Navigation

Inhaltsbereich

Dumonda Pfenninger concernent la contribuziun dal chantun Grischun per ina politica dal clima consequenta

Sessiun: 16.04.2007
Dapi in pèr mais vegnan las enconuschientschas da la midada globala dal clima discutadas en moda detagliada en la publicitad. Ils renviaments correspundents ed ils scenaris, envers ils quals ins era anc fitg skeptic avant paucs onns, han ussa dapi in tschert temp er ina vasta basa scientifica. Las consequenzas catastrofalas da la midada dal clima na vegnan strusch pli messas en dumonda. Er il Grischun è pertutgà directamain ed indirectamain en moda massiva da quai. Per franar questa midada dal clima fissi pia urgentamain necessari d'agir. Igl è cler che las grondas lingias directivas e che las mesiras per la politica dal clima ston vegnir fixadas sin nivel naziunal. In agir ch'è conscient da la responsabladad è dentant er necessari ed urgent sin plaun local, regiunal e chantunal. Il chantun avess da tschentar qua impuls correspundents e prender las mesiras respectivas.

Pervia da las consequenzas grondas da la midada dal clima, da las qualas ils effects sin il Grischun na pon strusch vegnir giuditgads, supplitgain nus la regenza da respunder las suandantas dumondas:

1. Prevesa il chantun Grischun, sco supplement dals instruments actuals, stimuls e mesiras per optimar l'utilisaziun da l'energia sco er per augmentar l'effizienza d'energia?

2. Pon ins spetgar activitads supplementaras dal chantun er en il sectur d'implants solars e d'implants che tiran a niz la forza dal vent?

3. Il traffic individual ch'è per ina gronda part conresponsabel per ils problems climatics è però existenzial per il Grischun. Ina coordinaziun dals sistems da traffic ch'è optimada per il clima fiss tuttina da gronda impurtanza. Pon ins far quint cun ulteriuras mesiras dal chantun en il sectur da la direcziun dal traffic, da sistems per diriger il traffic ed en spezial areguard stimuls per midar sin il traffic public?

4. Il turissem ed en spezial il turissem d'enviern dastgassan esser pertutgads fitg da la midada dal clima. Fin oz vegnan amplifitgadas adina pli fitg las installaziuns per far naiv artifiziala, in fatg che n'è betg dal tuttafatg nunproblematic or da l'optica da la politica d'energia. Elavura il chantun autras strategias per renovar il turissem che resguardan la midada dal clima resp. che tegnan quint dal clima?

5. La regenza dal chantun Berna ha publitgà l'onn 2006 sia "strategia d'energia 2006". Sin basa da la visiun "societad da 2000 watts" vegn mussada la strategia dal chantun, co e cun tge mesiras ch'ins pudess cuntanscher pass per pass almain la finamira parziala d'ina "societad da 4000 watts". È la regenza dal chantun Grischun er pronta d'elavurar ina tala strategia, e quai tegnend quint da las relaziuns spezialas dal Grischun?

6. Prevesa il chantun Grischun activitads resp. mesiras che van pli lunsch en il sectur da la protecziun dal clima?

Cuira, ils 16 d'avrigl 2007

Name: Pfenninger, Thöny, Peyer, Arquint, Baselgia-Brunner, Bucher-Brini, Frigg-Walt, Gartmann-Albin, Jaag, Jäger, Menge, Pfiffner-Bearth, Trepp, Locher Benguerel

Session: 16.04.2007
Vorstoss: rg Anfrage


Resposta da la regenza

1. En il plan directiv chantunal è formulada la finamira che l'energia duai vegnir utilisada en moda raziunala ed effizienta. Plinavant duai vegnir reducida la grevezza per l'ambient che vegn chaschunada cun arder combustibels fossils. Tar projects da construcziun e tar planisaziuns d'utilisaziun vegnan gia oz resguardadas las pretensiuns ad in'utilisaziun spargnusa ed effizienta da las funtaunas d'energia ch'èn avant maun.
Ultra da da la lescha d'energia revedida (LEG) ch'è vegnida messa en vigur per il 1. da fanadur 2007 duai plinavant vegnir declerada lianta er la norma revedida 380/1 da la SIA (energia termica en la construcziun auta) per il cumenzament da l'onn che vegn. Uschia po il consum specific d'energia vegnir reducì en spezial tar edifizis d'abitar novs e tar edifizis da servetsch novs dad actualmain 8 l/m2 a circa 6 l/m2. En in ulteriur pass duai schizunt vegnir cuntanschì il nivel dal standard actual da MINERGIA (circa 4.5 l/m2).

2. Sa basond sin la LEG revedida promova il chantun da nov finanzialmain tut ils implants solars termics che servan a producir aua chauda da diever e che han ina surfatscha d'absorpziun d'almain 4 m2. Cun la nova lescha federala davart il provediment d'electricitad è ultra da quai colliada ina midada da las disposiziuns davart l'indemnisaziun per la furniziun d'electricitad e davart la finanziaziun dals custs supplementars per electricitad che deriva d'energias regenerablas tenor la LEG. La finala pon ins partir dal fatg che implants solars e che implants che tiran a niz la forza dal vent per producir electricitad vegnan promovids da la confederaziun a partir dal 1. da schaner 2008 cun tariffas che cuvran ils custs che resultan tar la furniziun d'electricitad.

3. Il program da la regenza 2005-2008 ha la strategia d'augmentar l'attractivitad dal traffic public cun purschidas che concernan il spustament da transports da la via sin la viafier, cun amplifitgar las infrastructuras e cun colliar il traffic public grischun cun la rait da viafier naziunala ed internaziunala. Tenor il plan da mesiras "mantegniment da l'aria pura" actualisà (CR 15 da matg 2007, nr. 627) èsi schizunt previs d'augmentar anc pli fitg l'attractivitad dal traffic public. La regenza ha incumbensà il servetsch per il traffic public da sviluppar vinavant cun cleras finamiras la purschida e l'infrastructura en spezial per il traffic da pendularias e da pendularis sco er dal traffic da temp liber.

4. Il turissem è l'industria d'export la pli impurtanta dal Grischun. Ina rolla centrala en quest connex gioga il turissem d'enviern, perquai che quel renda pli fitg ch'il turissem da stad en quai che reguarda la valur agiuntada. Quest fatg è er impurtant or dal puntg da vista da l'economia d'energia. Per pudair restar cumpetitiv sin il martgà internaziunal sto pervia da quai pudair vegnir augmentada la segirezza da naiv e ston pudair vegnir construids resp. renovads implants da transport en regiuns pli autas. Tuttina na dastgan las purschidas ch'èn independentas da la naiv betg vegnir tralaschadas. La nova strategia da Grischun vacanzas metta en il center la muntogna e la cuntrada e sa concentrescha tar las acquisiziuns da novs giasts sin ils martgads che ston anc vegnir preparads e sin ils martgads lontans che han lur potenzial oravant tut durant il mez onn da stad. En quest senn sto il turissem grischun sa basar durant l'entir onn sin la qualitad e sin la quantitad, e quai senza tralaschar ils svilups da la midada globala dal clima.

5. La noziun da la "societad da 2000 watts" parta d'ina "prestaziun" media da 2000 watts per persuna (17'520 kWh energia primara per persuna/onn) e correspunda actualmain a la media dal basegn d'ina persuna. En Svizra importan questas valurs actualmain 5000 watts (senza l'energia grischa cun circa 4000 watts). Per il clima n'èsi betg mo decisiv da cuntanscher quels 2000 watts per persuna. En vista a la midada dal clima ston oravant tut vegnir reducidas las emissiuns da CO2 uschè svelt sco pussaivel. Cun tge strategias che quai duai vegnir realisà da vart dal chantun sto vegnir sclerì en il rom dal program da la regenza 2009-2012.

6. En quai che reguarda la protecziun dal clima è en emprima lingia l'infurmaziun da la populaziun ina premissa impurtanta per rinforzar la conscienza per questa problematica sco er per augmentar la prontezza da la populaziun per mesiras correspundentas. Pervia da quai ha la regenza er gia ordinà da far scleriments preliminars davart l'augment da la temperatura sin terra. En in proxim pass sa tracti alura da definir las finamiras che sa basan sin ils puncts menziunads qua survart e d'evaluar il basegn d'agir.

Datum: 4 da fanadur 2007