Navigation

Inhaltsbereich

Dumonda Jäger concernent il giudicament d'admissiun sin basa d'ina

Sessiun: 18.04.2007
protesta a chaschun da la midada da la scola primara al stgalim superiur da la scola populara

L'ordinaziun davart la procedura d'admissiun al stgalim superiur da la scola populara (DG 421.200) regla la midada da la 6. classa primara sco er da la classa pitschna al stgalim superiur da la scola populara, la midada da la 1. classa reala a la 1. classa secundara sco er l'entrada en la 2. e 3. classa secundara. En ils artitgels 9 fin 12 da questa ordinaziun vegnan regladas las modalitads dal giudicament d'admissiun sin basa d'ina protesta. Geniturs che n'èn betg perencletgs cun la decisiun d'assegnaziun da la persuna d'instrucziun da classa pon annunziar lur uffant tar l'inspecturat da scola cumpetent per in giudicament d'admissiun sin basa d'ina protesta. Il giudicament d'admissiun sin basa d'ina protesta per scolaras e per scolars da la scola primara u da la scola reala sa basa sin in discurs da giudicament e sin examens en scrit da lingua e da matematica.

Dapi l'introducziun da questa procedura stoi vegnir constatà che la quota da success dals giudicaments d'admissiun sin basa d'ina protesta è fitg bassa, uschia che la lavur e ch'ils custs ston bain vegnir resguardads sco sproporziunads. In examen che praticamain nagin reussescha, è da princip in bun segn per l'auta qualitad da las decisiuns d'assegnaziun da las persunas d'instrucziun da classa, ma metta tuttina en dumonda la credibladad da la scola. Ultra da quai provochescha quai tar ils uffants pertutgads e tar lur famiglias simplamain mo ina frustraziun. Plinavant pari che sproporziunadamain bleras famiglias da l'exteriur pretendian in giudicament d'admissiun sin basa d'ina protesta. Ubain che questas famiglias na chapeschan betg noss sistem da scola ubain ch'ellas han en general in'autra relaziun cun il stadi e cun ils meds legals pussaivels.
Adina dapli vischnancas han oz il stgalim superiur da la scola populara tenor il model C. Quest stgalim superiur cun nivels en almain trais roms obligatorics chaschuna in nov stgalim superiur da la scola populara ch'è pli cooperativ ed evidentamain pli permeabel. Oz èsi pia main decisiv per l'ulteriura carriera da scola en tge "posiziun da partenza" ch'ina scolara u ch'in scolar cumenza il temp da scola al stgalim superiur da la scola populara. La midada da la scola primara al stgalim superiur da la scola populara sa lascha pia cumparegliar cun ina decisiun tranter promoziun e repetiziun.

En quest connex vegn la regenza supplitgada da respunder las suandantas dumondas:
1. Quants uffants han absolvì en il Grischun ils ultims 5 onns in examen d'admissiun sin basa d'ina protesta (giudicament d'admissiun sin basa d'ina protesta)? Quants da quests uffants han reussì u n'han betg reussì l'examen?

2. Quant auta è stada la quota dals uffants esters (tar absolventas e tar absolvents da l'examen d'admissiun sin basa d'ina protesta resp. en la scola primara en general)?

3. È la regenza er da l'avis ch'i possia er en connex cun la nova situaziun dal model C vegnir desistì da la furma da fin ussa da l'examen d'admissiun sin basa d'ina protesta?

4. Tge alternativas èn pussaivlas?

Cuira, ils 18 d'avrigl 2007

Name: Jäger, Casparis-Nigg, Florin-Caluori, Arquint, Baselgia-Brunner, Berni, Brandenburger, Bucher-Brini, Candinas (Rabius) Casty, Casutt, Caviezel (Pitasch), Caviezel-Sutter (Tusaun), Farrér, Frigg-Walt, Gartmann-Albin, Hanimann, Jaag, Jenny, Kessler, Kleis-Kümin, Koch, Krättli-Lori, Mani-Heldstab, Menge, Meyer-Grass (Claustra) Michel, Niederer, Peer, Peyer, Pfenninger, Pfiffner-Bearth, Rizzi, Thöny, Trepp, Vetsch (Pragg-Jenaz), Locher Benguerel

Session: 18.04.2007
Vorstoss: rg Anfrage


Resposta da la regenza

La procedura d'admissiun per la midada da la 6. classa primara al stgalim superiur da la scola populara è sa cumprovada fitg ils onns passads. Ella pussibilitescha las persunas d'instrucziun da la scola primara d'attribuir las singulas scolaras ed ils singuls scolars sin fundament d'in giudicament cumplessiv ubain a la scola reala ubain a la scola secundara. Per evitar assegnaziuns fallidas pon geniturs che n'èn betg perencletgs cun la decisiun d'assegnaziun da la persuna d'instrucziun da classa annunziar lur uffant per in uschenumnà giudicament d'admissiun sin basa d'ina protesta. Mo paucas scolaras e mo paucs scolars che fan in tal examen reusseschan quel. Da quai pon ins concluder in'auta qualitad da las decisiuns d'assegnaziun e da l'entira procedura.

Sin basa da las numerusas midadas ch'èn svelt depassadas, a las qualas la scola è exposta, pari er a la regenza d'esser inditgà d'examinar periodicamain la procedura d'admissiun (incl. il giudicament d'admissiun sin basa d'ina protesta). En emprima lingia stoi vegnir giuditgà adina puspè da nov, sch'il niz e sch'ils custs dal giudicament d'admissiun sin basa d'ina protesta ch'è relativamain char è anc en ina relaziun raschunaivla er sut las cundiziuns generalas midadas.

En quest connex pon las dumondas concretas vegnir respundidas suandantamain:

1) Davart ils giudicaments d'admissiun sin basa d'ina protesta che vegnan fatgs en las regiuns vegn manada ina statistica dapi l'introducziun da la procedura d'admissiun senza examen. Ils tschintg onns da scola passads (2002/03 2006/07) èn sa participads als examens en total 335 scolaras e scolars. Da quellas e da quels han 15 (4.5 %) reussì l'examen. Detagliadamain sa preschentan las cifras sco suonda: 2002/03: 63, da quellas e quels 3 (4,7 %) reussì; 2003/04: 81, da quellas e quels 4 (4,9 %) reussì; 2004/05: 79, da quellas e quels 2 (2,5 %) reussì; 2005/06: 75, da quellas e quels 2 (2,6 %) reussì; 2006/07: 37, da quellas e quels 4 (10,8 %) reussì.

2) La statistica che vegn manada da l'uffizi per la scola populara ed il sport en connex cun il giudicament d'admissiun sin basa d'ina protesta na distingua betg tranter scolaras e scolars svizzers e tranter scolaras e scolars esters (princip da neutralitad). Las suandantas cifras èn vegnidas retschertgadas posteriuramain en spezial per respunder la dumonda parlamentara qua avant maun. La basa èn stads ils nums da las candidatas e dals candidats. Las cifras ston perquai vegnir interpretadas cun il quità correspundent.
Ils onns da scola 2005/06 e 2006/07 derivavan circa 12 % da las scolaras e dals scolars da scola primara da l'exteriur (mintgamai circa 1400 da circa 11'700). Tar il giudicament d'admissiun sin basa d'ina protesta importava la quota da persunas estras l'onn da scola 2005/06 50,6 % (38 da 75) e l'onn da scola 2006/07 43 % (16 da 37).

3) La regenza è er da l'avis ch'il "model dal stgalim superiur C" cun sia permeabilitad relativeschia l'impurtanza da las decisiuns d'admissiun da las persunas d'instrucziun da scola primara areguard la carriera da scola da pli lunga durada dals giuvenils. Tuttina na prevesa ella betg da desister d'in giudicament d'admissiun sin basa d'ina protesta.

4) Tenor l'avis da la regenza èsi inditgà da na betg abolir la procedura existenta, mabain da la modifitgar per la simplifitgar ed eventualmain d'incassar ina taxa d'examen che vegn restituida, sch'il giudicament d'admissiun sin basa d'ina protesta reussescha.

Datum: 29 da zercladur 2007