Navigation

Inhaltsbereich

Dumonda Bachmann concernent la coordinaziun da la nova strategia da Grischun vacanzas e dal project chantunal "structuras cumpetitivas e repartiziun da las incumbensas en il turissem grischun"

Sessiun: 06.12.2006
L'october ha l'organisaziun Grischun vacanzas (GRV) preschentà sia nova strategia. Tenor quella sa concentrescha ella en general en il futur pli fitg sin la vendita, sviluppa activitads da marketing mo en ils martgads che ston anc vegnir preparads ed en ils martgads futurs, maina il product management, vul manar la marca "graubünden" ed administrescha ina plattafurma d'internet per il turissem grischun.

Il medem mument è er vegnì communitgà che la nova strategia da GRV saja coordinada cun il project chantunal "structuras cumpetitivas e repartiziun da las incumbensas en il turissem grischun (SCRITG)". E precisamain da questa coordinaziun resultan dumondas a la regenza sco instanza directiva dal project chantunal e sco incumbensadra da GRV.

La nova orientaziun da GRV na vegn en general betg messa en dumonda ed il project chantunal SCRITG vegn schizunt beneventà e sustegnì explicitamain. La nova strategia da GRV duai vegnir realisada immediatamain. Uschia duain crudar davent differentas activitads d'enfin ussa resp. duain vegnir surpigliadas da las organisaziuns per la gestiun da destinaziuns (OGD). Il process da furmar destinaziuns n'è dentant betg anc progredì uschè fitg en las regiuns che questas incumbensas pudessan vegnir surpigliadas. Pervia da quai exista il privel ch'i dettia in vacuum p.ex. tar la continuitad d'elavurar il martgà u tar l'infurmaziun dals giasts fin che las OGD èn uschè lunsch.

Tenor la nova strategia da GRV duain ils martgads centrals en Svizra ed en Germania, dals quals derivan passa 70% da noss giasts, vegnir elavurads directamain da las OGD. Quai è da princip positiv e po er chaschunar in augment da l'effizienza, sche quai vegn fatg vinavant en moda coordinada, per ch'i na dettia nagin dischurden pervia da preschentaziuns singulas sin il martgà che n'èn betg coordinadas. Pervia da quai èsi impurtant che questa incumbensa vegnia percepida ed er attribuida cleramain.

Sch'il turissem vul avair success, èsi evident che la communicaziun vers anen è fitg impurtanta per sensibilisar la populaziun indigena per tal. Ils onns passads è questa incumbensa vegnida fatga cun success da GRV. L'adempliment futur da questa incumbensa n'è previs ni en la nova strategia da GRV ni en il project chantunal SCRITG. Er qua smanatscha in vacuum, sche questa incumbensa concernent ina communicaziun vers anen en tut il Grischun na vegn betg percepida sapientivamain e cun l'impurtanza correspundenta.

I resultan sco resumaziun las suandantas dumondas a la regenza:

1. Co e cun tge mesiras vegni garantì che incumbensas che na vegnan betg ademplidas da GRV vegnian surpigliadas a temp util da las OGD, per ch'i na dettia nagin vacuum?

2. Tgi vegn a surpigliar en l'avegnir l'incumbensa da coordinar las activitads da marketing da las OGD en ils martgads centrals, per ch'i na dettia naginas preschentaziuns singulas nuncoordinadas ed ineffizientas?

3. Co vegni garantì che la communicaziun vers anen en tut il Grischun che ha la finamira da sensibilisar la populaziun indigena per il turissem vegnia fatga er en l'avegnir en moda sapientiva, cun cleras finamiras e cun il pais correspundent.

Las sutsegnadras ed ils sutsegnaders engrazian a la regenza per las stentas da respunder las dumondas fatgas qua survart. Quai è er en l'interess da la branscha da turissem per evitar discussiuns e speculaziuns.

Cuira, ils 6 da december 2006

Name: Bachmann, Sax, Arquint, Barandun, Baselgia-Brunner, Berni, Bezzola (Samedan), Bezzola (Zernez), Blumenthal, Bucher-Brini, Bundi, Butzerin, Caduff, Casparis-Nigg, Casty, Caviezel (Pitasch), Cavigelli, Christoffel-Casty, Claus, Clavadetscher, Conrad, Dermont, Donatsch, Fasani, Federspiel, Feltscher, Florin-Caluori, Frigg-Walt, Gartmann-Albin, Geisseler, Hanimann, Hardegger, Hartmann (Cuira), Hartmann (Champfèr), Hasler, Jaag, Jenny, Kessler, Koch, Kollegger, Krättli-Lori, Kunz, Märchy-Michel, Marti, Mengotti, Meyer Persili (Cuira), Meyer-Grass (Claustra), Michel, Möhr, Montalta, Nick, Niederer, Parolini, Parpan, Peer, Perl, Peyer, Pfäffli, Pfenninger, Portner, Quinter, Ragettli, Rathgeb, Ratti, Righetti, Rizzi, Stiffler, Thomann, Thurner-Steier, Toschini, Tuor, Vetsch (Claustra), Vetsch (Pragg-Jenaz), Wettstein, Cattaneo, Grass, Grendelmeier, Gunzinger, Largiadèr, Rischatsch

Session: 06.12.2006
Vorstoss: rg Anfrage


Resposta da la regenza

Cun il project "structuras cumpetitivas e repartiziun da las incumbensas en il turissem grischun" ch'è qua avant maun vegn il marketing dal turissem en il Grischun adattà a las pretensiuns dals martgads naziunals ed internaziunals. La finamira è da gudagnar novs giasts per il Grischun sco chantun turistic e da cuntanscher uschia ch'il trend tar il svilup da las pernottaziuns sa midia. Cun la refurma duai vegnir prestada ina contribuziun ad ina partiziun effizienta da la lavur tranter las differentas organisaziuns da commerzialisaziun ed i duain vegnir midadas fundamentalmain las structuras dal marketing da turissem. Ultra da quai duai l'effizienza dals meds da marketing che vegnan impundids vegnir meglierada cun focusar las forzas. Plinavant duain ils meds finanzials che stattan a disposiziun per elavurar il martgà vegnir augmentads cun profitar da sinergias. La basa dal project "structuras cumpetitivas e repartiziun da las incumbensas en il turissem grischun" è descritta en il concept da realisaziun.

Tar las dumondas:

1. Cun la nova repartiziun da las incumbensas tranter Grischun vacanzas (GRV) e las organisaziuns da turissem vegn er fatga in'examinaziun da las activitads. Sche ed en tge furma ch'i vegn cuntinuà cun in'activitad u cun ina incumbensa, ston decider las organisaziuns ch'èn cumpetentas en il futur. Orientar da nov GRV dovra ses temp. Las organisaziuns da turissem actualas èn infurmadas davart las activitads da marketing currentas da Grischun vacanzas. Las mesiras per il martgà che GRV ha prendì èn vegnidas coordinadas cun Svizra turissem. Las discussiuns che vegnan fatgas en las regiuns han lieu en enconuschientscha da las activitads che GRV planisescha. Igl è incontestà ch'ina repartiziun da las incumbensas e da las activitads da marketing ch'è cumplettamain nova chaschuna ina tscherta malsegirezza e ch'ella po eventualmain er avair per consequenza ch'i dat largias che n'èn betg giavischadas. Cun las contribuziuns ch'il chantun conceda a las novas organisaziuns da turissem duessan questas largias pudair vegnir stuppadas. Ulteriuras mesiras na prevesa il chantun actualmain betg.

2. Las organisaziuns per la gestiun da destinaziuns (OGD) ch'ins è londervi a crear daventan autonomamain activas en quai che reguarda lur marketing en ils martgads centrals (Svizra, Germania dal sid, Italia dal nord). Quai vegn fatg en ina concurrenza sauna tranter las destinaziuns ch'existivan gia en il passà. Pia na pon ins betg discurrer da preschentaziuns singulas sin il martgà che n'èn betg coordinadas e ch'èn ineffizientas. Las OGD pon per sa drizzar meglier ed en moda pli attractiva ad ina tscherta gruppa en mira sin il martgà (bike, golf, wellness e.u.v.) er impunder ensemen lur meds finanzials. GRV po surpigliar questa coordinaziun sco incumbensa da las OGD ed er metter a disposiziun en quest connex la colliaziun cun autras plattafurmas da Svizra turissem e d'ulteriuras partenarias e d'ulteriurs partenaris.

3. Ils ultims mais è l'uffizi per economia e turissem s'engaschà intensivamain per la communicaziun vers anen per sensibilisar la populaziun indigena per il turissem. Plinavant ha el mussà l'impurtanza dal turissem grischun sin basa da documents da l'economia publica. Las discussiuns futuras davart l'introducziun d'ina taxa chantunala per promover il turissem vegnan er a sensibilisar il chantun fermamain per dumondas turisticas. Ultra da quai applitgescha la branscha da turissem en l'agen interess ina strategia da communicaziun vers anen en las regiuns, e quai per promover la conscienza turistica. I dastga vegnir constatà ch'ina discussiun vasta, fundada e fundamentala davart il turissem grischun ha pudì vegnir svegliada cun lantschar quest project che punctuescha l'impurtanza da quest sectur economic. En il rom dal project chantunal vegnan examinadas ulteriuras mesiras cumplementaras (p.ex. en il sectur da la qualitad).

Datum: 19 da favrer 2007