Navigation

Inhaltsbereich

Dumonda Parolini concernent in studi da realisabladad per ina colliaziun da la viafier da Scuol a Landeck

Sessiun: 13.06.2007

Cun l'assegnaziun dal postulat Plouda è la regenza vegnida incumbensada l'onn 1998 da sclerir la realisabladad d'ina colliaziun da la viafier da Scuol a Landeck. La regenza aveva vulì persequitar il project d'ina colliaziun da la viafier Scuol-Landeck mo en il senn d'ina opziun a lunga vista per al examinar lura pli tard. Il schef dal departament da construcziun, traffic e selvicultura da quel temp, cusseglier guvernativ Luzi Bärtsch, aveva cumbattì en la debatta cunter l'assegnaziun dal postulat ed intunà ch'il cussegl grond duaja discutar en tschintg u diesch onns puspè davart quest studi da realisabladad. Il postulat era da quel temp vegnì assegnà cun 39 cunter 37 vuschs, e quai cunter la veglia da la regenza. Capità n'è dentant tuttina nagut.
Scleriments areguard la realisabladad da questa colliaziun correspundan oz, 9 onns pli tard, anc adina ad in basegn. Vias cun bunas capacitads da traffic èn la basa per il svilup da l'attractivitad dal lieu en mintga regiun. Cun ina tala colliaziun da tren pudess tut il Grischun dal sid, dentant er parts dal Grischun central e dal Grischun dal nord survegnir ina meglra colliaziun cun il vischin vers l'ost, l'Austria, ed uschia er cun la Germania dal sidost e cun l'Europa orientala e cun l'Europa centrala. Sch'ins considerescha la gronda impurtanza che la vasta aglomeraziun da Minca ha per il turissem grischun, èsi impurtant da s'occupar cun quest project. La lingia da la VR da l'Engiadina ed er quella dal Veraina e dal Partenz survegnissan dapli impurtanza tras questa colliaziun interalpina vers l'ost.
Cun la lescha per promover il svilup economic en il chantun Grischun ch'il cussegl grond ha deliberà l'avrigl 2007 è stgaffida la basa legala per promover novas colliaziuns da traffic. Uschia di l'artitgel 17b: Il chantun po promover la planisaziun da novas colliaziuns da traffic, sch'ellas adempleschan almain la funcziun d'ina avertura regiunala e sch'ellas empermettan in niz supplementar per l'economia publica. Per tals projects po il chantun examinar l'utilitad ed incumbensar planisaziuns." Cun ils meds che stattan a disposiziun sa tracti da meds da l'agio da la BCG che importan 10 milliuns francs. Tenor il conclus dal cussegl grond èn quels reservads sco credit d'impegn per il temp dal 2007 2015.
È la regenza pronta d'examinar l'opportunitad e la realisabladad d'ina colliaziun da viafier da Scuol a Landeck?

Cuira, ils 13 da zercladur 2007

Name: Parolini, Pfäffli, Jäger, Arquint, Berther (Sedrun), Bezzola (Zernez), Bischoff, Blumenthal, Brandenburger, Brantschen, Bucher-Brini, Buchli, Campell, Candinas, Casparis-Nigg, Caviezel-Sutter (Tusaun), Christoffel-Casty, Clavadetscher, Conrad, Dermont, Dudli, Fallet, Felix, Feltscher, Frigg-Walt, Giovanoli, Hartmann (Champfèr), Jaag, Janom Steiner, Jenny, Keller, Koch, Menge, Mengotti, Meyer-Grass (Claustra), Noi-Togni, Perl, Plozza, Portner, Ragettli, Stiffler, Stoffel, Thomann, Thurner-Steier, Trepp, Troncana-Sauer, Vetsch, Wettstein, Jecklin-Jegen, Pedrini (Soazza), Joos, Hauser, Kunz (Fläsch)

Session: 13.06.2007
Vorstoss: rg Anfrage

Resposta da la regenza

Il giavisch per ina colliaziun da viafier dal lieu final da la viafier retica a Scuol fin a Landeck han ins gì daditg. Ch'ils construiders da la lingia da la VR da l'Engiadina bassa avevan planisà gia l'onn 1914 da cuntinuar cun la lingia vers Landeck mussan il grond stabiliment da consegna a Scuol ch'è vegnì concepì sco staziun da cunfin ed er la "storta tirolaisa" che tanscha anc in toc pli lunsch che la staziun e che vegn utilisada oz sco binari da manevrar.

Tras ina colliaziun interalpina da viafier da Scuol a Landeck pudess dal puntg da vista economic survegnir tut il Grischun dal sid, ma er parts dal Grischun central e dal Grischun dal nord ina meglra colliaziun cun il vischin vers l'ost, l'Austria, ed uschia er cun la Germania dal sidost e cun l'Europa orientala e cun l'Europa centrala. La vasta aglomeraziun da Minca ha ina gronda impurtanza per il turissem grischun .

La cuntinuaziun da la rait dal traject da la viafier retica tranter Scuol e Landeck ademplescha tras quai senz'auter las premissas che la lescha vertenta per il svilup economic pretenda per in'examinaziun da l'opportunitad.

Sche las persunas responsablas dal Tirol èn er interessadas ad ina tala examinaziun, è la regenza pronta da prender la colliaziun da viafier menziunada en ses catalog da las "novas colliaziuns da traffic" e da laschar examinar ina tala areguard sia opportunitad.

Datum: 3 da settember 2007