Navigation

Inhaltsbereich

Incumbensa Bundi concernent la cuntinuaziun da la scola

Sessiun: 18.04.2007
professiunala da tgira dal Grischun a Glion resp. la preservaziun da Glion sco lieu da scolaziun e da furmaziun supplementara en il sectur da la sanadad

Cun il CR dals 31 d'october 2006 n'ha la regenza grischuna betg dà a la scola professiunala da tgira dal Grischun (SPTG) l'incarica da prestaziun per scolar sin il stgalim terziar. Il medem mument è la SPTG vegnida incumbensada da laschar cumenzar ina classa per l'ultima giada l'onn 2007 cun il program dal DN II sco fin qua e da serrar lura la scola l'onn 2011.
Questa decisiun ha chaschunà differentas reacziuns, tranter auter er ina petiziun per mantegnair la SPTG. Per quella petiziun han ins pudì rimnar entaifer curt temp 11'800 suttascripziuns. Igl è evident che la decisiun da serrar ina scola che funcziuna bain e che ha success è nunchapibla e na vegn er betg acceptada.

Igl è nunchapibel da serrar ina scola:
- ch'è dumandada e bain frequentada
- cun ina qualitad e cun ina quantitad cumprovada
- che po concurrer economicamain cun centers pli gronds
- che ademplescha las pretensiuns per la nova scolaziun terziara
- che vegn er stimada da las instituziuns da tgira che surpiglian las scolaras ed ils scolars.
- a la quala ins ha empermess repetidamain ch'ella possia mantegnair sia posiziun
- che porscha il maun per ina vaira collavuraziun
- che ha in bun renum en la regiun, en il chantun ed en tut la Svizra
- ch'è in enritgiment per tut il chantun Grischun, perquai ch'i vegnan qua instruidas gia da vegl ennà persunas en scolaziun che derivan da tut las regiuns dal chantun Grischun.

L'existenza da la SPTG è vegnida confermada differentas giadas, per exempel en il CR dals 7 da fanadur 1998. Là statti scrit explicitamain (p. 2 s.) che la SPTG restia vinavant independenta. Er en il rom da la tractativa parlamentara da la lescha davart lieus da scolaziun en ils fatgs da la sanadad e socials, LLSS, ch'è la basa per il center da furmaziun a Cuira (CSS) èsi vegnì menziunà l'onn 2002 explicitamain che la basa per il CSS vegnia acceptada mo, sche la SPTG vegnia mantegnida. Dapi che la lescha è vegnida deliberada ans pari che la pussaivladad d'integrar la SPTG en la structura da scolaziun dal Grischun na saja mai propi vegnida prendida en mira seriusamain.

La resposta da la regenza en connex cun la dumonda Bundi n'ha betg pudì persvader las sutsegnadras ed ils sutsegnaders. Cun questa incumbensa duai la regenza perquai tschertgar vias per che la SPTG cun sias cumpetenzas, cun ses know-how resp. cun sias resursas possia esser activa er vinavant en il sectur da scolaziun da la sanadad.
Nus supplitgain la regenza grischuna d'elavurar ina soluziun, cun la quala Glion, e spezialmain la scola professiunala da tgira dal Grischun a Glion, possia vegnir mantegnida er en l'avegnir sco lieu da scolaziun e da furmaziun supplementara en il sectur da la sanadad.

Cuira, ils 18 d'avrigl 2007

Name: Bundi, Caviezel (Pitasch), Hasler, Augustin, Bachmann, Berni, Berther (Mustér), Berther (Sedrun), Bleiker, Blumenthal, Bondolfi, Brandenburger, Brüesch, Bucher-Brini, Buchli, Caduff, Candinas (Rabius), Casutt, Cavigelli, Christoffel-Casty, Darms-Landolt, Dermont, Fallet, Farrér, Federspiel, Florin-Caluori, Geisseler, Hanimann, Hartmann (Champfèr), Jenny, Kessler, Kleis-Kümin, Koch, Kollegger, Loepfe, Mengotti, Montalta, Niederer, Noi-Togni, Parolini, Peer, Pfister, Portner, Sax, Thomann, Troncana-Sauer, Zanetti, Candinas (Mustér), Luzio

Session: 18.04.2007
Vorstoss: rg Auftrag


Resposta da la regenza

Gia il program da la regenza per ils onns 1997 fin 2000 cuntegneva pervia dal svilup dals custs l'incumbensa da coordinar las scolas da sanadad e da tgira da malsauns (missiva, carnet 3/1996-97, p. 128). Correspundentamain cuntegna la missiva tar la lescha davart lieus da scolaziun en ils fatgs da la sanadad e socials (LLSS) la finamira che las purschidas da scolaziun en il sectur da la sanadad e dals fatgs socials en il chantun stoppian vegnir coordinadas e dirigidas, uschia ch'i possia vegnir garantida ina scolaziun che correspunda als basegns, ch'è economicamain favuraivla e che ha ina qualitad irreproschabla (missiva, carnet 2/2002-2003, p. 57). A cuntanscher questas finamiras serviva oravant tut l'art. 5 LLSS, tenor il qual la regenza po far cunvegnas da prestaziun cun instituziuns ch'èn responsablas per lieus da scolaziun.

La scola professiunala da tgira dal Grischun a Glion (SPTG) ha cooperà en il project "coordinaziun da la scolaziun tar professiuns dals fatgs da sanadad, COS" ed en ils projects chantunals, suenter che la LLSS è vegnida relaschada. Ella ha gì enconuschientschas da l'incumbensa directiva e coordinativa da la regenza per garantir ina purschida da scolaziun en il sectur da la sanadad e dals fatgs socials che correspunda als basegns e ch'è economicamain favuraivla. Resguardond l'incumbensa ed ils svilups pli novs da la politica da furmaziun sco er ils svilups demografics ha la regenza tractà cun la SPTG differents scenaris che tanschevan fin ad ina integraziun en il center da furmaziun per la sanadad ed ils fatgs socials (CSS). Enconuschentamain ha la SPTG refusà las purschidas preschentadas che s'accordavan cun l'incumbensa dal chantun. La regenza grischuna ha acceptà quai, n'ha da sia vart dentant betg pudì dar a la SPTG ina incarica da prestaziun per instituir ina scola professiunala superiura da tgira (SPS-tgira), perquai che questa SPS-tgira fiss ina duplicitad che chaschunass ulteriurs custs.

L'incumbensa parlamentara pretenda che la regenza elavuria ina soluziun, cun la quala Glion, e spezialmain la scola professiunala da tgira dal Grischun a Glion, possia vegnir mantegnida er en l'avegnir sco lieu da scolaziun e da furmaziun supplementara en il sectur da la sanadad. Sche l'incumbensa qua avant maun vegniss acceptada, fiss quai in pregiudizi per il fatg ch'il cussegl grond incumbensass la regenza da procurar ch'ina instituziun, per la quala il chantun n'è betg responsabel, vegnia mantegnida en mintga cas ed independentamain dal basegn. Sche l'incumbensa vegniss acceptada, pudess quai er esser ina invitaziun d'acceptar las stentas da coordinaziun e da direcziun pir, cur che las atgnas prestaziuns maximalas han fatg naufragi.

Dal rest ha l'incumbensa grondas sumeglientschas, però er differenzas considerablas cun l'iniziativa dal pievel "scola professiunala da tgira dal Grischun a Glion" ch'è vegnida publitgada ils 10 da matg 2007 en il fegl uffizial dal chantun. Cuntrari a l'iniziativa vul l'incumbensa obligar la regenza schizunt per lescha che suttastat al referendum da mantegnair e da promover Glion, cunzunt la scola professiunala da tgira dal Grischun a Glion, er en l'avegnir sco lieu da scolaziun e da furmaziun supplementara en il sectur da la sanadad. Sche l'iniziativa avess da reussir, duai il cussegl grond pudair tractar quella cur ch'igl è uschè lunsch per mauns da la votaziun dal pievel.

Dapi che la dumonda Bundi concernent la cuntinuaziun da la scola professiunala da tgira dal Grischun a Glion è vegnida respundida, n'hai dà naginas midadas che pretendessan da giuditgar da nov la fatschenta. Pervia da quai propona la regenza al cussegl grond da refusar l'incumbensa, e quai en accordanza cun las argumentaziuns ch'ella ha preschentà en la resposta sin la dumonda menziunada qua survart.

Datum: 29 da zercladur 2007