Navigation

Inhaltsbereich

Incumbensa Ratti concernent la promoziun da la purschida da plazzas d'emprendissadi en interpresas pitschnas e mesaunas (IPM)

Sessiun: 19.10.2006
I sto vegnir constatà che la purschida per persunas che tschertgan ina plazza d'emprendissadi è vegnida pli e pli pitschna ils ultims onns. Cunzunt la varietad da las plazzas d'emprendissadi en noss chantun sa reducescha permanentamain. Ils motivs pon vegnir attribuids per part a las structuras da nossa economia sco er a las expensas administrativas e finanzialas per ils manaschis d'emprendissadi. Cunzunt manaschis pitschens e mesauns pudessan contribuir ad ina purschida da plazzas d'emprendissadi cun dapli varietad. Per quest intent ston dentant vegnir meglieradas las cundiziuns generalas e vegnir stgaffids impuls correspundents sco er avantatgs. Displaschaivlamain n'ha quest giavisch betg pudì vegnir resguardà en la revisiun da la lescha da taglia, cumbain ch'in basegn d'agir è incontestà.

Las sutsegnadras ed ils sutsegnaders envidan la regenza da far in'analisa en noss chantun e d'elavurar ina basa legala correspundenta.

Cuira, ils 19 d'october 2006

Name: Ratti, Perl, Berther (Mustér), Bezzola (Samedan), Bezzola (Zernez), Bleiker, Brandenburger, Brantschen, Brüesch, Buchli, Butzerin, Campell, Candinas, Casparis-Nigg, Castelberg-Fleischhauer, Casty, Casutt, Caviezel-Sutter (Tusaun), Christoffel-Casty, Clavadetscher, Dudli, Fallet, Fasani, Felix, Geisseler, Giovanoli, Hardegger, Hartmann (Cuira), Hartmann (Champfèr), Hasler, Heinz, Jaag, Janom Steiner, Jenny, Kessler, Koch, Krättli-Lori, Kunz, Mani-Heldstab, Märchy-Michel, Marti, Mengotti, Meyer-Grass (Claustra), Michel, Möhr, Montalta, Nick, Nigg, Parolini, Pedrini, Pfäffli, Pfenninger, Plozza, Ragettli, Rathgeb, Righetti, Stiffler, Troncana-Sauer, Tscholl, Valär, Vetsch (Claustra), Vetsch (Pragg-Jenaz), Zanetti, Strimer

Session: 19.10.2006
Vorstoss: rg Auftrag


Resposta da la regenza

Ils scleriments ch'èn vegnids fatgs han mussà ch'ils manaschis d'emprendissadi dal Grischun han gì ils ultims onns ina gronda prontezza da scolar emprendistas ed emprendists e ch'els èn stads pronts da metter a disposiziun plazzas d'emprendissadi per giuvenils ch'èn vegnids ord scola. En il Grischun èsi en cumparegliaziun cun auters chantuns reussì da tegnair fitg bassa la part dals giuvenils senza plazza d'emprendissadi. La regenza engrazia a l'economia grischuna per questa cumprova da vulair surpigliar la responsabladad sociala da la giuventetgna.

Las plazzas d'emprendissadi libras ch'èn publitgadas en l'indicatur da las plazzas d'emprendissadi da l'uffizi per la furmaziun professiunala (UCFP) èn bain sa reducidas da 1475 a 1230 durant ils onns 2001 fin 2006. Il dumber dals contracts d'emprendissadi ch'èn vegnids concludids effectivamain è dentant s'augmentà durant quest temp per 15 %. L'onn 2001 ha il UCFP registrà 1577 contracts d'emprendissadi novs ch'èn vegnids fatgs cun giuvenils ch'èn vegnids ord scola. L'onn 2006 èn quai stads 1821 contracts d'emprendissadi. Tar las commerziantas e tar ils commerziants han ins pudì constatar tar l'introducziun da la nova ordinaziun da furmaziun l'onn 2003 er en il Grischun ch'ils contracts d'emprendissadi ch'èn vegnids concludids èn sa reducids per 50. Quai dastgass esser tranter auter er ina consequenza da la lavur administrativa pli gronda per ils manaschis d'emprendissadi. Tar la realisaziun da la nova ordinaziun da furmaziun ha il UCFP sustegnì ils manaschis d'emprendissadi cun curs spezials, uschia ch'ils contracts d'emprendissadi han puspè cuntanschì en il fratemp er en quest sectur la media dals dumbers dals onns precedents.

Il dumber da las professiuns che vegnan scoladas è restà praticamain il medem dapi l'onn 1995. Durant quest temp èn vegnidas cumpigliadas differentas professiuns a champs da professiun. Durant ils ultims quatter onns ha il UCFP concedì en media ina permissiun da scolaziun a 170 manaschis per onn, tranter quels blers manaschis mesauns e pitschens. Uschia ha pudì vegnir mantegnida la varietad da las professiuns che vegnan purschidas.
La gronda maioritad dals manaschis da scolaziun conferma adina puspè ch'i vala anc adina la paina da scolar emprendistas ed emprendists. Quai resulta er d'in studi davart ils custs ed il gudogn da la scolaziun d'emprendistas e d'emprendists en Svizra. Tenor quest studi cumprovan las firmas participadas en media retgavs positivs gia durant il temp d'emprendissadi.

Tranter ils onns 2001 e 2006 è s'augmentà il dumber dals giuvenils da 16 onns, e quai per 4 % da 2153 sin 2240. Fin l'onn 2008 pon ins far quint cun cifras stabilas, e quai sin basa dal dumber dals uffants da la 6. classa. Suenter sa reducescha il dumber considerablamain. Malgrà che la situaziun actuala sin il martgà da plazzas d'emprendissadi è precara, expriman gist er IPM or dal sectur artisanal gia oz difficultads d'insumma chattar giuvenils che s'interessan u ch'èn adattads per ina da lur scolaziuns. Questa situaziun dastgass daventar anc pli acuta, sch'il dumber da giuvenils da 16 onns sa reducescha.

Per distgargiar finanzialmain ils manaschis d'emprendissadi vegn desistì en il Grischun gia dapi l'onn 2004 d'incassar taxas per la concessiun d'ina permissiun da scolaziun. Plinavant ha il cussegl grond concludì medemamain l'onn 2004 a chaschun da las tractativas da la lescha chantunala da submissiun ina regulaziun en l'art. 21 che permetta expressivamain da resguardar la scolaziun d'emprendistas e d'emprendists sco criteri per l'agiudicaziun.

La regenza refusa ulteriuras distgargias finanzialas per ils manaschis d'emprendissadi. Tras la nova lescha davart la furmaziun professiunala e davart purschidas da furmaziun cuntinuanta vul ella dentant metter la basa per pudair sustegnair cun mesiras adattadas manaschis ch'èn pronts da scolar er giuvenils cun deblezzas pli grondas en scola u giuvenils cun pretensiuns pli grondas.

Datum: 21 da december 2006