Incumbensa da la cumissiun ad hoc (LCPG) Tenchio concernent la cassa da pensiun chantunala dal Grischun
Sessiun: 14.04.2007
A chaschun da la sessiun da favrer 2007 dal cussegl grond è vegnida refusada l'incumbensa da fracziun da la PS dals 18 d'october 2006 concernent ina meglra posiziun en la cassa da pensiun per las collavuraturas e per ils collavuraturs chantunals nubils. L'incumbensa pretendeva che l'art. 20 al. 1 lit. a LPP stoppia vegnir surpiglià pled per pled en la LCPG.
En ils votums dal cussegl grond èsi vegnì ditg che modificaziuns da l'art. 14 LCPG pudessan vegnir discutadas a chaschun da la debatta per l'independenza giuridica da la cassa. Plinavant èsi vegnì ditg ch'ina meglra posiziun en la cassa da pensiun per las collavuraturas e per ils collavuraturs chantunals nubils possia da princip vegnir sustegnida.
Cunzunt dad ina vart per mantegnair l'unitad da la materia tenor la quala las dumondas da prestaziun na ston betg vegnir tractadas en connex cun crear ina persuna giuridica independenta per l'instituziun da prevenziun sco er da l'autra vart pervia dal fatg ch'i n'exista areguard l'art. 14 LCPG betg ina proposta elavurada che ha absolvì la procedura da consultaziun, propona la cumissiun ad hoc la regenza da suttametter al cussegl grond fin il pli tard ils 31 da december 2009 in project che prevesa ina meglra posiziun per las collavuraturas e per ils collavuraturs chantunals nubils concernent las prestaziuns per surviventas e per survivents.
Cuira, ils 17 d'avrigl 2007
Name: Tenchio, Berni, Casutt, Hartmann (Cuira), Hasler, Kollegger, Nigg, Peyer, Tscholl, Valär
Session: 14.04.2007
Vorstoss: rg Anfrage
Resposta da la regenza
La cassa da pensiun chantunala (CP) paja sut cundiziuns definidas precisamain ina renta per la partenaria u per il partenari da vita che importa 75 % da la renta per conjugals. Questas cundiziuns ston vegnir ademplidas en moda cumulativa. La finamira da l'incumbensa da la cumissiun ad hoc è da meglierar la posiziun da collavuraturas e da collavuraturs dal chantun che n'èn betg maridads areguard las prestaziuns per survivents. Las premissas che ston vegnir ademplidas en moda cumulativa na vegnan betg messas en dumonda.
Meglieraziuns da las prestaziuns a cust da la cassa da pensiun dastgan tenor las prescripziuns dal rendaquint succeder mo, sche la cassa dispona da meds libers avunda. Igl è pussaivel da crear ils meds finanzials libers pir suenter che las reservas necessarias en cas da midadas da la valur èn creadas. Per la fin da l'onn 2006 importavan las reservas en cas da midadas da la valur da la cassa da pensiun 4.9 %. La cassa ha en mira d'augmentar quellas fin la fin da l'onn 2015 a 15%. Quai vul dir stringentamain che las meglieraziuns da las prestaziuns ston vegnir finanziadas correctamain areguard la tecnica d'assicuranza. Quai succeda tar las persunas assicuradas activas tras contribuziuns da ristga correspundentas e tar las persunas che retiran rentas tras ina sminuziun da las tariffas da conversiun.
La regenza è pronta da laschar examinar a l'experta da la cassa da pensiun tge consequenzas ch'in augment da las prestaziuns sco quai ch'el vegniss giavischà avess sin las contribuziuns e sin las tariffas da conversiun. Ils custs supplementars ston en mintga cas vegnir purtads da tut las lavurantas e da tut ils lavurants sco er da las patrunas e dals patruns.
La regenza è pronta d'acceptar questa incumbensa en il senn da questas explicaziuns.
Datum: 8 da matg 2007