Navigation

Inhaltsbereich

Incumbensa Rathgeb concernent las perspectivas per il futur dals circuls

Sessiun: 14.02.2007

Durant ca. tschintg tschientaners èn ils circuls stads las corporaziuns territorialas centralas dal stadi grischun. Fin la mesadad dal 19avel tschientaner restan ils circuls las unitads administrativas las pli impurtantas dal pajais. Anc oz s'identifitgeschan las Grischunas ed ils Grischuns cun "lur" circul.
Il svilup il pli nov dals circuls è caracterisà d'ina reducziun successiva da lur cumpetenzas e da lur incumbensas: Cun la refurma da las dretgiras I e cun la revisiun totala da la constituziun chantunala èn vegnidas eliminadas las dretgiras cirquitalas ed ils circuls han pers cumpetenzas. Per ils 31 da december 2008 vegn eliminada er la suveranitad fiscala dals circuls che ston perquai vegnir finanziads en il futur tras las vischnancas. Cun l'introducziun da la procedura da multas disciplinaras per delicts da chatscha han ils circuls pers ina da lur ulteriuras funtaunas d'entradas. Cun la refurma la pli nova da la planisaziun dal territori è la procedura privata da recurs en chaussas da construcziun davant la presidenta cirquitala u davant il president cirquital vegnida abolida per gronda part. L'unificaziun naziunala dal dretg civil e dal dretg penal vegn a chaschunar anc ina giada ina reducziun massiva da las cumpetenzas, en spezial cun l'introducziun da l'uschenumnà model da procura publica. Perquai ch'i croda davent ina gronda part dals daners da multas, vegni a dar er grondas perditas finanzialas per numerus circuls. L'aboliziun da las mastralias en ina gronda part dals circuls e la prolungaziun da la perioda da legislatura sin quatter onns han savens dismess ina basa d'identificaziun impurtanta dal circul. Suenter che l'iniziativa "80 deputadas e deputads bastan" è reussida, èsi er intschert, quant ditg ch'ils circuls pon anc exister sco circuls electorals.
Las sutsegnadas ed ils sutsegnads èn sut l'aspect dal svilup skizzà da l'avis ch'ils circuls vegnian a surpigliar er en il futur ina incumbensa impurtanta en il Grischun e ch'els duajan furmar la structura decentrala da noss stadi.
Perquai vegn la regenza envidada d'enumerar las incumbensas che ston vegnir ademplidas tenor la constituziun chantunala en il futur en il chantun tras las corporaziuns territorialas. Per quest intent duai vegnir elavurada ina basa che consista dals circuls analogamain a l'urden communal istoric. La basa survegn la furma d'in model concret ch'è adattà a las relaziuns localas respectivas. Quest model duai en spezial er integrond la federaziun grischuna da las presidentas cirquitalas e dals presidents cirquitals cuntegnair er in plan da svilup cun in urari, il qual prevesa da surdar las incumbensas als singuls plauns statals.
Cuira, ils 14 da favrer 2007
Rathgeb, Tuor, Augustin, Bachmann, Berni, Berther (Sedrun), Bezzola (Samedan), Bezzola (Zernez), Bondolfi, Brüesch, Bundi, Caduff, Candinas (Rabius), Casparis-Nigg, Casty, Casutt Renatus (Falera), Caviezel (Pitasch), Christoffel-Casty, Claus, Clavadetscher, Darms-Landolt, Fasani, Felix, Feltscher, Hanimann, Hardegger, Hartmann (Cuira), Hartmann (Champfèr), Jenny, Keller, Kessler, Koch, Kollegger, Krättli-Lori, Kunz (Cuira), Marti, Mengotti, Meyer-Grass (Claustra), Michel, Nick, Niederer, Noi-Togni, Parolini, Peer, Perl, Pfäffli, Pfister Plozza, Portner, Quinter, Ragettli, Righetti, Rizzi, Sax, Thurner-Steier, Toschini, Troncana-Sauer, Valär, Vetsch (Pragg-Jenaz), Wettstein, Brunold, Candinas (Mustér), Casutt-Derungs Silvia (Falera), Degiacomi, Hauser, Kunz (Fläsch), Märchy (Domat), Wasescha

Session: 14.02.2007
Vorstoss: rg Anfrage

Resposta da la regenza

Il svilup dals circuls sin lur champ d'incumbensas e da cumpetenzas giustifitgescha senza auter ina confruntaziun detagliada cun lur perspectivas per il futur.

Ils ultims onns han ils circuls pers bleras incumbensas e cumpetenzas. Perquai èsi inditgà d'examinar en connex cun la reorganisaziun previsa da la repartiziun da las incumbensas e da l'examinaziun da las structuras territorialas sche e per quant ch'il circul è adattà per ademplir incumbensas decentralas. Il giavisch fundamental che vegn exprimì cun l'incumbensa Rathgeb s'accorda pia er cun la prioritad da svilup (PS) 23 dal program da la regenza 2005-2008. Suenter la revisiun da la lescha da vischnancas dal chantun Grischun e da la lescha davart la gulivaziun da finanzas (LGF I) il december 2005 e suenter la realisaziun da la NGF sin plaun chantunal suonda sco ulteriura mesira da realisaziun da la PS 23 il project "nova concepziun da la gulivaziun da finanzas e da las incumbensas en il Grischun" (LGF II). Ina preschentaziun da las incumbensas è ina premissa fundamentala per elavurar ils sis instruments dal project: gulivaziun da las resursas, gulivaziun da las grevezzas, detretschament da las incumbensas, novas furmas da collavuraziun en cas d'incumbensas communablas, collavuraziun interchantunala e promoziun da fusiuns da vischnancas.

La repartiziun da las incumbensas futura e las consequenzas che vegnan deducidas da quella per las differentas corporaziuns territorialas pon vegnir concretisadas pir en il decurs da la lavur da project. Gia cun concepir ils instruments ha la regenza manifestà la veglia da tegnair quint adequatamain dal giavisch da las sutsegnadras e dals sutsegnaders da l'incumbensa Rathgeb. En la lavur da project duai dentant correspundentamain er vegnir integrada l'examinaziun da la "vista dals circuls" sco er da la "vista da las regiuns", e quai sco ulteriura prescripziun strategica. Sut il titel "novas furmas da collavuraziun tar incumbensas communablas" pon vegnir fatgas prescripziuns areguard il perimeter (la grondezza minimala) resp. areguard la furma da la collavuraziun intercommunala per surdar incaricas da prestaziun. En connex cun la concepziun da novas furmas da collavuraziun, dentant er en connex cun il nov svilup da la collavuraziun intercommunala resultan libertads concepziunalas per ils circuls. La nova regulaziun da l'organisaziun da las incumbensas e da las furmas da collavuraziun vegn ad inditgar l'ulteriur svilup da la refurma da vischnancas sin la basa d'in model dals circuls modifitgà.

Tenor l'urari dal project LGF II duai il rapport da consultaziun esser avant maun l'emprim quartal 2008. Quest rapport vegn a cuntegnair la preschentaziun che vegn pretendida en l'incumbensa Rathgeb ed er en il postulat Cavigelli (sessiun d'october 2002). En il decurs da la lavur da project vegnan a resultar da nov er sin fundament da la nova repartiziun da las incumbensas pussaivladads concepziunalas per il circul. En il rapport da consultaziun u en in rapport cumplementar duain questas pussaivladads er vegnir inditgadas en la furma d'in model.

In plan da svilup per surdar las incumbensas als differents plauns guvernamentals vegn ad esser ina da las mesiras per realisar il project LGF II. La federaziun grischuna da las presidentas cirquitalas e dals presidents cirquitals vegn integrada a temp en la consultaziun.

La regenza è pronta d'acceptar questa incumbensa en il senn da questas explicaziuns.

Datum: 30 d'avrigl 2007