Tenor l'ordinaziun davart la limitaziun dal dumber dals esters (art. 8 al. 3 lit. c OLE; CS 823.21) na ston las sautunzas da cabaret betg vegnir recrutadas ex num ord pajais da la UE/AECL. Davart l'admissiun da sautunzas ha la confederaziun relaschà directivas voluminusas (directivas LDDE, agiunta 4/8c). Sa basond sin quellas ha relaschà l'uffizi da polizia atgnas disposiziuns cumplementaras ed ha concedì als cabarets contingents da manaschi per sautunzas ord pajais che n'èn betg da la UE (art. 20 al. 3 OLE).

In pèr auters chantuns admettan mo sautunzas ord pajais da la UE. Retschertgas e decleraziuns fidadas davart las consequenzas e davart las experientschas dals dus sistems na datti betg. Dentant èn dus chantuns che admettevan mo pli sautunzas ord pajais da la UE sa decidids da returnar puspè tar la pratica da permissiun anteriura e d'admetter puspè sautunzas ord terzs stadis.

La politica d'admissiun dal Grischun e las mesiras ch'èn vegnidas prendidas per proteger las sautunzas èn sa confermadas: Tant ord vista da la polizia da persunas estras sco er ord vista da la polizia chantunala ha il statut da las sautunzas strusch provocà reclamaziuns ils ultims onns. Tuts dus posts fan regularmain controllas en ils cabarets. En questas controllas vegni examinà cun cleras finamiras, sche las directivas e las disposiziuns vegnan observadas, ed i vegn controllà ch'il salari vegnia pajà e che las cundiziuns da vita da las sautunzas sajan bunas.

Sin fundament dals resultats da las interrogaziuns da las sautunzas er ordaifer ils cabarets e sin fundament da las controllas poi vegnir constatà ch'en il chantun Grischun na ston las sautunzas betg lavurar sut pressiun. Medemamain na datti betg indizis u constataziuns ch'i dettia prostituziun sfurzada, commerzi cun umans u ch'i vegnia profità d'ina situaziun d'urgenza.

Sch'i vegn abolida l'admissiun da sautunzas ord terzs stadis, fa quai temair ch'il milieu vegnia chatschà en l'illegalitad. Prostituadas che dimoran qua uffizialmain sco turistas vegnissan pli e pli a lavurar illegalmain en hotels ed en autras instituziuns. I dess er pli e pli clubs da sauna e saluns da massascha illegals. Questas instituziuns na sa laschan strusch controllar ed uschia fissi grev da constatar il commerzi cun umans organisà, ed i fiss insumma nunpussaivel d'al cumbatter u d'al dismetter. La refusa da l'admissiun da sautunzas ord terzs stadis dastgass provocar ultra da quai anc dapli pseudomaridaglias. Cunter l'aboliziun pledan er tenor las decleraziuns da l'agid cunter aids dal Grischun las eventualas consequenzas negativas sin il stadi da sanadad da las dunnas che vegnissan chatschadas en l'illegalitad. Er il studi edì dal forum svizzer per studis da migraziun (FSM) "cundiziuns da lavur e da vita da sautunzas da cabaret / Arbeits- und Lebensbedingungen von Cabaret-Tänzerinnen" e las organisaziuns da dunnas sco CID e XENIA na pretendan betg ch'i vegnia abolì l'admissiun per sautunzas ord terzs stadis.

1. Il mument actual n'è la regenza betg pronta d'abolir il statut da sautunzas per persunas d'ordaifer la UE. Ma sch'i dess problems, vegniss l'admissiun da sautunzas ord terzs stadis suttamessa ad in'examinaziun. In suspect general da commerzi cun umans na tanscha betg per l'aboliziun dal statut da sautunzas. Sch'i dat indizis concrets po en il cas singul vegnir refusà il visum d'entrada.

2. Las sautunzas u las prostituadas dal territori da la UE/AECL han il dretg ch'è motivà d'in contract internaziunal d'ina permissiun da dimora resp. da lavur. I n'è er betg pussaivel da restrenscher l'admissiun da sautunzas ord il territori da la UE/AECL cun introducir contingents.

3. Ils cabarets vegnan controllads vinavant pervia da las directivas e disposiziuns severas. Las sautunzas vegnan interrogadas, las cundiziuns da lavur, ils alloschaments, ils pajaments da salari ed il scumond da separé vegnan controllads periodicamain. En cas da cuntravenziuns vegnan disponidas mesiras che pon en il cas singul chaschunar ch'i vegn stritgà ils contingents als cabarets.

Datum: 15 da december 2006