Navigation

Inhaltsbereich

Incumbensa da fracziun da la PS Pfiffner-Bearth concernent la creaziun d'ina lescha d'integraziun per il chantun Grischun

Sessiun: 11.06.2007
La Svizra dispona d'ina quota da persunas estras da 20,7 pertschient (stadi 2005). L'inscunter da differents pievels e da differentas culturas è gia adina stà in stimul per il progress, per la perscrutaziun, per la scienza, per la cultura e per l'economia. Dal puntg da vista demografic sa mussa l'immigraziun perfin sco ina necessitad. Sin fundament dal svilup da la populaziun essan nus dependents da forzas da lavur estras. La Svizra è in pajais d'immigrantas e d'immigrants ed ella vegn a restar quai er en l'avegnir.

L'immigraziun porta ultra da las schanzas er ristgas. Nua ch'i s'entaupan differentas ragischs culturalas datti malchapientschas, concurrenza e scuidanza. L'immigraziun producescha sfruschadas socialas tranter persunas immigradas e persunas indigenas. Igl è perquai ina incumbensa centrala da cumprender ils problems ch'èn senza dubi avant maun en connex cun l'immigraziun en lur dimensiun reala e da betg als scuflar en moda populistica, ma er da betg als bagatellisar.

En tut ils indicaturs relevants (dischoccupaziun, dependenza d'agid social, scolaziun, integraziun en la vita professiunala, sanadad, cas penals e.u.v.) ha la populaziun estra en media mendras valurs. Il problem, cun il qual nus essan oz confruntads primarmain, è la consequenza da l'arriv successiv da la famiglia da la segunda fasa d'immigraziun che ha gì lieu ils onns 90. Quai ha tranter auter chaschunà che bleras dunnas e che blers uffants dals anteriurs lavurants esters èn arrivads successivamain en Svizra ed èn betg l'ultim pervia d'ina politica d'integraziun manglusa s'integrads relativamain mal en la vita professiunala ed en la societad, e quai cun tut las consequenzas negativas ch'èn resultadas.

Ina integraziun cun success è in process vicendaivel e pretenda da tut las persunas pertutgadas ch'ellas hajan la voluntad e la prontezza da s'integrar. En quest connex fai er basegn d'instruments obligants. In princip essenzial è quel da "l'integraziun a partir da l'emprim mument". Il process d'integraziun sto cumenzar directamain suenter l'arriv en Svizra e sto cuntinuar permanentamain.

La finamira da l'integraziun è da cuntanscher in'egualitad cumplessiva da las schanzas. L'integraziun è gartegiada pir, cur che migrantas e migrants cumprovan en ils differents secturs da l'integraziun indicaturs sumegliants sco las persunas svizras per exempel areguard il nivel da furmaziun, areguard la quota da persunas dischoccupadas, areguard la dependenza d'agid social, areguard la ristga da povradad, areguard l'invaliditad, areguard la criminalitad u areguard la sanadad.

La societad e l'economia profiteschan d'ina populaziun estra bain integrada. L'integraziun ha lieu sin differents plauns. L'integraziun structurala duai garantir l'access da las persunas immigradas en ils secturs relevants da l'integraziun sco la scola, la furmaziun professiunala ed il martgà da lavur. L'integraziun culturala e sociala ha lieu en la vita sociala, en il quartier d'abitar u en il temp liber. Ella duai contribuir a la chapientscha da las valurs da basa, da las reglas da la cuminanza e da l'urden giuridic. L'integraziun politica duai la finala cuntanscher che las persunas immigradas vegnian integradas en ils process da decisiun socials e politics.

Ina integraziun cun success levgescha la vita cuminaivla tranter persunas svizras e persunas migrantas. Ella pussibilitescha er a persunas migrantas da trair a niz plainamain lur abilitads e da sa far valair en la societad (uniuns, vischinadi, activitad en las autoritads, tut il sectur d'uffizis d'onur). Ultra da quai contribuescha la populaziun estra dentant er essenzialmain a rinforzar la multifariadad culturala.

Ina meglra integraziun da la populaziun estra contribuescha la finala ad augmentar las entradas fiscalas ed a diminuir ils custs tar las expensas socialas, ella sminuescha da l'autra vart ils custs consecutivs che vegnan chaschunads tras ina integraziun manglusa (meglieraziun en il sectur da la scola, custs en ils fatgs da sanadad, en la persecuziun penala ed en l'execuziun da chastis).
Ils 18 d'avrigl 2007 ha deliberà il cussegl grond dal chantun Basilea-Citad ina lescha d'integraziun cumplessiva che vala gia ussa sco term impurtant da la legislaziun d'integraziun da la Svizra. Sco emprima lescha svizra en il sectur da l'integraziun oblighescha ella tant ils individis sco er il stadi da s'engaschar vicendaivlamain e constructivamain areguard las finamiras da l'integraziun.

Las persunas che han sutsegnà supplitgeschan la regenza d'elavurar ina lescha d'integraziun che correspunda als basegns dal chantun Grischun.

Cuira, ils 11 da zercladur 2007

Name: Pfiffner-Bearth, Peyer, Trepp, Arquint, Baselgia-Brunner, Bucher-Brini, Frigg-Walt, Gartmann-Albin, Jaag, Jäger, Menge, Meyer Persili (Cuira), Pfenninger, Thöny, Pedrini (Soazza)

Session: 11.06.2007
Vorstoss: rg Auftrag



Resposta da la regenza

Cun l'entrada en vigur da la nova lescha federala davart las persunas estras (LEst) e da la revisiun da la lescha d'asil (rev. LAsil) ha il cussegl federal adattà er l'ordinaziun davart l'integraziun da persunas estras (OIEst; CS 142.205). En quest connex vegnan unidas da nov las disposiziuns da la LEst e da la LAsil ch'èn relevantas per l'integraziun, ed i vegnan fixads ils princips e las finamiras, la contribuziun e las obligaziuns da las persunas estras sco er la procedura e las premissas per pajar contribuziuns finanzialas federalas per promover l'integraziun. Er las cumpetenzas e la collavuraziun tranter la confederaziun ed il chantun vegnan regladas da nov. Uschia vegn la confederaziun a manar sia politica d'integraziun a partir da l'onn 2008 mo pli cun agid da a finamiras e da programs sco er cun agid d'impuls per sviluppar la pratica. En l'avegnir vegnan ils chantuns ad exequir ed a realisar ils programs d'accents da la confederaziun. Uschia survegnan els la responsabladad operativa per l'examinaziun da las dumondas, per la procedura da decisiun, per il management da finanzas e per l'examinaziun dals rapports.

Tenor la nova orientaziun da la politica federala, è la promoziun da l'integraziun primarmain l'incumbensa da las structuras reglamentaras (en quest connex pon vegnir menziunads per exempel la scolaziun e la furmaziun, il mund da la lavur, il sectur da la migraziun e las instituziuns da la segirezza sociala). Ella vegn a pretender ina collavuraziun pli stretga dals differents departaments e dals differents posts da servetsch che vegnan confruntads cun incumbensas e cun problems or dal sectur da la migraziun (cf. art. 9 OIEst).

Da questa midada ch'è previsa resultan novas pretensiuns per la politica chantunala d'integraziun. En l'avegnir ston ils chantuns ademplir incumbensas da strategia e da coordinaziun. Per quai ston els crear las premissas organisatoricas necessarias, quai che vegn ad avair er consequenzas finanzialas. La realisaziun da la nova repartiziun da la lavur premetta ch'i vegnian creads la basa legala correspundenta, ils instruments directivs, las structuras sco er las resursas finanzialas e persunalas.

En connex cun las novas disposiziuns da la LEst e da la LAsil ch'èn relevantas per l'integraziun ha la regenza fixà il cumenzament da fanadur 2007 ils princips da l'organisaziun futura per la promoziun da l'integraziun en il chantun Grischun. Per l'orientaziun strategica da la promoziun da l'integraziun en il dretg da persunas estras ed en il dretg d'asil vegn engaschada ina gruppa directiva. Quella sa cumpona da represchentantas e da represchentants dals departaments e dals posts da servetsch ch'èn pertutgads da la problematica d'integraziun en lur incumbensas centralas. Per realisar las ulteriuras incumbensas en il sectur da l'integraziun duai vegnir stgaffida ina plazza per ina incumbensada u per in incumbensà d'integraziun. Per pudair realisar las incumbensas dal sectur da l'integraziun ch'èn vegnidas surdadas tenor il dretg federal als chantuns, e per pudair realisar la politica d'integraziun chantunala che sa drizza tenor las incumbensas, sto ultra da quai vegnir elavurada la basa legala sin plaun chantunal (finamira, incumbensas, obligaziuns, organisaziun, cumpetenzas, coordinaziun, contribuziuns finanzialas, secturs da promoziun e.u.v.). Perquai che l'ordinaziun d'integraziun dal cussegl federal sa basa sin la lescha davart las persunas estras e sin la lescha d'asil, prevesa la regenza da realisar las disposiziuns ch'èn relevantas per l'integraziun sin plaun chantunal en il rom da l'adattaziun necessaria da l'ordinaziun executiva dal cussegl grond tar la legislaziun federala davart ils esters ed ils fatgs d'asil (OECGtLEA). L'ordinaziun dal cussegl grond sto tenor la directiva da la constituziun chantunala vegnir remplazzada tras ina lescha executiva chantunala tar las leschas federalas. En quella ston vegnir resguardads ils basegns spezials e las cundiziuns spezialas dal chantun en moda adequata er en il sectur da l'integraziun. Per quests motivs n'èsi betg previs da crear in'atgna lescha d'integraziun nova, e sin fundament da l'andament previs da la regenza n'è quai er betg necessari. La regenza propona perquai da refusar l'incumbensa.

Datum: 14 d'avust 2007