Navigation

Inhaltsbereich

Dumonda Mengotti concernent il traffic da stad sin la A29 che vegn chaschunà da la zona libra da dazi da Livigno

Sessiun: 11.06.2007
Tras la lescha taliana nr. 516 dals 17 da fanadur 1910 è il territori da Livigno vegnì declerà sco zona libra da dazi. Il rapport, cun il qual il minister da finanzas Arlotta ha preschentà quella giada il sboz da la lescha a la chombra dals deputads, sa basava sin l'isolaziun geografica extrema da la vischnanca da Livigno e sin la povradad extrema da sias paucas abitantas e da ses paucs abitants.

Durant ils ultims trenta onns hai dà ina transfurmaziun socio-economica profunda dal vitg ed in svilup turistic-commerzial che ha midà Livigno en in lieu da renum internaziunal, tranter auter er grazia a las bunas colliaziuns cun la Svizra.

Las numerusas fatschentas che dattan la pussaivladad da cumprar in'entira retscha da products ch'èn libers da la taglia sin la plivalur, dal dazi e dal dazi sin carburants (cigarettas, tubac, liquors amars, apparats da fotografar, apparats electronics, benzin e.u.v.) èn l'attracziun principala per las turistas e per ils turists da dumengias che derivan cunzunt da la metropola da la Lumbardia.

Cunzunt il carburant favuraivel attira fitg blers autos che sa rendan a Livigno per tancar. L'absurditad ecologica è evidenta: Nundumbraivels camiuns charreschan cun carburant e cun auters products sin 1900 m.s.m en il supermartgà da las Alps ed ina lavina d'autos porta puspè enavos questa rauba, cun consequenzas devastantas per l'ambient alpin sensibel e cun donns ecologics preoccupants a disfavur da la populaziun indigena. Vitiers vegn anc il donn per las activitads economicas en ils territoris cunfinants.

Il traffic tras il Puschlav crescha da 30'000 40'000 passagis per mais durant l'enviern (cur che la Forcola di Livigno è serrada) sin 100'000 180'000 passagis per mais durant la stad, cur che la Forcola di Livigno è averta (funtauna: post da dumbraziun 216, S. Carlo, onn 2002).

Er las abitantas ed ils abitants da la Vuclina enconuschan la problematica che vegn chaschunada da la zona libra da dazi. Ensemen cun set autras commembras resp. auters commembers dal senat ha la senatura Adria Bartolich fatg ina proposta per midar la lescha taliana nr. 762 dal 1. da schaner 1973 concernent ils dretgs spezials per la vischnanca da Livigno. Questa proposta prevesa da surdar la mesadad da las entradas spezialas da la vischnanca da Livigno a la provinza da Sondrio per ovras e per infrastructuras d'interess public sco er per mesiras per la protecziun da l'ambient.

La vischnanca da Livigno ha realisà il displaschair dals territoris talians cunfinants ed ha gia finanzià intginas ovras: Ella ha p.ex. gidà a finanziar la rundella da Tirano e mess a disposiziun 3,39 milliuns euros per il sviament da Bormio. Cun la construcziun da quest sviament duai vegnir cumenzà l'onn 2008.

Sin basa da questas ponderaziuns dumandain nus la regenza:

1. È la regenza al current che la lescha taliana nr. 384 dals 11 da zercladur 1954 e che la lescha consecutiva nr. 762 dal 1. da november 1973 concernent ils dretgs spezials per la vischnanca da Livigno vegnan midadas en quel senn ch'i vegn introducida ina regulaziun d'assegnar meds finanzials ad ovras ed ad infrastructuras d'interess public sco er a mesiras per la protecziun da l'ambient, e quai tenor ina clav da repartiziun da 50 pertschient per la vischnanca da Livigno e da 50 pertschient per la provinza da Sondrio?

2. È la regenza pronta d'intervegnir tar las instanzas cumpetentas (svizras e talianas) per discutar davart la problematica, davart las mesiras per restrenscher il traffic e davart ils daners che duain vegnir mess a disposiziun per ovras e per mesiras a favur da la protecziun da l'ambient e che tutgassan proporziunalmain a la Val Puschlav?

Cuira, ils 11 da zercladur 2007

Name: Mengotti, Koch, Zanetti, Arquint, Bondolfi, Caduff, Casutt, Cavigelli, Fallet, Geisseler, Giovanoli, Keller, Kleis-Kümin, Kollegger, Niederer, Noi-Togni, Pedrini (Roveredo), Plozza, Tenchio, Toschini, Troncana-Sauer

Session: 11.06.2007
Vorstoss: rg Anfrage


Resposta da la regenza

Questa intervenziun sa fatschenta cun las consequenzas che resultan dal traffic da transit a Livigno per la Val Puschlav. La regenza vegn envidada da discutar cun las vischinas e cun ils vischins talians las pussaivladads da confinanziar tant infrastructuras da traffic a favur da la protecziun da l'ambient sco er mesiras per diriger il traffic.

L'emprim e plitost sco reminiscenza istorica duai vegnir tratg endament che la vischnanca da Puschlav era sa declerada pronta a sias uras da metter a disposiziun gratuitamain il terren necessari per engrondir la via da La Motta a la Forcola di Livigno. La vischnanca aveva exprimì in grond interess per l'engrondiment dal traject fin al cunfin svizzer, perquai ch'ella s'empermetteva pussaivladads da valurisaziun en l'atgna val, e quai cunzunt en il traffic da rauba cun la vischnanca da Livigno, ma er tras l'augment che vegniva spetgà tar il traffic turistic. En il fratemp vegn il traffic da transit tras la Val Puschlav si Livigno e giu dentant cunzunt considerà sco grevezza per la qualitad d'abitar e da viver per lung da la via dal Bernina. Effectivamain conferman las dumbraziuns dal traffic al post da dumbraziun a Brusio ch'il traffic è s'augmentà tenor la tendenza. En cumparegliaziun cun la via da la Bregaglia a Castasegna u cun la via dal Fuorn a Buffalora è dentant la quantitad dal traffic tras la Val Puschlav s'augmentada bler pli pauc. I na po dentant betg vegnir snegà ch'ina gronda part dal traffic supplementar tras la Val Puschlav stat cunzunt durant la stad en connex cun il traffic en ed or da la zona libra da dazi da Livigno.

Las singulas dumondas sa laschan respunder sco suonda:

1. A la regenza n'èsi betg enconuschent che las leschas talianas concernent ils dretgs spezials per la vischnanca da Livigno fissan vegnidas midadas en tala moda che la vischnanca da Livigno stuess gidar a finanziar infrastructuras da traffic a favur da la protecziun da l'ambient en Vuclina resp. en la provinza da Sondrio.

2. La regenza è pronta da contactar las persunas responsablas da la vischnanca da Livigno d'ina vart e da la provinza da Sondrio da l'autra vart e d'entrar en discurs en vista a mesiras per diriger il traffic che ston anc vegnir coordinadas ed en vista ad in'eventuala cunparticipaziun als custs per mesiras per proteger la populaziun puschlavina ch'è turmentada dal traffic.

Datum: 31 d'avust 2007