da recicladi. La grevezza per l'ambient è pli gronda tar palpiri da fibras primaras che tar palpiri da recicladi, e quai per il factur 3 - 5. Quai èn buns motivs per promover il diever da palpiri da recicladi dapertut nua che quai è pussaivel en vista a las pretensiuns ed als basegns. Quai n'è dentant betg il cas dapertut. Cunzunt per documents che duain vegnir archivads a lunga vista dastga vegnir duvrà mo palpiri da fibras primaras ch'è pli resistent cunter la vegliadetgna.

2. La quota da palpiri da recicladi sa chatta oz tar ca. 40% da tut il palpiri che vegn duvrà. Palpiri da recicladi vegn duvrà cunzunt per cuvertas, per blocs da notizias, per fegls da transmissiun sco er per material da diever a las scolas chantunalas. Tar il palpiri da copiar sa chatta la quota da palpiri da recicladi tar ca. 20%. Ultra dal palpiri da recicladi vegn duvrà palpiri, dal qual la cellulosa deriva d'ina cultivaziun dal guaud ch'è ecologica, socialmain cumportabla, economicamain acceptabla e tras quai er persistenta. La quota da quest palpiri importa ca. 50%.

3. La quota da palpiri da recicladi en cumparegliaziun cun l'entir diever da palpiri da l'administraziun chantunala è s'augmentada levamain ils ultims tschintg onns. Oz sa chatta ella, sco gia menziunà, tar ca. 40%.

4. La centrala chantunala per stampats e material sa stenta constantamain da recumandar da duvrar palpiri da recicladi là, nua che l'intent d'utilisaziun permetta quai.

5. Gia tenor las directivas existentas èn obligads tant la centrala chantunala per stampats e material - sco post ch'è cumpetent per procurar il palpiri - sco er ils singuls posts da servetsch - sco posts ch'èn responsabels per il diever da palpiri e d'emballadis - d'observar la finamira da duvrar palpiri en moda spargnusa ed ecologica. En quest connex ston quests posts er tegnair quint da svilups novs, e quai tar il palpiri sco er tar ils apparats (copiader e stampader) che extendan il champ d'utilisaziun da palpiri da recicladi. La centrala chantunala per stampats e material sto procurar che la quota da palpiri da recicladi sco er en general che la quota da palpiri che vegn producì en moda ecologica s'augmentia er vinavant constantamain en l'administraziun chantunala. Ins stuess examinar, sche las directivas existentas stuessan vegnir revedidas e sche ulteriuras directivas u recumandaziuns stuessan vegnir relaschadas, en cas ch'il svilup giess il proxim temp en in'autra direcziun.

Datum: 27 da zercladur 2006