Incumbensa da fracziun da la PS Gartmann-Albin concernent l'elavuraziun d'in concept per la dismessa da ruments per il chantun Grischun
Sessiun: 14.02.2007
Il svilup da la dismessa da ruments mussa en il Grischun adina puspè en la faussa direcziun. La cumpatibilitad ecologica e la rentabilitad da la politica da rument vegnan uschia messas en dumonda. I manca ina coordinaziun chantunala ch'è suffizienta per utilisar las capacitads combustiblas. Ultra da quai fa il chantun memia pauc diever da ses dretgs d'attribuir ils ruments als stabiliments ch'èn disponibels.
Las corporaziuns per la gestiun da ruments han per part in'autonomia ch'è dubiusa areguard il puntg da vista da la politica democratica, ed ils interess chantunals per ina gestiun da ruments ch'è effizienta ed optimada en quai che concerna l'economia e l'ecologia stattan en quest connex memia pauc en il center. Viadis da transport nunnecessaris cun las grevezzas correspundentas per las vias e per l'aria èn la consequenza.
En l'art. 31 al. 1 da la lescha federala davart la protecziun da l'ambient (LPAmb) e concretisà en la 4. part, planisaziun, da l'ordinaziun tecnica federala davart ils ruments (OTR) è fixà il suandant princip: "Ils chantuns fan ina planisaziun dals ruments. En spezial erueschan els lur basegn da stabiliments per dismetter ils ruments, eviteschan surcapacitads e fixeschan ils lieus dals stabiliments per dismetter ils ruments." Tenor l'art. 18 OTR ston ils chantuns vegnir dividids en "intschess areguard ils stabiliments per dismetter ils ruments" e ston procurar ch'ils ruments vegnian tractads en ils stabiliments che als vegnan attribuids.
Sa basond sin las disposiziuns federalas menziunadas qua survart supplitgain nus la regenza da relaschar in concept per la dismessa da ruments sco er da far tut quai che stat en sia pussanza, per ch'ils interess chantunals vegnian resguardads en moda cumplessiva e per ch'ils interess singuls da las corporaziuns vegnian reducids ad ina dimensiun raschunaivla che pussibilitescha ina gestiun da ruments ch'è effizienta ed optimada en quai che concerna l'economia e l'ecologia.
Cuira, ils 13 da favrer 2007
Name: Gartmann-Albin, Thöny, Frigg-Walt, Arquint, Baselgia-Brunner, Bucher-Brini, Jaag, Jäger, Menge, Meyer Persili (Cuira), Peyer, Pfiffner, Trepp, Zurfluh
Session: 14.02.2007
Vorstoss: rg Anfrage
Resposta da la regenza
Tenor cunvegna cun il departament d'educaziun, cultura e protecziun da l'ambient ha l'uffizi per la natira e l'ambient incumbensà l'october 2005 la Geo Partner SA, gestiun da resursas, Turitg, d'elavurar in rapport davart l'actualisaziun da la planisaziun dals ruments. La Geo Partner SA è ina interpresa che lavura en il sectur da la gestiun da ruments. L'art. 31 al. 1 da la lescha federala dals 7 d'october 1983 davart la protecziun da l'ambient (LPAmb) e l'art. 16 da l'ordinaziun tecnica davart ils ruments dals 10 da december 1990 (OTR) obligheschan ils chantuns da far ina planisaziun dals ruments e da l'actualisar periodicamain. Da la "planisaziun dals ruments dal Grischun, rapport final 1996" ha la regenza prendì enconuschientscha ils 23 d'avrigl 1996.
En il rapport "planisaziun dals ruments dal Grischun 2006, rapport final" dals 16 d'avrigl 2007 vegnan descrittas pliras variantas pussaivlas per dismetter en l'avegnir ils ruments chasans combustibels dal chantun Grischun, e lur consequenzas economicas vegnan examinadas e cumparegliadas. La varianta 4 che vegn preferida da la regenza prevesa che tut ils ruments chasans combustibels che vegnan producids en il chantun Grischun duain vegnir dismess en l'avegnir en il stabiliment per arder ruments (SAR) a Trimmis. La regenza ha decidì da persequitar vinavant questa varianta; excepziuns da la dismessa en il chantun Grischun duain dentant vegnir permessas, sch'ina soluziun extrachantunala è en cumparegliaziun cun la combustiun a Trimmis bler pli favuraivla dal puntg da vista ecologic ed economic. Per realisar la varianta 4 èsi necessari da determinar l'entir chantun Grischun sco intschess dal SAR a Trimmis per ils ruments chasans combustibels. La regenza è da l'avis che quest intschess stoppia vegnir determinà en il rom d'ina revisiun parziala da la lescha chantunala davart la protecziun da l'ambient. Perquai ha ella incumbensà il departament d'educaziun, cultura e protecziun da l'ambient d'elavurar in sboz da consultaziun correspundent che duai er cuntegnair ulteriuras regulaziuns, uschia cunzunt davart la concepziun dals pretschs da combustiun sco er davart las premissas e davart la procedura per conceder excepziuns da dismetter ils ruments en il SAR a Trimmis. Tras la revisiun parziala duain vegnir resguardads tant ils interess chantunals che vegnan numnads en l'incumbensa da fracziun sco er ils interess da las corporaziuns per la gestiun da ruments.
Tras l'approvaziun da la planisaziun dals ruments dal Grischun 2006 e tras l'incumbensa legislativa ch'è vegnida surdada al departament d'educaziun, cultura e protecziun da l'ambient per elavurar vinavant la varianta 4 cun integrar las excepziuns previsas, èn per gronda part ademplids ils giavischs ch'èn cuntegnids en l'incumbensa da fracziun da la PS.
Perquai propona la regenza al cussegl grond d'acceptar e da stritgar l'incumbensa da fracziun.
Datum: 8 da matg 2007