La fundaziun "forum economic dal Grischun" è vegnida constituida l'onn 1995 sin iniziativa da la pro Raetia e da l'economia grischuna. Fundaturas resp. fundatur eran la pro Raetia, l'uniun grischuna d'artisanadi e da mastergn, l'uniun grischuna da commerzi e d'industria, l'uniun grischuna da las hotelieras e dals hoteliers, la banca chantunala grischuna ed il chantun Grischun. Il document da fundaziun cuntegna il suandant intent:

"- meglierar las cundiziuns generalas per l'economia grischuna ed augmentar l'attractivitad dal Grischun sco plazza economica;
- infurmar l'economia grischuna, la publicitad e las autoritads davart datas economicas relevantas, davart svilups, davart connexs economics e davart stentas economicas ed uschia promover en il chantun in clima ch'è favuraivel per l'economia;
- promover il svilup economic en las regiuns."

Il chantun sustegna l'activitad da la fundaziun cun ina contribuziun annuala (actualmain 80'000. francs). L'incarica da prestaziun correspundenta dal chantun ed il concept directiv per l'economia dal Grischun, ch'è vegnì elavurà da l'economia grischuna, èn las saivs directivas per las activitads dal forum economic. En il center stat en quest connex la moderaziun da process. Quai vul dir tranter auter: analisar problems e lur raschuns sco er elavurar pussaivladads da soluziun.

En il cussegl da fundaziun vegn il chantun represchentà tras il schef dal departament d'economia publica e fatgs socials sco er tras il schef da l'uffizi per economia e turissem. Els dus èn er commembers da la giunta directiva.

Tar las dumondas:

1. Il forum economic è sa sviluppà ad ina plattafurma centrala per l'economia grischuna. El elavura las datas da basa e mussa connexs economics. Il forum sa drizza a l'economia, a la politica, a l'administraziun ed a la populaziun. Uschia survegn il chantun infurmaziuns da basa ch'el stuess uschiglio laschar elavurar. Il forum è ultra da quai in instrument effizient per tgirar las relaziuns directas e per barattar infurmaziuns cun l'economia grischuna. Questas funcziuns po il forum ademplir per il chantun mo, sch'il chantun è represchentà correspundentamain en il cussegl da fundaziun. Er l'incarica da prestaziun existenta ch'il chantun ha surdà al forum giustifitgescha la represchentanza chantunala actuala en il cussegl da fundaziun. En il rom da l'incumbensa pendenta da la cumissiun da gestiun per controllar las represchentanzas chantunalas d'interess vegn dentant giuditgada er questa represchentanza anc ina giada.

2. Studis vegnan elavurads d'expertas e d'experts. Independentamain dal fatg, sch'il chantun è l'incumbensader u sch'el è involvì en in'autra furma, na prenda
la regenza per regla betg posiziun davart studis. Sche studis concernan ina fatschenta concreta da la regenza, pon quels esser ina da las basas per la regenza per furmar l'opiniun.

3. Il forum economic ha l'incumbensa da represchentar ils interess da l'economia grischuna, p.ex. cun meglierar las cundiziuns generalas, sco quai che l'intent da la fundaziun prevesa gia quai. L'activitad respectiva da la fundaziun na vegn betg restrenschida tras la represchentanza dal chantun en il cussegl da fundaziun. Per la regenza na datti perquai nagins motivs da midar insatge vi da la represchentanza actuala e vi dal sustegn actual dal forum economic.

4. La fundaziun duai esser il forum da l'economia grischuna. Correspundentamain èsi l'incumbensa da l'economia grischuna da designar il cussegl da fundaziun. Tenor il document da fundaziun ha il chantun il dretg da proponer ina commembra u in commember. Ils sindicats èn represchentads en il cussegl da fundaziun. Sche ulteriurs circuls duain esser represchentads en il cussegl da fundaziun, n'ha pia betg la regenza da decider, mabain l'economia. Tenor il document da fundaziun ston vegnir resguardads ils interess economics ed ils interess da la politica regiunala dal Grischun tar la cumposiziun dal cussegl da fundaziun.

Datum: 10 da schaner 2007